JOSUÉ 22 - Biblia Guarani Tumpa Iñee

Rubén, Gad jare Manasés iñemuña reta oyemboyaogüe oyerova ye

¹ Jayave Josué omboatɨ Rubén jare Gad ñemuña reta jare Manasés iñemuña reta oyemboyaogüe,

² jare jei chupe reta: “Pe reta peyapo opaete peokuai Moisés yandeYa jembiokuai vae, jare peyapo opaete che poyókuai vae.

³ Mbaetɨ pemombo perëtara reta kuae ɨma año oasa vae rupi añave regua, jare peyapo jupi rupi kavi yandeYa Tumpa iporookuai reta.

⁴ Añave, yandeYa Tumpa omee perëtara reta pe yogüɨreko pɨagüive vaerä, jae güɨrökuavee rami, peyerova ye peteyupa pe, peɨvɨ ae kotɨ, Moisés, yandeYa jembiokuai omee peve ɨ̈aka Jordán jovaicho kotɨ vae pe.

⁵ Jaeño aiporu peve peyeandu reve kavi peyapo mborookuai reta Moisés, yandeYa jembiokuai omee peve vae: Peaɨu yandeYa Tumpa, peguata jae jemimbota rupiño; peñovatu iporookuai reta, jaeño peiko jupi rupi chupe jare peyeokuai chupe opaete pepɨa ndive, añete rupi kavi.”

⁶ Javoi Josué jei ñee kavi chupe reta jare opa omondo, jare jae reta opa yogüɨraja iɨvɨ ae kotɨ.

⁷ Manasés iñemuña reta oyemboyaogüe pe Moisés omee vi yepe ɨvɨ, Basán pe. Ïru Manasés iñemuña reta oyemboyaogüe pe Josué omee ɨvɨ jëtara reta ipɨte pe, ɨ̈aka Jordán güi kuaraɨ oikea kotɨ; jökorai Josué omondo ye kuae ñemuña reta iɨvɨ ae kotɨ, opa ñee kavi jei chupe reta güire.

⁸ Jei chupe reta: “Peyerova ye peɨvɨ ae kotɨ jeta mbaeyekou ndive jare jeta mɨmba ndive, oro, korepoti, jiero iyu vae ndive jare jeta temimonde ndive. Pemboyao perëtara reta pe perovaicho reta güi pepɨ̈rogüe.”

⁹ Jökorai Rubén jare Gad iñemuña reta, jare Manasés iñemuña reta oyemboyaogüe oyerova ye, jökorai osɨrɨ oyougüi ïru ñemuña reta ndive Silo pe Canaán pe oï vae pe, opa vaerä yogüɨraja ɨvɨ oñemee chupea pe Galaad pe, yandeYa oyókuai Moisés omee chupe reta vae pe.

Mɨmba oyeyuka oyeapɨ jese vae ɨ̈aka Jordán jembeɨ pe

¹⁰ Jare yogüeru oväe ɨ̈aka Jordán jembeɨ pe, ɨvɨ Canaán pe vɨteri yave, Rubén jare Gad iñemuña reta, jare Manasés iñemuña reta oyemboyaogüe omopüa joko pe mɨmba oyeyuka oyeapɨ jese vae tuicha vae, ɨ̈aka Jordán jembeɨ pe.

¹¹ Ïru Israel iñemuña reta oendu amogüe jei, Rubén jare Gad iñemuña reta jare Manasés iñemuña reta oyemboyaogüe omopüa mɨmba oyeyuka oyeapɨ jese vae, ɨvɨ Canaán jembeɨ pe, ɨ̈aka Jordán jembeɨ pe, jókuae ïru ñemuña reta iɨvɨ jembeɨ pe;

¹² jare jókuae ɨvɨ pe Israel iñemuña reta ñogüɨnoi vae oendu yave kuae regua, oyomboatɨ opaete vae Silo pe, yogüɨraja vaerä oñeraro jókuae ïru ñemuña reta ndive.

¹³ Tenonde omondo reta Finees sacerdote Eleazar taɨ, Galaad kotɨ, Rubén jare Gad iñemuña reta jare Manasés iñemuña reta oyemboyaogüe ñogüɨnoia kotɨ.

¹⁴ Kuae sacerdote ndive omondo reta vi payandepo Israel iñemuña juvicha reta, yogüɨraja metei ñemuña ñavo jee re, jare jëtara ñavo jee re.

¹⁵ Opaete kuae reta yogüɨraja Galaad kotɨ, Rubén jare Gad iñemuña reta jare Manasés iñemuña reta oyemboyaogüe ñogüɨnoia pe, jare omomiari reta jei reta reve:

¹⁶ —Opaete ore roe yandeYa imbae vae reta jee re körai: ¿Maera pa peyapo jupimbae Israel iTumpa kotɨ? ¿Maera pa pepia jare pemopüa mɨmba oyeyuka oyeapɨ jese vae, pepɨapochɨ yandeYa kotɨ reve?

¹⁷ ¿Mbaetɨño pa jaekavi peve ikavimbae peyapo Peor pe vae? Mbaetɨño yayetɨo kavi ye chugüi vae, ¿kuae jeko peguaä pa ko mbaerasɨ pɨ̈chɨi jeta yae oparapi ti yandeYa jembiparavo reta re?

¹⁸ ¿Jókuae jaekaviño maä pa, pe reta jekuae pesɨrɨ ye vaerä yandeYa güi? Pe reta añave pepɨapochɨ yandeYa kotɨ, pɨareve jae iyarasɨta opaete Israel iñemuña reta kotɨ.

¹⁹ Peɨvɨ re pemae ikɨa vae ko yave, peyu yandeYa iɨvɨ pe, o yemboatɨa yandeYa imbae oïa pe, peyu peiko ore ndive. Ërei agüɨye pepɨapochɨ yandeYa kotɨ jare orekotɨ vi, agüɨye pemopüa peyeupe ïru mɨmba oyeyuka oyeapɨ jese vae yandeYa Tumpa imbae güi.

²⁰ Pemaendúa Acán, Zera taɨ re, iyoa oñeñono tee okañɨtei vaerä vae re opoko yave, kuae jeko pegua ou arasɨ opaete Israel iñemuña reta re. ¡Jókuae kuimbae mbaetɨ jaeño oiporara iyoa re!

²¹ Jayave Rubén jare Gad iñemuña reta jare Manasés iñemuña reta oyemboyaogüe jei Israel iñemuña juvicha reta pe:

²² —YandeYa Tumpa, opaete tumpa reta güi imbaepuere vae oikuaa mbaetɨ ko royapo orepɨapochɨ güi vae ani rosɨrɨ vaerä chugüi. Jae oikuaa jare toikuaauka peve opaete; agüɨye tiñɨ̈ro oreve mbaetɨ ko jaekavi royapo yave.

²³ Kuae mɨmba oyeyuka oyeapɨ jese vae romopüa oreyeupe vae royapo yave rosɨrɨ vaerä yandeYa güi ani romee vaerä jese mɨmba oyeyukagüe opaetei oyeapɨ vae, ani mbota temitɨ jäɨgüe romee jese vaerä ani romee vaerä jese mbota mbɨakatu pegua; jökorai ko yave yandeYa etei toikuaa mbae oyapo vaerä oreve.

²⁴ Kuae royapo ko agüɨye vaerä metei ara peraɨ reta jei oreraɨ reta pe: “¿Mbae pa peeka Israel iTumpa oïa pe?

²⁵ YandeYa oñono ɨvɨ jembeɨrä ɨ̈aka Jordán, roiko tee vaerä pegüi, pe Rubén jare Gad iñemuña reta jare Manasés iñemuña reta oyemboyaogüe; jayave, ¿mbae pa peeka Tumpa oïa pe?” Jökorai peraɨ reta oeyaukata oreraɨ reta pe mboromboete yandeYa kotɨ.

²⁶ Jáeramo royemongeta romopüa vaerä metei mɨmba oyeyuka oyeapɨ jese vae, mbaetɨ mɨmba oyeyukagüe opaetei oyeapɨ vae romee jese vaerä ani mɨmba oyeyukagüe romee jese vaerä.

²⁷ Jae ko yandemomaendúa vaerä jare ñaneñemuña reta peguarä, kërai ore orepuere romboete yandeYa, mɨmba oyeyukagüe opaetei oyeapɨ ndive, jare mɨmba oyeyukagüe mbɨakatu pegua ndive; agüɨye vaerä kuri peraɨ reta jei oreraɨ reta pe: “¿Mbae pa peeka Tumpa oïa pe?”

²⁸ Echa ore royemongeta kia nunga vae jei yave oreve ani oreñemuña reta pe jei yave, orepuere roe chupe reta: “¡Mase! Ñaneñemuñagüe reta omopüa kuae mɨmba oyeyuka oyeapɨ jese vae iä yandeYa imbae rami vae, mbaetɨ ko omopüa reta mɨmba oyeyukagüe opaetei oyeapɨ jese vaerä, ani mɨmba oyeyukagüe oñemee jese vaerä, omopüa reta ko oime vaerä yemomaendúa peve jare oreve.”

²⁹ YandeYa agüɨye tomaeño orepɨapochɨ vaerä ikotɨ ani rosɨrɨ vaerä chugüi, royapo yave mɨmba oyeyuka oyeapɨ jese vae, romee vaerä mɨmba oyeyukagüe opaetei oyeapɨ vae, mbota temitɨ iagüe romee jese vaerä ani mbota oyeyukagüe romee vaerä jese, romopüa yave ïru mɨmba oyeyuka oyeapɨ jese vae yandeYa imbae o yemboatɨa jóvai oï vae güi.

³⁰ Sacerdote Finees jare opaete vae juvicha reta jare Israel iñemuña itenondegua reta jae ndive ñogüɨnoi vae reta oendu yave, Rubén jare Gad iñemuña reta, jare Manasés iñemuña reta oyemboyaogüe jei vae, ikavi yae chupe reta opaete jókuae jei reta vae.

³¹ Jayave Finees sacerdote Eleazar taɨ jei chupe reta: —Añave yaikuaa kavi ma yandeYa oï yande ndive vae, echa kuae peyapo vae mbaetɨ peyapo pepɨapochɨ yandeYa kotɨ jeko pegua. Jökorai añave orereroasayepe yandeYa iporonupa güi.

³² Jare Finees sacerdote Eleazar taɨ jare mburuvicha reta oeya Rubén jare Gad iñemuña reta jare Manasés iñemuña reta oyemboyaogüe, jare opa ye oyerova ɨvɨ Galaad güi ɨvɨ Canaán pe, ïru ñemuña reta ñogüɨnoia pe. Jare imiari reta joko pe ñogüɨnoi vae reta pe, jëtara reta jeigüe.

³³ Ikavi yae kuae yemongeta chupe reta jare omboete reta Tumpa. Jare jókuae güire mbaetɨ ye oyemongeta yogüɨraja vaerä oñeraro Rubén jare Gad iñemuña reta ndive, ani omboai vaerä iɨvɨ chugüi reta.

³⁴ Rubén jare Gad iñemuña reta ombojee jókuae mɨmba oyeyuka oyeapɨ jese vae iä Ed, echa jei reta: “Kuae mɨmba oyeyuka oyeapɨ jese vae toiko yandeve yandemomaendúa vaerä yandeYa jae ko Tumpa vae.”