San Juan 13 - Biblia Guarani Tumpa Iñee

Jesús oyoe jemimboe reta ipɨ

¹ Ndei arete Pascua mbove. Jesús oikuaa ara oväe ma oeya vaerä kuae ɨvɨ ojo ye vaerä Tu oïa pe. Jare kërai oaɨu imbae vae reta ɨvɨ pe ñogüɨnoi vae, jare oaɨu yae iyapɨ regua.

^2-4 Judas Iscariote, Simón taɨ ipɨa pe aña guasu oñono ma omee vaerä Jesús jovaicho reta pe. Jare Jesús oikuaa kavi ma Tu oñono opaete mbaembae ipo pe. Oikuaa vi ou ko Tumpa güi jare ojo yeta ko Tumpa oïa pe. Jare pɨ̈tu yave Jesús jare jemimboe reta okaru ñogüɨnoi ramboeve, jae opüa mesa güi, omboi jemimonde iarambogua, jare oyekuakua metei toalla pe.

⁵ Jayave oñono ɨ metei yepoeka pe jare omboɨpɨ oyoe jemimboe reta ipɨ, jare oyoe ma yave, omotini toalla ikúa re güɨnoi vae pe.

⁶ Jare ojo oväe Simón Pedro oïa pe yave, Pedro jei chupe: —CheYa, ¿reyoeta yera chepɨ?

⁷ Jesús jei chupe: —Kuae ayapo aï vae mbaetɨ reikuaa kavi añave, ërei reikuaa kavita ko taɨkue rupi.

⁸ Pedro jei chupe: —Ngaraa etei amaeño reyoe vaerä chepɨ. Jesús jei chupe: —Mbaetɨ ayoe ndepɨ yave, nde mbaetɨ ko reï che ndive.

⁹ Jayave Simón Pedro jei: —CheYa, eyoe chepo jare cheäka vi agüɨye eyoe chepɨño.

¹⁰ Jesús jei: —Oyaugüe ngaraa ma oyau ye. Ipɨño ma oyoeta. Echa opaete jete ikɨambae ma ko. Jare pe reta pekɨambae ma. Ërei ndeiño opaete.

¹¹ Echa Jesús oikuaa kia ko omeeta jovaicho reta pe vae. Jáeramo jei: “Ërei ndeiño opaete pekɨambae.”

¹² Jayave opa ma ipɨ reta oyoe yave, oyemonde ye Jesús jare ojo oguapɨ jenda pe. Javoi oparandu chupe reta: —¿Peikuaa pa mbae ko ayapo peve vae?

¹³ Pe reta pere cheve: “Oporomboe vae”, jare pere vi: “OreYa.” Añetete ko kuae pere vae. Echa jae ko che.

¹⁴ Ërei yepe tëi che peYa jare Oporomboe vae, ërei ayoe pepɨ. Jáeramo ikavi ko pe reta peyoe vaerä vi pepɨ oyougüi.

¹⁵ Echa che kuae aechauka peve, pe reta vi peyapo vaerä che ayapo peve rami.

¹⁶ Añetete che jae peve, metei tembiokuai mbaetɨi ko ma yae iya güi. Ani temimondo mbaetɨi vi tuichagüe yae imondoa güi.

¹⁷ Kuae peikuaa jare peyapo yave, peyeroviata yaeta ko.

¹⁸ Opaete pe reta reä ko chemiari aï. Che aikuaa kia reta ko jae cherembiparavo. Ërei Tumpa Iñee pe oyekuatía oï vae oyembopota ko. Echa oyekuatía oï körai: “Jókuae okaru che ndive vae oyeapata cheré.”

¹⁹ Kuae amombeu peve añave ndei oyeapo mbove, oyeapo ma yave perovia vaerä CHE KO vae.

²⁰ Añetete che jae peve, che amondo vae omboresive vae, che ko chemboresive. Jare che chemboresive kavi vae, omboresive ko chembou vae.

Judas omeeta Jesús

²¹ Kuae jei ma yave, Jesús ipɨatɨtɨ yae jare jei: —Añetete che jae peve, metei pepɨte pe oï vae chemboeterengata.

²² Jayave jemimboe reta omae oyoe. Oikuaaä kia re ra imiari vae.

²³ Metei jemimboe jae oaɨu yae vae okaru oï iyɨpɨ pe.

²⁴ Jayave Simón Pedro omomɨi iñäka, jókuae ïru temimboe pe, jae oparandu vaerä Jesús pe kia regua ra jei oï vae.

²⁵ Jayave jókuae temimboe Jesús iyɨpɨ pe okaru oï vae oparandu chupe: —CheYa, ¿kia pa ko jae?

²⁶ Jesús jei: —Jókuae ameeta mbɨyape amoäkɨgüe chupe vae ko jae. Jayave omoäkɨ mbɨyape tembíu pe omee Judas Iscariote, Simón taɨ pe.

²⁷ Jare Judas jou ñoete, Satanás oike ipɨa pe. Jayave Jesús jei chupe: —Eyapo voi jókuae reyapota vae.

²⁸ Ërei mbaetɨ kia ave jókuae mesa pe ñogüɨnoi oikuaa maera Jesús jei jökorai Judas pe.

²⁹ Amogüe vae oyemongeta Jesús jei chupe, ojo vaerä mbae ogua arete peguarä, ani omee vaerä mbae paravete vae reta pe. Echa Judas güɨnoi korepoti jɨru.

³⁰ Jare Judas opa jou mbɨyape yave, oë ojo. Jare pɨ̈tu ma.

Mborookuai ipɨau vae

³¹ Jare Judas oë ma yave, Jesús jei: —Che Kuimbaerä ayeapo vae, añave ɨvɨ pegua reta chemboeteta, jare omboeteta vi Tumpa cherupi.

³² Ɨvɨ pegua reta omboete Tumpa cherupi yave, Tumpa etei chemboeteukata ɨvɨ pegua reta pe. Jare jaema voi chemboeteukata.

³³ Cheraɨ michi reta, michi peguaño ma aïta pe ndive. Jayave chereeka tëita, ërei pe reta ngaraa pepuere peo che ajataa pe. Echa körai jae judío reta pe, jare añave jae vi peve.

³⁴ Amee peve metei mborookuai ipɨau vae, jae ko: Peyoaɨu. Peyoaɨu che poaɨu rami.

³⁵ Peyoaɨu yave, opaete ɨvɨ pegua reta oikuaata pe reta cheremimboe reta ko vae.

Pedro oikuakuta Jesús

³⁶ Simón Pedro jei Jesús pe: —CheYa, ¿ketɨ pa reota? Jesús jei chupe: —Che ajataa pe añave ngaraa ndepuere reo cherupíe. Ërei taɨkue rupi reota kuri cheraɨkue.

³⁷ Pedro jei chupe: —CheYa, ¿maera pa chepuere potaä aja nde nderupíe añave? Che tamano ndepoepɨka pe.

³⁸ Jesús jei chupe: —Nde rere remanota cherekovia pe. Ërei añetete che jae ndeve, ndei takareo oñee mbove, mboapɨ ye ma chekuakuta.