JOSUÉ 5 - Biblia Guarani Tumpa Iñee

Teyupa Gilgal pe

¹ Opaete mburuvicha guasu, amorreo reta juvicha reta ɨ̈aka Jordán güi kuaraɨ oikea kotɨ ñogüɨnoi vae reta jare opaete mburuvicha guasu Canaán pegua reta, köiño yogüɨreko ɨguasu güi vae reta oendu kërai yandeYa opa omondɨpa ɨ̈aka Jordán Israel iñemuña reta opa oasa regua yave, okɨɨye yae reta, mbaetɨ oñemokɨ̈reɨ reta oñeraro vaerä Israel iñemuña reta ndive.

² Jókuae ara rupi yandeYa jei Josué pe: “Eimbee ndekɨserä ita reta jare embocircuncida ye Israel iñemuña reta.”

³ Jare Josué oimbee kɨserä ita reta jare ombocircuncida Israel iñemuña reta ɨvɨtɨ Aralot pe.

⁴ Ombocircuncida reta, echa opaete kuimbae reta Egipto güi ñogüɨnoe yave ipuere ma ñeraro pe vae reta opa omano tape rupi, ñuu rupi.

⁵ Echa opaete Egipto güi ñogüɨnoe vae oyembocircuncida ko; ërei taɨkue, tape rupi, ñuu rupi oa vae reta mbaetɨ oyembocircuncida.

⁶ Echa Israel iñemuña reta oguata yogüɨreko ñuu rupi cuarenta año, opaete kuimbae ñeraro regua opa ma omano regua, yandeYa iñee mbaetɨ güɨrovia reta jeko pegua; jáeramo yandeYa jee re ae jei chupe reta, mbaetɨta oechauka chupe reta iñemuñagüe reta pe jae güɨrökuavee jee re ae ɨvɨ omee vaerä vae, ɨvɨ ikavi yae vae.

⁷ Jókuae jeko pegua Josué ombocircuncida jókuae kuimbae taɨ reta, yandeYa oiparavo jókuae kuimbae reta jekoviarä vae reta; echa mbaetɨ oyembocircuncida reta oguata reta ñuu rupi yogüɨreko yave.

⁸ Opa ma oyembocircuncida reta yave, opɨta reta jókuae ñogüɨnoia peño teyupa pe, opa okuera reta regua.

⁹ Jare yandeYa jei Josué pe: “Kuae rupi ambosɨrɨ pegüi Egiptoɨgua reta opuka omae peré vae.” Kuae jeko pegua jee Gilgal añave rupi.

¹⁰ Israel iñemuña reta oyembojeyupa Gilgal pe, jare oyapo reta arete Pascua jókuae yasɨ ara catorce pe, kaaru yave, ɨvɨpe kavi Jericó pe.

¹¹ Arete Pascua güi pɨareve pe jou reta temitɨ iagüe; mbɨyape ovumbae jare trigo oyeimbegüe, jókuae ara voi jou reta vi mbaagüɨye ipɨau vae oyeimbegüe.

¹² Arete Pascua güi pɨareve pe mbaetɨ ye ma oyekuaa maná, temitɨ iagüe omboɨpɨ jou reta güire; Israel iñemuña reta mbaetɨ ye ma oecha maná, ërei jou reta Canaán pegua temitɨ iagüe jókuae año.

Josué jare kuimbae güɨnoi ipo pe kɨsepuku vae

¹³ Metei ara Josué köiño oiko Jericó güi yave, oecha metei kuimbae ói jenonde kɨsepuku güɨnoi ipo pe vae. Jare Josué ojo ikotɨ, jare jei chupe: —¿Oreïru pa nde, ani orerovaicho pa nde?

¹⁴ Jókuae kuimbae jei chupe: —Mbaetɨ metei peguarä ave; yandeYa isundaro reta Juvicha ko ayu añave. Jayave Josué oyetavatɨka jare itindɨasɨ ɨvɨ re omboete, jare jei chupe: —¿Mbae pa rereta cheve cheYa, che nderembiokuai pe?

¹⁵ Jare yandeYa isundaro reta Juvicha jei Josué pe: —Eekɨ ndepɨapaa ndepɨ güi, echa kuae reïa Tumpa pe oñeñono tee vae ko. Jare Josué jökorai oyapo.