JOSUÉ 9 - Biblia Guarani Tumpa Iñee

Gabaón pegua reta ipoki oporombotavɨ

¹ Opaete kuae mbaembae oendu yave mburuvicha guasu reta ɨ̈aka Jordán jovaicho pe kuaraɨ oikea kotɨ yogüɨreko vae reta, ɨvɨtɨ guasu rupi, ɨvɨpe kavi rupi jare opaete ïguasu Mediterráneo jembeɨ rupi Líbano jóvai yogüɨreko vae reta, heteo reta, amorreo reta, cananeo reta, ferezeo reta, heveo reta jare jebuseo reta,

² kuae reta oñomoïru oñeraro vaerä Josué jare Israel iñemuña reta ndive.

³ Ërei ngatu Gabaón pegua reta oikuaa Josué oyapo tëta guasu Jericó pe jare Hai pe vae yave,

⁴ oyemongeta reta ombotavɨ vaerä. Oyeapo reta mburuvicha jekovia pe yogüɨraja imiari vae rami, oñono reta imburika re voɨta jɨru indechigüe, vino jɨru mɨmba pire pegua indechigüe, osorogüe jare oyemboyagüe;

⁵ oyemonde reta vi temimonde indechigüe oyemboyagüe pe, jare pɨapaa indechigüe oyemboyagüe pe, jare tape rupi jou reta vaerä güeru iyeupe mbɨyape otinigüe jare jävegüe.

⁶ Jare yogüeru reta Josué pɨri teyupa pe, Gilgal pe, jei reta chupe jare Israel iñemuña reta pe: —Mombɨrɨ güi ko royu. Peyapo ñemoïru ore ndive.

⁷ Jare Israel iñemuña reta jei heveo reta pe: —Güɨramoi pe reta köiño peiko oregüi; ¿këraita pa royapo ñemoïru pe ndive?

⁸ Ërei jae reta jei Josué pe: —Ore, toroiko nde rerea re. Jare Josué jei chupe reta: —¿Kia pa pe reta? ¿Ketɨ güi pa peyu?

⁹ Jare jae reta jei: —Mombɨrɨ güi ko royu peYa Tumpa jërakua yae jeko pegua. Roikuaa opaete jae oyapo Egipto pe vae,

¹⁰ jare opaete oyapo jókuae mókoi mburuvicha guasu reta pe vae, amorreo reta juvicha guasu yogüɨreko ɨ̈aka Jordán jovaicho kotɨ vae pe: Sehón mburuvicha guasu Hesbón pegua pe jare Og mburuvicha guasu Basán pegua pe, Astarot pe oikose vae.

¹¹ Jáeramo, oreruvicha reta jare opaete oreɨvɨ pe yogüɨreko vae jei oreve: “Peraja peyeupe tapeke, tape rupi peu vaerä, jare pekua jae reta ñogüɨnoia pe, pere chupe reta: Ore toroiko nde rerea re. Peyapo ñemoïru ore ndive.”

¹² Kuae mbɨyape tape rupi rou vaerä vae, jakuño ko rogüeru jókuae ara roë orerëta güi yave, mase añave otini jare jäve ma.

¹³ Kuae vino jɨru mɨmba pire pegua, roñoña pɨpe vino yave ipɨau ko, mase, añave osoro ma. Jökoraiño vi kuae oreremimonde reta jare orepɨapaa reta indechi yae ma, mombɨrɨ yae ma roguata jeko pegua.

¹⁴ Jare Israel iñemuña reta oipɨɨ tapeke Gabaón pegua reta güerugüe, ërei mbaetɨ oparandu reta yandeYa pe.

¹⁵ Jayave Josué oyapo ñemoïru mbɨakatu pegua jae reta ndive, agüɨye vaerä oyuka reta; jaeramiño vi oñererökuavee Tumpa jee re, Israel iñemuña mburuvicha reta.

¹⁶ Mboapɨ ara oasa oyapo reta ñemoïru Gabaón pegua reta ndive güire, Israel iñemuña reta oikuaa jókuae kuimbae reta yogüeru vae, köiño yepe yogüɨreko chugüi reta.

¹⁷ Jare Israel iñemuña reta ñogüɨnoe oeka; mboapɨ ara oguata reta yave yogüɨraja oväe jókuae tëta guasu reta pe, jae ko: Gabaón, Cafira, Beerot jare Quiriat-jearim.

¹⁸ Ërei Israel iñemuña reta mbaetɨ oyuka, echa mburuvicha reta oyapo yemongeta Israel iTumpa jee re mbaetɨ vaerä oyuka reta. Jáeramo, Israel iñemuña reta iñeenguru juvicha reta kotɨ,

¹⁹ ërei mburuvicha reta jei chupe reta: —Ore royapo yemongeta yandeYa Israel iTumpa jee re, agüɨye vaerä yayuka; jáeramo añave ngaraa yandepuere mbae yayapo chupe reta.

²⁰ Ñamaeño toikove reta, agüɨye vaerä yandeYa iyarasɨ ou yanderé, yandeYa Tumpa jee re royapo yemongeta jae reta ndive vae jeko pegua.

²¹ Jökorai Israel iñemuña juvicha reta omee mborookuai omaeño vaerä oikove reta, ërei opa oñono reta yepea iyapoarä jare ɨ güɨnoe reta vaerä opaete Israel iñemuña reta pe. Jökorai Israel iñemuña juvicha reta mbaetɨ oipoepɨ jókuae yemongeta oyapo reta vae.

²² Jare Josué oenɨi Gabaón pegua reta, jei chupe reta: —¿Maera pa orembotavɨ, pere: “Mombɨrɨ güi ko royu.” Kuae oreɨpɨ peño peiko reve?

²³ Kuae jeko pegua peikota yepopeyu rupi, peiko aveita tembiokuairä. Peyapota yepea, ɨ penoeta cheTumpa jo pe oyeporu vaerä.

²⁴ Jare Gabaón pegua reta jei Josué pe: —Royapo ko kuae, echa rokɨɨye yae nde opata oreyuka vae güi, echa jërakua oreve, peYa Tumpa oyókuai jembiokuai Moisés, omee vaerä peve opaete kuae ɨvɨ jare pemokañɨtei vaerä opaete kuae ɨvɨ pe yogüɨreko vae reta.

²⁵ Añave, ko roï ndepo pe; eyapo oreve ndeve ikavi vae, jupi ndeve vae.

²⁶ Jare Josué oyapo jökorai Gabaón pegua reta pe; omboasayepe Israel iñemuña reta güi, mbaetɨ omaeño Israel iñemuña reta oyuka vaerä Gabaón pegua reta,

²⁷ ërei opa oñono reta yepea iyapoarä, ɨ güɨnoe reta vaerä opaete Israel iñemuña reta pe, jare yandeYa pe mɨmba oyeyuka oyeapɨ jese vae pe oyeporu vaerä, jae oiparavota vae pe. Añave rupi jekuaeño Gabaón pegua reta oyapo jókuae mbaravɨkɨ.