JOSUÉ 24 - Biblia Guarani Tumpa Iñee

Josué iyupavo

¹ Josué omboatɨ opaete Israel iñemuña reta Siquem pe, oenɨi mburuvicha reta, tenondegua reta, oporojäa vae reta, jare kuimbae ñeraro regua juvicha reta jare oñeñono reta Tumpa jóvai.

² Jare Josué jei opaete vae pe: —Körai jei yandeYa, Israel iTumpa: “Arakae ete, peñemuñagüe Taré, Abraham jare Nacor tu, yogüɨrekose ɨ̈aka Éufrates jembeɨ pe; jare omboetese reta yepi tumpa ambuae.

³ Che ko aru peñemuñagüe Abraham, jókuae ɨ̈aka Éufrates jembeɨ güi jare amboguatauka opaete ɨvɨ Canaán rupi. Jare amee jeta oñemuña vaerä, tenonde amee chupe taɨ Isaac,

⁴ jare Isaac pe amee mókoi taɨrä, Jacob jare Esaú. Esaú pe amee ɨvɨtɨ Seir oiko vaerä joko pe, ërei Jacob jare taɨ reta opa yogüɨraja Egipto pe.

⁵ Jayave amondo Moisés jare Aarón, jare aiporarauka Egiptoɨgua reta, opa pogüɨnoe joko güi regua.

⁶ Peñemuñagüe reta anoe Egipto güi yave, Egiptoɨgua reta oaɨkuemoña Ɨguasu Pɨ̈ta vae kotɨ, ikäretou ñeraro pegua reta pe jare kavayu regua reta ndive.

⁷ Jare jae reta oyerure cheve yave, che ambopɨtumimbi jae reta jaɨkue kotɨ, Egiptoɨgua reta jenonde, jare ɨguasu pe opa ayasoi Egiptoɨgua reta. Peñemuñagüe reta oecha Egipto pegua reta pe ayapo vae. Jaɨkue rupi pe reta peiko ɨma año ñuu rupi,

⁸ jare che pogüeru amorreo reta iɨvɨ pe, ɨ̈aka Jordán güi kuaraɨ oëa kotɨ. Jae reta oñeraro pe ndive, ërei che amee pepo pe, che amokañɨtei perenonde jare peyemombae jókuae ɨvɨ re.

⁹ Joko güi opüa Balac, Zipor taɨ, Moab iñemuña reta juvicha guasu, jare oñeraro pe reta ndive. Balac omondo oekauka Balaam, Beor taɨ, oyepopeyu vaerä pekotɨ.

¹⁰ Ërei che mbaetɨ amaeño Balaam oyepopeyu vaerä pekotɨ jare jei ñee kavi pekotɨ. Jökorai pogüɨroasayepe jae reta ipo güi.

¹¹ Jare peasa ɨ̈aka Jordán jare peyu Jericó pe. Jericó pe yogüɨreko vae reta oñeraro pe ndive: Amorreo reta, ferezeo reta, cananeo reta, heteo reta, gergeseo reta, heveo reta jare jebuseo reta, ërei che amee pepo pe opa pemoamɨri vaerä.

¹² Jare mókoi mburuvicha guasu reta, amorreo reta juvicha guasu mbaetɨ pe reta pemoamɨri kɨsepuku pe ani uvɨ pe, echa che ambou kɨɨye yavaetegüe perenonde, jae reta opa vaerä otekuarai pegüi ndei peväe joko pe mbove.

¹³ Che amee peve ɨvɨ, pe mbaetɨ peparavɨkɨ pɨpe vae jare tëta guasu reta, pe mbaetɨ pemopüa vae, añave peiko pɨpe vae jare peu uva jare ɨvɨra olivo iagüe, pe mbaetɨ peñotɨ vae.”

¹⁴ Añave, pemboete yandeYa, peyeokuai chupe jupi rupi jare mboromboete rupi. Pemombo peyeugüi tumpa ambuae reta peñemuñagüe reta oyeokuai chupe ɨ̈aka Eufrates jovaicho kotɨ vae, jare Egipto pe vae, jare peyeokuai yandeYa pe.

¹⁵ Ërei mbaetɨ peipota peyeokuai yandeYa pe yave, peiparavo peyeupe kia pe peyeokuai vaerä; tumpa reta, peñemuñagüe reta oyeokuai ɨ̈aka Éufrates jembeɨ pe yogüɨreko yave vae pe, ani amorreo reta kuae ɨvɨ pe yogüɨreko vae reta itumpa pe. Ërei che jare chero pegua reta ndive royeokuaita yandeYa peño.

¹⁶ Jayave opaete vae jei: —¡Ngaraa romboete ïru tumpa reta yandeYa güi!

¹⁷ Echa yandeYa Tumpa ko orerenoe jare oreñemuñagüe reta ɨvɨ Egipto güi, yeokuaiasɨ katu güi, jeta mɨakañɨ tuichagüe yae ete oyapo oreróvai, oreangareko tape rupi, jare orereepɨ roasa yave jeta tëta reta ipɨte rupi.

¹⁸ YandeYa ko güɨnoe omombo orerenonde güi opaete tëta reta, jare amorreo reta kuae ɨvɨ pe yogüɨreko vae. Ore royeokuaita vi yandeYa pe, echa jae ko oreTumpa.

¹⁹ Ërei Josué jei chupe reta: —Ngaraa pepuere peyeokuai yandeYa pe, echa jae ko Tumpa Iyoambae jare jägüɨro jembiparavo re vae; ngaraa güɨropɨa pepɨapochɨ reta jare peyoa reta.

²⁰ Pe pesɨrɨ yave yandeYa güi jare peyeokuai yave tumpa ambuae reta pe, jae oyapota ikavimbae vae peve jare opata pemokañɨtei jeta ma ikavi vae oyapo peve tëi reve.

²¹ Jayave opaete vae jei Josué pe: —Mbaetɨ ko jökorai. Ore royeokuaita ko yandeYa peño.

²² Jayave Josué jei opaete vae pe: —Pe retaño ko peikuaa peï, jókuae peiparavo yandeYa pe peyeokuai vaerä vae. Jare jae reta jei: —Jökoraita ko, ore toroikuaa kuae roe vae re.

²³ Josué jei chupe reta: —Jayave pemombo peyeugüi opaete tumpa ambuae reta pepɨte pe oime penoi vae jare peyerova opaete pepɨa ndive yandeYa Israel iTumpa kotɨ.

²⁴ Jare opaete vae jei Josué pe: —YandeYa Tumpa peño toroyeokuai jare toroyapo jae oreokuai vae.

²⁵ Jayave Josué oyapo morogüɨrökuavee päve opaete vae ndive jókuae ara voi Siquem pe jare omee chupe reta opaete mborookuai reta.

²⁶ Josué oikuatía jókuae ñee reta tupapire pe, Tumpa iporookuai reta oyekuatía ñogüɨnoia pe. Javoi oipɨɨ metei ita tuicha vae jare oñono ɨvɨra encina igüɨ pe, yandeYa iyemboetea iyɨpɨ pe oï vae pe,

²⁷ javoi jei opaete vae pe: —Kuae ita toiko yandemomaendúa vaerä echa oendu rami ko opaete ñee reta yandeYa ñanemomiari vae. Toiko pemomaendúa vaerä, agüɨye vaerä peapu peTumpa pe.

²⁸ Jaɨkue rupi Josué omondo opaete vae metei ñavo iɨvɨ ae ae kotɨ.

Josué imano

²⁹ Kuaekuae oasa güire Josué, Nun taɨ omano, yandeYa jembiokuai, ciento diez año güɨnoi yave.

³⁰ Oñotɨ reta iɨvɨ ae pe, Timnat-sera pe, ɨvɨtɨ Efraín re oï vae pe, ɨvɨtɨ Gaas güi ɨvɨtuguasu kotɨ.

³¹ Israel iñemuña reta oyeokuai yandeYa pe, Josué oikove oiko ramboeve jae reta ndive, jare jaɨkue rupi opaete ndechi reta Josué güi ɨma yogüɨreko vae reta, oikuaa opaete yandeYa oyapo mbaembae Israel iñemuña reta ndive vae.

Israel iñemuña reta oñotɨ José jetegüe

³² Israel iñemuña reta oñotɨ Siquem pe José jetegüe, Egipto güi güeru reta vae, Jacob ogua ɨvɨ Hamor iñemuña reta güi cien reare korepoti pegua pe, Siquem tu güi; jókuae opɨta José iñemuña reta imbaerä.

Eleazar imano

³³ Omano vi Eleazar, Aarón taɨ, jare oñotɨ reta taɨ Finees iɨvɨtɨ re, ɨvɨtɨ Efraín re oñemee chupe reta vae pe.