San Juan 12 - Biblia Guarani Tumpa Iñee

María opɨyere mbae ikäti kavi vae Jesús re

¹ Ova araño ma oata arete Pascua oväe vaerä yave, Jesús ojo Betania pe. Lázaro oikoa pe, jae ko Jesús omoingove ye omanogüe vae reta ipɨte güi vae.

² Jare pɨ̈tu ma yave oyapo reta Jesús okaru vaerä. Marta güeru tembíu, jare Lázaro oguapɨ okaru mesa pe Jesús ndive.

³ Jayave María güeru medio kilo mbae ikäti kavi vae nardo jee vae jepɨ yae vae jare opɨyere Jesús ipɨ re. Jare omotini ia pe. Jare opaete o tɨnɨe ikäti kavi.

⁴ Jayave metei Jesús jemimboe Judas Iscariote jee vae, Simón taɨ, jae ko omeeta Jesús jovaicho reta pe vae, jei:

⁵ —¿Maera pa omeeä kuae mbae ikäti kavi vae tresciento denario pe? Oñemee vaerä paravete vae reta pe.

⁶ Ërei mbaetɨ jei jökorai paravete vae reta omborɨ vaerä. Jei jökorai imonda ramo. Echa güɨnoi korepoti ïru vae reta omee chupe reta vae jɨru, jare oekɨ vɨari yepi korepoti iyeupeguarä.

⁷ Jayave Jesús jei chupe: —Emaeño jese. Añeotɨukata vae peguarä ko oñovatu kuae.

⁸ Iparavete vae reta yogüɨreko ñotai ko pe reta ndive. Ërei che ngaraa aikoño avei pe reta ndive.

Oyomboemboe reta oyuka vaerä Lázaro

⁹ Jare jeta judío reta oikuaa Jesús oï joko pe vae. Jáeramo yogüeru. Ërei yogüerúä Jesús joko pe oï ramoño, yogüeru vi omae vaerä Lázaro re. Jókuae Jesús omoingove ye omanogüe vae reta ipɨte güi vae.

¹⁰ Jayave sacerdote reta itenondegua reta oyemongeta vi kërai oyuka vaerä Lázaro.

¹¹ Echa Lázaro jeko pegua jeta judío reta oyembosɨrɨ chugüi reta, jare güɨrovia Jesús re.

Jesús oike Jerusalén pe

¹² Pɨareve pe, jeta yae Pascua pe yogüeru vae oikuaa Jesús oime ou Jerusalén kotɨ vae yave.

¹³ Oipɨɨ reta karandaɨ joo yogüɨraja oövaiti vaerä Jesús, jare osapúkai reve jei reta: —¡Hosanna! Toyemboeteuka yandeYa jee re ou vae, Israel Juvicha guasu.

¹⁴ Jare Jesús oväe metei mburika kuimbae taɨrusu vae, jare opo jese, Tumpa Iñee pe oyekuatía oï rami:

¹⁵ “Agüɨye pekɨɨye, Sión pegua reta. Mase, ko ou ma peRuvicha guasu. Opo ou mburika kuimbae taɨrusu vae re, mburika mii imembɨ re.”

¹⁶ Jókuae ara Jesús jemimboe reta oikuaa kaviä kuae regua. Ërei Jesús oyemboeteuka ma yave, imaendúa reta kuae re. Echa jökorai Tumpa iñee pe oyekuatía oï jesegua, jare jökorai oyeapo chupe.

¹⁷ Echa amogüe, Jesús omoingove ye Lázaro omanogüe reta ipɨte güi yave ñogüɨnoi jae ndive vae reta omoërakua yepe jókuae oechagüe.

¹⁸ Jáeramo jeta vae yogüɨraja oövaiti Jesús. Echa oikuaa ma oyapo jókuae mɨakañɨ vae.

¹⁹ Jayave fariseo reta jei oyoupe: —Mase, mbaetɨ mbae yandepuere yayapo. Echa opaete vae yogüɨraja jupíe.

Greciaɨgua reta oeka Jesús

²⁰ Yogüeru arete Pascua pe ombaemboete vae reta ipɨte pe ñogüɨnoi amogüe Greciaɨgua reta.

²¹ Jae reta oya katu Felipe re; Felipe jae ko Betsaidaɨgua ɨvɨ Galilea pegua, jae reta omoñera reve jei reta chupe: —Oreya, roipota tëi roecha Jesús.

²² Jayave Felipe ojo omombeu Andrés pe. Javoi mókoi reve yogüɨraja omombeu Jesús pe.

²³ Jayave Jesús jei: —Ara oväe ma che ayeapo Kuimbaerä vae ayemoeteuka vaerä.

²⁴ Añetete che jae peve, metei trigo jäɨgüe mbaetɨ oñeotɨ yave, opɨta jökoraiño. Ërei oñeotɨ yave, jeta oñemoña.

²⁵ Oaɨu jekove vae, okañɨteita ko. Ërei mbaetɨ oaɨu jekove kuae ɨvɨ pe vae, oñovatu ko tekove opambae vae peguarä.

²⁶ Oyeokuai cheve vae tojo cherupíe. Cherembiokuai oïta che aïtaa pe. Jare cheRu ombotuichaukata oyeokuai cheve vae.

Jesús omombeu omanota ko vae

²⁷ “Chepɨatɨtɨ yae aï. Ërei chepuereä jae: ‘CheRu, cherepɨ kuae ora pe oyeapota cheve vae güi.’ Ërei kuae ra ko ayu aupitɨ kuae ora.

²⁸ CheRu, eyapo emboeteuka nderee.” Jayave oyeendu ñee ara güi jei: “Amboeteuka ma ko, jare amboeteuka yeta.”

²⁹ Jeta joko pe ñogüɨnoi vae reta oendu jókuae ñee, jare jei: —Ara ko jɨapu. Ïru reta jei: —Metei araɨgua omomiari.

³⁰ Jayave Jesús jei: —Kuae ñee oyeendu vae mbaetɨ ko chereko pegua, pereko pegua ko.

³¹ Oväe ma ara oñejäa vaerä ɨvɨ pegua reta. Aña, kuae ɨvɨ juvicha oyemombo ma ko.

³² Jare ïru vae reta chereupi yave, aruta opaete ɨvɨ pegua reta chekotɨ.

³³ Kuae jei Jesús, oikuaauka vaerä chupe reta këraita ko omano vae.

³⁴ Jayave jae reta jei Jesús pe: —Mborookuai pe oyekuatía oï vae omombeu oreve Cristo oikoño mai ko. ¿Mbae pa rere jókuae Kuimbaerä oyeapo vae oupita retata ko vae? ¿Kia pa ko jókuae Kuimbaerä oyeapo vae?

³⁵ Jesús jei chupe reta: —Tembipe oimeño pe reta ndive ramboeve peguata tembipe pe, agüɨye vaerä pepokou pɨ̈tu. Echa pɨtumimbi pe oguata vae mbaetɨ oikuaa kerupi ojo.

³⁶ Tembipe oï pe ndive ramboeve, perovia tembipe re, peiko vaerä tembipe pe. Kuae jei ma yave, Jesús ojo chugüi reta, jare okañɨ chugüi reta.

Judío reta güɨroviaä Jesús

³⁷ Yepe tëi Jesús oyapo jeta mɨakañɨ reta jae reta jovake, ërei mbaetɨ güɨrovia reta jese,

³⁸ oyembopo vaerä ñeemombeúa Isaías jei yave: “CheYa, ¿kia pa güɨrovia romombeu vae? ¿Kia pe pa reikuaauka ndembaepuere?”

³⁹ Jáeramo jae reta mbaetɨ güɨrovia. Echa Isaías jei vi körai:

⁴⁰ “Tumpa oesaöva reta jare ombopɨa täta, agüɨye vaerä oecha kavi reta jare agüɨye vaerä oikuaa kavi reta, jare agüɨye vaerä oyepoepɨ reta. Echa oyepoepɨ reta yave, Tumpa ombogüerata.”

⁴¹ Isaías kuae jei, oecha yave Tumpa iyemboetea. Jáeramo imiari jökorai jese.

⁴² Ërei jeseve jeta mburuvicha reta güɨrovia Jesús re. Ërei mbaetɨ omboyekuaa reta fariseo reta jeko pegua, agüɨye vaerä oyemombouka reta judío reta itupao güi.

⁴³ Echa jae reta oaɨu yae kuimbae reta iporombotuichaño Tumpa iporombotuicha güi.

Jesús iñee reta ojäata ɨvɨ pegua reta

⁴⁴ Jayave Jesús iñeeäta reve jei: “Cheré güɨrovia vae, mbaetɨ ko chereño güɨrovia. Güɨrovia ko chembou vae re.

⁴⁵ Chereecha vae, oecha vi chembou vae.

⁴⁶ Ayu ɨvɨ pe amee vaerä tembipe ɨvɨ pegua reta pe, agüɨye vaerä cheré güɨrovia vae oiko pɨtumimbi pe.

⁴⁷ Cheñee re oyeapɨsaka vae mbaetɨ oyapo yave, che ngaraa ajäa. Echa mbaetɨ ayu ajäa vaerä ɨvɨ pegua reta, ayu ko amboasa vaerä.

⁴⁸ Jókuae chereröɨro jare mbaetɨ oyapo che jae chupe vae, oñejäata ko. Echa ara taɨkuegua pe kuae ñee jae vae ojäata ko.

⁴⁹ Echa mbaetɨ chemiari cheyeugüi aeño, cheRu chembou vae ko cheokuai mbae jae vaerä jare kërai chemiari vaerä.

⁵⁰ Jare aikuaa cheRu cheokuai vae tekove opambae vae pegua ko. Jáeramo che jae peve vae cheRu cheokuai vae ko.”