San Juan 11 - Biblia Guarani Tumpa Iñee

Lázaro imano

¹ Metei kuimbae Betania pegua Lázaro jee vae imbaerasɨ oï. Jae ko María jare Marta jëta.

² Kuae María jae ko Lázaro jeindɨ, jae ko opɨyere mbae ikäti kavi vae yandeYa ipɨ re jare omotini ia pe vae.

³ Jare Lázaro jeindɨ reta omondo omombeu Jesús pe, körai: —OreYa, ko imbaerasɨ oï kuae reaɨu vae.

⁴ Jesús kuae oikuaa yave, jei: —Kuae mbaerasɨ mano peguaä ko, Tumpa oyemboeteuka vaerä ko. Jare Tumpa Taɨ oyemboeteuka vaerä.

⁵ Jesús oaɨu Marta, ipɨkɨɨ jare ikɨvɨ Lázaro.

⁶ Ërei oikuaa ma Lázaro imbaerasɨ oï vae yave, opɨtaño jókuae oïa pe mókoi ara ye.

⁷ Kuae jaɨkue rupi jei jemimboe reta pe: —Yaja ye mo Judea pe.

⁸ Jare jemimboe reta jei chupe: —Oporomboe vae, ndei ko mbovɨ ara judío reta oipota ndeapi ndeyuka ita pe, ¿maera pa reo yeta jokotɨ?

⁹ Jesús jei chupe reta: —Ara, doce ora ko güɨnoi. Ara rupi oguata vae ngaraa ipɨ̈sa-yeyuka. Echa güɨnoi tembipe kuae ɨvɨ pegua.

¹⁰ Ërei pɨ̈tu yave oguata vae ipɨ̈sa-yeyuka. Echa mbaetɨ güɨnoi tembipe.

¹¹ Jökorai jei Jesús. Jayave jei ye chupe reta: —Yandevɨa-ïru Lázaro oke ma oï. Ërei che ajata amomba.

¹² Jemimboe reta jei: —OreYa, oke oï yave, okuera yeta ko.

¹³ Ërei Jesús jei vae ko Lázaro imano re. Jae reta ipɨa pe yepe oyemongeta oputuuño oke vae.

¹⁴ Jayave Jesús omombeu kavi chupe reta: —Lázaro omano,

¹⁵ jare ayerovia peve mbaetɨ joko pe aï vae re. Echa peroviata ko. Yaja mo ikotɨ.

¹⁶ Jayave Tomás jae ko chaguakiri pe oyembojee vae jei iñeïru temimboe reta pe: —Yaja vi yande, ñamano vaerä jae ndive.

Jesús ko, jae tekove jare oporomoingove vae

¹⁷ Jesús ou oväe yave, irundɨ ara ma yepe Lázaro oï tɨvɨa pe.

¹⁸ Betania köiño oï Jerusalén güi. Oupitɨ mboapɨ kilómetro rupi.

¹⁹ Jare jeta judío reta yogüeru Marta jare María pɨri, ombopɨakatu vaerä ikɨvɨ imano re.

²⁰ Jare Marta oikuaa Jesús oväe ma ou yave, ojo oövaiti. Ërei María opɨta jo pe.

²¹ Jayave Marta jei Jesús pe: —CheYa, nde kuae pe reï yave, ngaraa tëi ko omano chekɨvɨ.

²² Ërei añave aikuaa oipotagüe mbae re reyerure Tumpa pe vae, omeeta ko ndeve.

²³ Jesús jei chupe: —Ndekɨvɨ oikove yeta ko.

²⁴ Marta jei: —Aikuaa oikove yeta ko. Ara taɨkuegua ete pe oikove yeta vae reta ndive.

²⁵ Jesús jei chupe: —Che ko oporomoingove vae jare tekove omee vae. Cheré güɨrovia vae, yepe tëi omano oï, oikove yeta ko.

²⁶ Jare opaete oikove vɨteri vae cheré güɨrovia vae, ngaraa etei omano. ¿Rerovia pa kuae?

²⁷ Marta jei chupe: —Arovia, cheYa. Añave arovia nde ko jae Cristo, Tumpa Taɨ, reyu kuae ɨvɨ pe vae.

Jesús oyaeo Lázaro jɨvɨa jóvai

²⁸ Marta kuae jei ma yave, ojo oenɨi ipɨkɨɨ María, jei vɨari chupe: —Oporomboe vae ou oväe. Jae nereenɨi.

²⁹ María kuae oendu yave, jarembae voi opüa ojo Jesús oïa pe.

³⁰ Echa ndei oike tëta raɨ pe, Marta oövaitía peño opɨta.

³¹ Jayave judío reta yogüeru ombopɨakatu vaerä vae oecha María jarembae pegua opüa oë ojo yave, yogüɨraja jaɨkue, jei reve: “Tɨvɨa kotɨ ko ojo oyaeo vaerä.”

³² Jare María ojo oväe Jesús oïa pe, oecha rupive ojo oyetavatɨka jae jóvai jare jei: —CheYa, nde kuae pe reï yave, ngaraa tëi ko omano chekɨvɨ.

³³ Jayave Jesús oecha María jare judío reta yogüeru jae ndive vae reta oyaeo vi yave, ipɨatɨtɨ yae,

³⁴ jare oparandu: —¿Kia pe pa peñono? Jei reta chupe: —OreYa, eyu emae jese.

³⁵ Jayave Jesús oyaeo.

³⁶ Jayave judío reta jei: —Mase, oaɨu yae yepe.

³⁷ Ërei amogüe vae jei: —Kuae ombogüera jesambae vae, ¿ipuereä ra oyapo mbae agüɨye vaerä tëi omano Lázaro?

Lázaro oikove ye

³⁸ Jesús ipɨatɨtɨ yae. Jare oya tɨvɨa re. Jókuae tɨvɨa ko ɨ̈vavira oyeyoo vae jare ita tuicha vae güɨnoi jöke re.

³⁹ Jayave Jesús jei: —Pembosɨrɨ ita joko güi. Marta, jókuae kuimbae omano vae jeindɨ jei chupe: —CheYa, iine ma ko. Echa irundɨ ara ma ko omano.

⁴⁰ Jesús jei chupe: —Amombeu ma ndeve rerovia yave, reechata Tumpa iyemboetea.

⁴¹ Jayave ombosɨrɨ reta ita tɨvɨa jöke güi. Jare Jesús omae ara kotɨ jare jei: —CheRu, amee yasoropai ndeve, nde reendu cheve vae re.

⁴² Aikuaa ko reendu avei cheve, ërei jae körai, kuae cheɨpɨ rupi jeta ñogüɨnoi vae reta oikuaa vaerä, güɨrovia vaerä nde ko chembou vae.

⁴³ Jayave iñeeäta, jei: —¡Lázaro, eë joko güi!

⁴⁴ Jare jókuae tëogüe oë. Ipo jare ipɨ oyeokua tarapo pe, jare jova oñeoma nieso pe. Jayave Jesús jei chupe reta: —Peyora. Pemaeño tojo.

Oyomboemboe reta oyuka vaerä Jesús

⁴⁵ Jayave, jeta judío yogüeru omoïru María vae reta oecha Jesús oyapo vae yave, güɨrovia jese.

⁴⁶ Ërei amogüe yogüɨraja fariseo reta pe omombeu Jesús oyapo vae.

⁴⁷ Jayave sacerdote reta itenondegua reta jare fariseo reta omboatɨ opaete mburuvicha reta, jare jei reta: —¿Mbae pa yayapota? Kuae kuimbae jekuae ñoi oyapo jeta mɨakañɨ reta.

⁴⁸ Echa ñamaeño jese yave, opaete vae reta güɨroviata jese. Jayave Romaɨgua reta yogüeruta ombosururu yandetupao jare opata omboai ñanerëtaguasu.

⁴⁹ Ërei chugüi reta metei Caifás jee vae, jae ko sacerdote tenondegua ete jókuae año, jei chupe reta: —Pe reta mbaetɨ etei peikuaa mbae.

⁵⁰ Echa ikavita ko yandeve metei kuimbae omano vaerä opaete vae reta jekovia pe, opaetei tëtaguasu oyemboai vaerägüe.

⁵¹ Kuae iyeugüi aeñoä jei. Echa jae sacerdote tenondegua ko jókuae año ramo, omoërakua Jesús omanota ko opaete judío reta jekovia pe vae.

⁵² Ërei mbaetɨta omano judío reta reño. Omanota omboatɨ vaerä opaete Tumpa taɨ oñemoai ñogüɨnoi vae.

⁵³ Jökorai jókuae ara güive oeka reta kërai oyuka vaerä Jesús.

⁵⁴ Jáeramo Jesús mbaetɨ ma opɨta Judea pe, agüɨye vaerä judío reta oecha. Ojo joko güi metei tëta guasu Efraín jee vae pe. Jókuae tëta guasu oï ñuu iyɨpɨ pe. Joko pe opɨta jemimboe reta ndive.

⁵⁵ Jare köiño ma ou judío reta iarete Pascua, jare joko güi jeta judío reta yogüɨraja Jerusalén pe ndei Pascua mbove, oyetɨo reta vaerä Tumpa jóvai arete peguarä.

⁵⁶ Jare oeka tëi reta Jesús, tupao pe ñogüɨnoi ramboeve jei reta oyoupe: —¿Mbae pa pere? ¿Mbaetɨta ra ou kuae aretea pe?

⁵⁷ Echa sacerdote reta itenondegua reta jare fariseo reta oyókuai ma opaete vae, oime yave kia oikuaa kia pe Jesús oï vae, omombeu vaerä, oipɨɨ reta vaerä.