San Juan 10 - Biblia Guarani Tumpa Iñee

Jesús ombojaanga vecharókai re vae

¹ Jesús jei: “Añetete che jae peve, mbaetɨ oike vecharókai jöke rupi vae, ërei ïkotɨa rupii oike vae, imonda vae ko.

² Ërei vecharókai jöke rupi kavi oike vae, vecha reta iyangarekoa ko.

³ Jare vecha iyangarekoa oipota oike yave, öke järoa oipea chupe. Jare vecha reta oendu iyangarekoa iñee. Echa iyangarekoa oenɨi vecha reta jee rupi jare güɨnoe vecharókai güi.

⁴ Jare güɨraja yave opaete imbae reta vecharókai güi, jae oguata tenonde vecha reta pe jare yogüɨraja jaɨkue. Echa oikuaa iñee.

⁵ Ërei ngaraa yogüɨraja ambuae vae jaɨkue. Osɨi retata chugüi. Echa mbaetɨ oikuaa iñee.”

⁶ Kuae ñee ombojaanga vae rupi Jesús omboe reta tëi, ërei jae reta mbaetɨ oikuaa mbae re ra imiari chupe reta vae.

Jesús, vecha iyangarekoa ikavi vae

⁷ Jesús jei chupe reta: “Añetete che jae peve, che ko jae vecharókai jöke rami.

⁸ Opaete yogüeru ndei ayu mbove vae imonda vae reta ko. Ërei vecha reta oyapoä jókuae reta jei vae.

⁹ Che ko jae öke. Che rupi oike vae oyemboasaukata ko. Oiketa jare oëta jare oväeta mbae jou vaerä.

¹⁰ Imonda vae ou ko oñomi vaerä, oyuka vaerä jare omokañɨtei vaerä. Ërei che ayu ko amee vaerä tekove, jare oime avei vaerä tekove katu.

¹¹ Che ko jae vecha reta iyangarekoa ikavi vae. Vecha reta iyangarekoa ikavi vae omano vecha reta oepɨ vaerä.

¹² Ërei korepoti re vecha reta re oyangareko vae, oecha yave aguarayaɨmba ou, oeya vecha reta jare otekuarai. Echa vecha reta iyangarekoa ikavimbae ko, jare vecha reta imbaeä vi. Jare aguarayaɨmba ou oipɨɨ amogüe vecha reta, jare ïru vecha reta opa oñemoai.

¹³ Jókuae kuimbae otekuarai jepɨ reño oyangareko vecha reta re ramo. Mbaetɨ ipɨatɨtɨ vecha reta re.

¹⁴ Che ko jae vecha reta iyangarekoa ikavi vae. Aikuaa chevecha reta jare chevecha reta chekuaa vi.

¹⁵ Jökorai CheRu chekuaa jare che aikuaa vi. Jare che amee cherekove vecha reta re.

¹⁶ Oime vi anoi ïru vecha reta kuae peguambae vae reta. Ërei jae reta aruta vi jare oendu retata vi cheñee. Jayave oimeta metei atɨño jare meteiño vecha reta iyangarekoa.

¹⁷ Jáeramo cheRu cheraɨu, echa amee cherekove, aikove ye vaerä.

¹⁸ Mbaetɨ kia ipuere oekɨ chegüi cherekove. Ameeta che aipota ramo. Anoi mbaepuere amee vaerä, jare anoi mbaepuere aikove ye vaerä. Kuae mborookuai cheRu omee cheve.”

¹⁹ Jesús kuae jei ramo, judío reta oyoavɨ iyemongeta reta oyougüi.

²⁰ Jeta chugüi reta jei: —Aña oya jese. Imbokere ma. ¿Maera pa peyeapɨsaka jese?

²¹ Ïru vae reta jei: —Aña oya jese vae mbaetɨ jökorai imiari. ¿Aña ipuere pa ombogüera jesambae vae?

Judío reta güɨröɨro Jesús

²² Iroɨ guasu iara ma Jerusalén pe, jare judío reta oyapo ñogüɨnoi arete, tupao oyemboarete vae iarete.

²³ Jesús oguata tupao pe, korero Salomón jee vae rupi.

²⁴ Jayave judío reta yatɨ Jesús re jare jei reta chupe: —¿Kërai yave pa nemiari kavita oreve, agüɨye vaerä ma orembojopa? Nde ko jae Cristo yave, emombeu kavi voi mo oreve.

²⁵ Jesús jei chupe reta: —Amombeu ma peve, ërei mbaetɨ perovia cheñee. CheRu jee re mbaravɨkɨ ayapo vae ko, oikuaauka kia ko che vae.

²⁶ Ërei mbaetɨ perovia, echa pe reta jaeä ko chevecha. Amombeu ma peve rami.

²⁷ Chevecha reta oendu cheñee. Aikuaa chevecha reta, jare jae reta yogüɨraja cheraɨkue.

²⁸ Jare amee chupe reta tekove opambae vae, jare ngaraa etei omano reta. Ngaraa kia ipuere opɨ̈ro chegüi.

²⁹ CheRu omee ma cheve kuae vecha reta vae, imbaepuere tuicha yae opaete vae güi. Jare ngaraa kia ipuere opɨ̈ro cheRu güi.

³⁰ CheRu jare che meteiño ko.

³¹ Jayave judío reta oipɨɨ ye ita oyapi vaerä tëi Jesús.

³² Jayave Jesús jei chupe reta: —Ayapo ma jeta mbae ikavigüe peróvai cheRu imbaepuere rupi. ¿Mbae nunga vae re pa peipota cheyuka ita pe?

³³ Judío reta jei chupe: —Mbae ikavi vae reyapo vae reä ko royapita ita pe. Ikavimbae rere Tumpa kotɨ vae re ko. Echa nde ko kuimbaeño, ërei rere ndeyeupe nde ko jae Tumpa vae.

³⁴ Jayave Jesús jei chupe reta: —Mborookuai penoi vae pe oyekuatía oï körai: “Pe reta ko jae tumpa reta.”

³⁵ Echa Tumpa iñee ou chupe reta vae pe, jae etei ombojee tumpa reta vae. Jare Tumpa Iñee pe oyekuatía oï vae añete ko.

³⁶ Jayave, ¿maera pa pere cheve: “Nde rere ikavimbae vae Tumpa kotɨ”? Echa jae: “Che ko jae Tumpa Taɨ.” Echa jae ko cheñono tee jare chembou ɨvɨ pe.

³⁷ Mbaetɨ ayapo cheRu iparavɨkɨ yave, agüɨye chererovia.

³⁸ Ërei ayapo ko cheRu iparavɨkɨ yave, yepe tëi mbaetɨ chererovia, ërei perovia ayapogüe reta re, peikuaa vaerä cheRu oï ko che ndive jare che aï ko jae ndive.

³⁹ Jayave judío reta oipota ye tëi oipɨɨ Jesús, ërei jae ojo chugüi reta.

⁴⁰ Jare Jesús ojo ye ɨ̈aka Jordán jovaicho pe, tenonde yave Juan oporombobautisa oïa pe, jare joko pe opɨta.

⁴¹ Jare jeta vae reta yogüeru jae oïa pe, jare jei reta: —Juan mbaetɨ oyapo metei ave mɨakañɨ. Ërei opaete Juan jei kuae kuimbae re vae añete yepe.

⁴² Jare jeta vae güɨrovia Jesús re joko pe.