JOSUÉ 6 - Biblia Guarani Tumpa Iñee

Yemongeta Jericó regua

¹ Tëta guasu Jericó oyeokenda oï, oyeokenda kavi yae oï Israel iñemuña reta jeko pegua; mbaetɨ etei kia ave oike vae ani oë vae.

² Ërei yandeYa jei Josué pe: “Mase, che amee Jericó ndepo pe, jare joko pegua mburuvicha guasu opaete kuimbae ñeraro regua ndive.

³ Opaete kuimbae ñeraro regua reta, peyere tëta guasu re metei vese ara ñavo; ova ara peyapo kuae.

⁴ Jare chiu sacerdote togüɨraja chiu mimbɨ vecha kuimbae-räti pegua Tumpa ikäjou jenonde; jare chiúa ara pe peyere chiu ye tëta guasu re, jare sacerdote reta tomoñee mimbɨ reta.

⁵ Peendu omoñee puku reta mimbɨ vecha kuimbae-räti pegua yave, opaete vae tosapúkai täta, jare tëta guasu ikësea osururuta; jayave opaete vae metei ñavo toyeupi sɨmbi jenonde kotɨ.”

⁶ Jayave Josué Nun taɨ oenɨi sacerdote reta, jare jei chupe reta: “Peraja Tumpa ikäjou morogüɨrökuavee päve pegua, jare chiu sacerdote togüɨraja mimbɨ vecha kuimbae-räti pegua yandeYa ikäjou jenonde.”

⁷ Jare opaete vae pe jei: “Pekua peyere tëta guasu re; tembiporu ñeraro pegua güɨnoi vae reta, toyogüɨraja yandeYa ikäjou jenonde.”

⁸ Jökorai Josué opa ma imiari opaete vae pe yave, jókuae chiu sacerdote güɨraja chiu mimbɨ vecha kuimbae-räti pegua yandeYa ikäjou jenonde, jare omoñee reta mimbɨ; jare yandeYa ikäjou oyereraja jae reta jaɨkue.

⁹ Jare tembiporu ñeraro pegua güɨnoi vae reta yogüɨraja sacerdote reta temimbɨ imoñeea jenonde, jare kuimbae taɨkue kotɨ oporoäro vae reta yogüɨraja käjou jaɨkue, temimbɨ oñee ramboeve opɨtambae etei.

¹⁰ Jare Josué oyókuai opaete vae, jei reve: “Pe reta agüɨye pesapúkai, peñee ave agüɨye pemoë; ‘¡pesapúkai!’, jae peve yave ramo, pesapukaita.”

Jericó oyemboai

¹¹ Jayave Josué omondo güɨroyereuka metei vese yandeYa ikäjou tëta guasu re, javoi yogüeru reta ye teyupa pe, joko pe omboasa reta pɨ̈tu.

¹² Pɨareve pe Josué opüa ndeimbove yave, jare sacerdote reta ovoɨ yandeYa ikäjou.

¹³ Jókuae chiu sacerdote reta güɨraja chiu mimbɨ vecha kuimbae-räti pegua yandeYa ikäjou jenonde, oguata reta tenonde omoñee reve temimbɨ. Tembiporu ñeraro pegua güɨnoi vae reta yogüɨraja jae reta jenonde, jare kuimbae taikue kotɨ oporoäro vae reta yogüɨraja yandeYa ikäjou jaɨkue, temimbɨ oñee ramboeve opɨtambae etei.

¹⁴ Jökorai oyere reta ye tëta guasu re mokoía ara pe, jare oyerova reta ye teyupa pe; körai oyapo reta ova ara rupi.

¹⁵ Jare chiúa ara pe opüa reta ndeimboveasɨ, jare oyere reta tëta guasu re tenonde yave oyapo reta rami; jókuae ara oyere reta jese chiu ye.

¹⁶ Sacerdote reta chiúa ma omoñee reta temimbɨ yave, Josué jei opaete vae pe: “¡Pesapúkai! Echa yandeYa omee ma peve kuae tëta guasu.

¹⁷ Kuae tëta guasu, yandeYa oñono tee kañɨtei peguarä, opaete mbaembae oï pɨpe vae ndive; jaeño Rahab iyaguasa pota vae oikoveta opaete jo pe ñogüɨnoi vae ndive, echa yambou omae vae reta omoñemi.

¹⁸ Ërei pe reta peyeandu jókuae kañɨtei peguarä oï vae güi; agüɨye peyavɨkɨ, agüɨye etei peupi peyeupe mbae yepe jókuae güi, echa güɨramoi peñonoukata vi Israel iñemuña reta jeyupa Tumpa iyepopeyu pe, jare pembosusereuka.

¹⁹ Ërei opaete korepoti, oro, tembiporu jiero iyu vae pegua, jare jiero pegua, toñeñono tee yandeYa peguarä, jare toike yandeYa jo pe mbaembae jepɨ vae oñeñovatúa pe.”

²⁰ Jayave opaete vae osapúkai, jare sacerdote reta omoñee mimbɨ reta; jare opaete vae oendu yave mimbɨ ñee, osapúkai reta täta, jare tëta guasu ikësea osururu. Jayave opaete vae oyeupi tëta guasu re, metei ñavo vae oyeupi sɨmbi jenonde kotɨ, jare opïro reta.

²¹ Jare opaetei oyuka reta kɨsepuku pe tëta guasu pe ñogüɨnoi vae: Kuimbae reta, kuña reta, taɨrusu vae reta jare ndechi reta, güeye reta ave, vecha reta, jare mburika reta.

²² Ërei Josué jei jókuae mókoi kuimbae reta opa yogüɨraja omae ɨvɨ re vae pe: “Peike jókuae kuña iyaguasa pota vae jo pe jare penoe joko güi jókuae kuña jare opaete imbae vae reta, pe perökuavee Tumpa jee re chupe rami.”

²³ Jayave oporopïaro vae reta oike jare güɨnoe Rahab, jare tu, ichɨ, ikɨvɨ reta, jare opaete imbae vae reta; güɨnoe reta vi opaete jëtara, jare oñono reta Israel iñemuña reta jeyupa güi ikatu pe.

²⁴ Javoi oapɨ reta jókuae tëta guasu opaete pɨpegua ndive; jaeño oñono reta yandeYa jo pe mbaembae jepɨ vae oñeñovatúa pe korepoti, oro, tembiporu reta jiero iyu vae pegua jare jiero pegua.

²⁵ Ërei Josué güɨroasayepe Rahab iyaguasa pota vae jekove jare opaete tu jo pegua reta, jare opaete jae imbae vae reta; Josué omondo Jericó re omae vae reta omoñemi jeko pegua. Jayave güive añave rupi Rahab iñemuña reta yogüɨreko Israel iñemuña reta ipɨte pe.

²⁶ Jókuae ara rupi Josué oyepopeyu Tumpa jee re, jei reve: “YandeYa iyepopeyu toa jókuae kuimbae omopüa pɨau ye kuae tëta Jericó vae, taɨrɨpɨ tomano chugüi tëta iguapɨa omopüa oï yave jare taɨ taɨkuegua tom ano chugüi jöke oñono oï yave.”

²⁷ YandeYa oiko Josué ndive, jare jee jërakua opaete ɨvɨ rupi.