JOSUÉ 7 - Biblia Guarani Tumpa Iñee

Acán iyoa

¹ Ërei Israel iñemuña reta ombaeyavɨ yandeYa iyepopeyu oï jese vae rupi; echa Acán, Carmi taɨ, Zabdi jɨmɨmino, Zera jɨmɨmino yoapɨ ye, Judá iñemuña pegua, oipɨɨ iyeupe yandeYa iyepopeyu pe oï vae. Jáeramo yandeYa iyarasɨ Israel iñemuña reta kotɨ.

Mbaeyoa jeko pegua Israel iñemuña reta ñamɨri

² Jaɨkue rupi Josué omondo kuimbae reta Jericó güi tëta Hai, Bet-avén iyɨpɨ pe oï vae pe, Bet-el güi kuaraɨ oëa kotɨ; jei chupe reta yogüɨraja vaerä omae jókuae ɨvɨ re. Jare jae reta opa yogüɨraja omae tëta Hai re.

³ Jare oyerova reta ye yave jei reta Josué pe: “Agüɨye toyogüɨraja opaete vae, jaeño ipuere yogüɨraja dos mil ani tres mil kuimbae reta, opïro retata ko tëta Hai; agüɨye emoambekoiño opaete vae yogüɨraja vaerä jokotɨ, echa mbovɨ yae ko joko pegua reta.”

⁴ Jökorai oyeupi reta jokotɨ opaete vae güi tres mil kuimbae. Ërei kuae reta opa oyembotekuaraiuka Hai pegua reta pe.

⁵ Jare Hai pegua reta oyuka Israel iñemuña reta güi treinta y seis rupi, jare omoña reta tëta jöke güive Sebarim kotɨ, jare omoamɨri reta yagüeyɨa pe. Jókuae jeko pegua opaete Israel iñemuña reta ipɨatɨtɨ yae jare ipɨa kɨɨye reta.

⁶ Jayave Josué jare Israel iñemuña itenondegua reta, omondoro jemimonde jare oñono reta ɨvɨkúi iñäka re ipɨatɨtɨ güi; javoi oyetavatɨka reta itindɨasɨ ɨvɨ re yandeYa ikäjou jóvai, ojoi kaaru chupe reta regua.

⁷ Jare Josué jei: —¡CheYa Tumpa! ¿Maera pa reroasa kuae tëta ɨ̈aka Jordán? ¿Amorreo reta pe oremee vaerä pa, opa oremokañɨtei vaerä pa? ¡Ropɨtañota tëi yepe ɨ̈aka Jordán jovaicho pe!

⁸ ¡CheYa! ¿Mbae pa jaeta? Echa Israel iñemuña reta opa otekuarai jovaicho reta güi.

⁹ Echa cananeo reta jare opaete kuae ɨvɨ ipo reta oendu yave kuae, yatɨta oreöva, jare opaeteita oremokañɨtei reta. Jökorai yave, ¿mbae pa nde reyapota nderee tuicha yae vae pe?

¹⁰ Jare yandeYa jei Josué pe: —Epüa. ¿Maera pa jökorai reyetavatɨka ndetindɨasɨ reï?

¹¹ Israel iñemuña reta iyoa, oyavɨ cheporogüɨrökuavee päve che ayókuai reta tëi vae. Oipɨɨ reta mbaembae yepopeyu oï jese vae güi; oñomi reta, yapu reta, jare oñovatu reta imbaembae ipɨte pe.

¹² Jáeramo Israel iñemuña reta ngaraa ipuere oñeraro jovaicho reta ndive, otekuaraiñota jovaicho reta güi; echa oa reta cheyepopeyu pe; ngaraa ye ma aï pe ndive, mbaetɨ yave pemboai peyeugüi yepopeyu oï jese vae, kuae pepɨte pe oï vae.

¹³ Epüa, eñono tee cheve opaete vae, ere chupe reta: “Peñeñono tee Tumpa pe pɨareve peguarä; echa yandeYa, Israel iTumpa jei körai: ‘Pe Israel iñemuña reta, yepopeyu oï jese vae oime penoi; mbaetɨta pepuere peñeraro perovaicho reta ndive, peekɨ regua pepɨte güi jókuae yepopeyu oï jese vae.’ ”

¹⁴ Pɨareve peasa metei ñemuña ñavo rupi; jare jókuae metei ñemuña che aiparavo vae, toasa metei tu ñavo rupi; jare che aiparavo yave jókuae metei tu ñavo güi, toasa jo ñavo rupi; jare jókuae o che aiparavo vae güi, toasa kuimbae ñavo.

¹⁵ Jare jókuae oñeväe jese mbaembae yepopeyu pe oï vae yave, topa toyeapɨ, opaete imbaembae ndive, echa oyavɨ ko cheporogüɨrökuavee päve kotɨ, jare oyapo ikavimbae Israel iñemuña reta ipɨte pe.

Acán isusere

¹⁶ Pɨareve pe Josué opüa ndeimbove yave, jare opa omboatɨ Israel iñemuña reta, ñemuña ñavo rupi; jare oyeparavo Judá iñemuña reta.

¹⁷ Jare Josué oyókuai Judá iñemuña reta oasa vaerä yave, joko güi oyeparavo Zera iñemuña reta; jare Zera jëtara reta güi ma oasa opaete kuimbae reta yave, joko güi oyeparavo Zabdi.

¹⁸ Jare Zabdi iñemuña reta ñavo güi oasa kuimbae reta yave, joko güi oyeparavo Acán, Carmi taɨ, Zabdi jɨmɨmino, Zera jɨmɨmino yoapɨ ye, Judá iñemuña reta güi.

¹⁹ Jayave Josué jei Acán pe: —Cheraɨ, emee mbaemboete yandeYa pe, Israel iTumpa pe, emboete, ere añave cheve mbae ko reyapo vae; agüɨye eikuaku chegüi.

²⁰ Jare Acán jei Josué pe: —Añetete ko cheyoa yandeYa, Israel iTumpa kotɨ. Ayapo vae jae ko:

²¹ Mbaembae reta Jericó pe ñapɨ̈ro vae ipɨte pe aecha metei temimonde Babiloniaɨgua ipöra yae vae, jare dosciento reare korepoti pegua jare oro medio kilo oasa vae, aipota rai amae jese jare aekɨ; oime añomi añono ɨvɨgüɨ pe, cheküaraɨaguakapi pegua mbɨte pe, jare korepoti oime oï igüɨ pe.

²² Jayave Josué omondo kuimbae reta Acán iküaraɨa guakapi pegua pe, kuae reta osɨi yogüɨraja jokotɨ, joko pe oväe reta oñeomi oï vae, jare korepoti oï igüɨ pe.

²³ Güɨnoe reta güeru jókuae küaraɨa guakapi pegua mbɨte güi, güeru reta Josué pe, opaete Israel iñemuña reta ñogüɨnoia pe, jare oñono reta yandeYa jóvai.

²⁴ Jayave Josué jare opaete Israel iñemuña reta ndive oipɨɨ Acán, Zera taɨ, jókuae korepoti, temimonde, oro, jare taɨ reta, tayɨ reta, igüeye reta, imburika reta, ivecha reta, iküaraɨa guakapi pegua jare opaete imbaembae, jare opa güɨraja reta ɨvɨtɨ päu Acor jee vae pe.

²⁵ Jare Josué jei chupe: —¿Maera pa orembosusere? Tandembosusere yandeYa kuae ara. Jare opaete Israel iñemuña reta oyapi ita pe, jare opa oapɨ reta oyuka güire ita pe.

²⁶ Jare omboatɨ reta jese jeta ita, jókuae oimeño añave rupi. Jökorai yandeYa iyarasɨ poi. Kuae jeko pegua jókuae ɨvɨtɨ päu jekuaeño jee Acor, añave rupi.