San Juan 14 - Biblia Guarani Tumpa Iñee

Jesús ko jae tape yandeRu kotɨ ojo vae

¹ Agüɨye peyembopɨajopa. Perovia Tumpa re, perovia vi cheré.

² CheRu jëta pe oime jeta o. Jökoraiä yave, amombeuta tëi ko peve. Ajata ayapokatu perendarä.

³ Aja ma yave ayapokatu perendarä, ayu yeta pogüɨraja, pe reta vi peiko vaerä che aikoa pe.

⁴ Pe reta peikuaa ketɨ ko aja vae, jare peikuaa vi tape.

⁵ Jayave Tomás jei: —OreYa, ore mbaetɨ roikuaa ketɨ ko reota vae. ¿Këraita ra roikuaa tape?

⁶ Jesús jei chupe: —Che ko jae tape, añetete vae jare tekove. Mbaetɨ kia ipuere ojo cheRu oïa pe, jaeño cherupi.

⁷ Chekuaa kavi yave mona, peikuaata tëi vi ko cheRu. Ërei añave güive peikuaa ko. Echa peecha ma.

⁸ Felipe jei chupe: —OreYa, eechauka oreve ndeRu. Jokuaeño roipota.

⁹ Jesús jei chupe: —Ɨma ma aiko pe reta ndive, ¿mbaetɨño pa chekuaa Felipe? Chereecha vae oecha ma ko cheRu. ¿Maera pa rere: “Eechauka oreve ndeRu”?

¹⁰ ¿Mbaetɨ pa perovia che meteiño cheRu ndive, jare cheRu meteiño che ndive vae? Ñee reta amombeu peve vae cheyeugüi aeñoä ko jae. CheRu oï cheré vae ko oyapo mbaravɨkɨ reta.

¹¹ Perovia che meteiño ko cheRu ndive, jare cheRu meteiño che ndive. Ërei yepe tëi mbaetɨ chererovia, chererovia ayapogüe reta re.

¹² Añetete che jae peve, cheré güɨrovia vae oyapota vi mbaravɨkɨ reta ayapo vae. Jare ma yae oyapota, echa che ajata cheRu oïa pe.

¹³ Opaete mbae re peyerure cheRu pe cheree re yave, che ayapota ko, cheRu oyemboeteuka vaerä cherupi.

¹⁴ Mbae peiporu cheree re vae, ayapota ko peve.

Jesús oñererökuavee ombou vaerä Espíritu Santo

¹⁵ Cheraɨu yave, peyapo cheporookuai reta.

¹⁶ Jare che ayerureta cheRu pe jae ombou vaerä peve ïru Oporombopɨakatu vae. Oiko avei vaerä pe ndive.

¹⁷ Jae ko Espíritu añetete pegua. Oporogüɨroviambae vae reta ngaraa ipuere omboresive. Echa mbaetɨ oecha ani oikuaa. Ërei pe reta peikuaa. Echa jae oime oï pe ndive jare oikota pepɨa pe.

¹⁸ Che ngaraa poeya tɨ̈reɨ. Ayu yeta ko pépɨri.

¹⁹ Michi peguaño ma ɨvɨ pegua reta chereechata. Ngaraa ma chereecha ye. Ërei pe reta chereecha yeta. Che aikove ramo, pe reta peikoveta vi.

²⁰ Jókuae ara peikuaata ko che meteiño cheRu ndive, jare pe reta meteiño che ndive vae, jare che meteiño pe ndive.

²¹ Oyeapɨsaka cheporookuai reta re jare oyapo vae, jae ko cheraɨu vae. Jare cheraɨu vae cheRu oaɨuta, jare che aaɨuta, jare ayekuaaukata chupe.

²² Jayave Judas (kuae jaeä ko Judas Iscariote) jei chupe: —OreYa, ¿këraita pa reyekuaauka oreve, javoi mbaetɨta reyekuaauka oporogüɨroviambae vae reta pe?

²³ Jesús jei chupe: —Cheraɨu vae oyapota che jae vae. Jare cheRu oaɨuta. Jare royuta roiko vaerä jae ndive.

²⁴ Mbaetɨ cheraɨu vae, mbaetɨ oyapo che jae vae. Jare cheñee peendu vae chembaeä ko, cheRu chembou vae iñee ko.

²⁵ Kuae mbaembae re chemiari ma peve, aiko pe ndive ramboeve.

²⁶ Ërei jókuae Oporombopɨakatuta vae Espíritu Santo CheRu ombouta peve cheree re vae, pemboeta opaete mbaembae re, jae pemomaenduata opaete che jae peve vae re.

²⁷ Mbɨakatu aeya pe ndive. Mbɨakatu che anoi vae amee peve. Che ameeä peve ɨvɨ pegua reta omee rami. Agüɨye peyembopɨajopa, agüɨye vi pekɨɨye.

²⁸ Peendu ma kërai che jae: “Ajata jare ayu yeta pépɨri.” Cheraɨu yave mona, peyeroviata tëi ko. Echa ajata cheRu oïa pe, jare cheRu imbaepuere tuicha yae chembaepuere güi.

²⁹ Amombeu voi ma peve ndei oyeapo mbove, perovia vaerä oyeapo ma yave.

³⁰ Ngaraa ma ɨma chemiari peve. Echa aña kuae ɨvɨ juvicha outa ete ma oväe cheve. Ërei ngaraa ipuere cheré.

³¹ Ërei ayapota cheRu iporookuai, ɨvɨ pegua reta oikuaa vaerä che aaɨu ko cheRu. ¡Pepüa, yaja mo kuae güi!