JOSUÉ 21 - Biblia Guarani Tumpa Iñee

Leví iñemuña reta imbaerä vae tëta guasu reta

^1-2 Leví iñemuña juvicha reta yogüeru omomiari vaerä jëtara sacerdote Eleazar, Josué, Nun taɨ jare Israel iñemuña juvicha reta Silo pe ɨvɨ Canaán pe; jei reta körai: “Moisés rupi, yandeYa oporookuai oñemee vaerä oreve tëta guasu reta, roiko vaerä pɨpe, orerɨmba reta ikaruarä vae ndive.”

³ Jayave Israel iñemuña reta omee iɨvɨ pegua tëta guasu reta mɨmba ikarúa ndive ndive Leví iñemuña reta imbaerä, yandeYa oporookuai rami.

⁴ Leví iñemuña reta pe oñemee tëta guasu yave, oë suerte rupi Coat iñemuña reta pe, jae ko Aarón iñemuña pegua reta; oë chupe reta trece tëta guasu, Judá, Simeón jare Benjamɨ́n iñemuña reta iɨvɨ pe.

⁵ Coat iñemuña ïru vae reta pe oë suerte rupi payandepo tëta guasu, Dan, Efraín jare Manasés iñemuña reta oyemboyaogüe iɨvɨ pe.

⁶ Gersón iñemuña reta pe oë suerte rupi trece tëta guasu, Isacar, Aser, Neftalí jare Manasés iñemuña reta oyemboyaogüe iɨvɨ pe, Basán pe.

⁷ Merari iñemuña reta, jëtara ñavo peguarä oë doce tëta guasu, Rubén, Gad jare Zabulón iñemuña reta iɨvɨ pe.

⁸ Israel iñemuña reta omee suerte rupi Leví iñemuña reta pe tëta guasu reta, mɨmba ikaruarä ndive ndive, yandeYa oporookuai Moisés rupi rami.

⁹ Judá jare Simeón iñemuña reta omee iɨvɨ pegua tëta guasu reta;

¹⁰ kuae tëta guasu reta opɨta Aarón iñemuña reta pe; Aarón jae ko Coat jɨmɨmino, Leví iñemuña pegua; echa chupe reta räri oë suerte oyeapo yave.

¹¹ Judá iñemuña reta iɨvɨ pegua ɨvɨtɨ guasu re omee chupe reta tëta Quiriat-arba, jae ko Hebrón, jare iyɨ́vɨri güɨnoi mɨmba ikaruarä, jae ko tëta guasu tuicha yae vae, Anac kuimbae puku yae vae iñemuña reta imbaegüe.

¹² Ërei jókuae tëta guasu pegua ko reta jare tëta raɨ reta omee reta Caleb, Jefone taɨ pe.

¹³ Jare sacerdote Aarón iñemuña reta pe omee reta tëta guasu Hebrón, mɨmba ikaruarä ndive, ñepɨ̈rokarä oporoyuka vae reta pe; omee reta vi tëta guasu reta: Libna,

¹⁴ Jatir, Estemoa,

¹⁵ Holón, Debir,

¹⁶ Aín, Juta jare Bet-semes. Kuae chau tëta guasu reta mɨmba ikaruarä ndive ndive.

¹⁷ Jare Benjamín iñemuña reta iɨvɨ pe oñemee chupe reta: Gabaón, Geba,

¹⁸ Anatot jare Almón; irundɨ tëta guasu, mɨmba ikaruarä ndive ndive.

¹⁹ Opaete tëta guasu sacerdote Aarón iñemuña reta imbaerä opɨta vae jae ko trece tëta guasu mɨmba ikaruarä ndive ndive.

²⁰ Coat, Leví taɨ iñemuña reta oataño vɨteri vae pe oñemee suerte rupi tëta guasu reta Efraín iñemuña reta iɨvɨ pe.

²¹ Efraín iñemuña reta iɨvɨtɨ pe oñemee chupe reta tëta guasu Siquem mɨmba ikaruarä ndive, ñepɨ̈rokarä oporoyuka vae reta pe; oñemee vi chupe reta tëta guasu reta: Gezer,

²² Kibsaim jare Bet-horón; irundɨ tëta guasu mɨmba ikaruarä ndive ndive.

²³ Dan iñemuña reta iɨvɨ pe oñemee chupe reta: Tëta Elteque, Gibetón,

²⁴ Ajalón jare Gat-rimón; irundɨ tëta guasu mɨmba ikaruarä ndive ndive.

²⁵ Jare Manasés iñemuña reta oyemboyaogüe iɨvɨ pe oñemee mókoi tëta guasu mɨmba ikaruarä ndive ndive, jae ko Taanac jare Gat-rimón.

²⁶ Opaete tëta guasu Coat iñemuña reta oataño vae reta imbaerä opɨta vae, jae ko payandepo tëta guasu mɨmba ikaruarä ndive ndive.

²⁷ Jare Gersón, Leví taɨ iñemuña reta pe oñemee Manasés iñemuña reta oyemboyaogüe iɨvɨ pe mókoi tëta guasu mɨmba ikaruarä ndive ndive; tëta guasu Golán ñepɨ̈rokarä oporoyuka vae reta pe, Basán pe oï vae; oñemee vi chupe reta tëta guasu reta: Beestera,

²⁸ jare Isacar iñemuña reta iɨvɨ pe oñemee chupe reta Cisón, Daberat,

²⁹ Jarmut jare En-ganim; irundɨ tëta guasu mɨmba ikaruarä ndive ndive.

³⁰ Aser iñemuña reta iɨvɨ pe oñemee chupe reta: Tëta Miseal, Abdón,

³¹ Helcat jare Rehob; irundɨ tëta guasu mɨmba ikaruarä ndive ndive.

³² Neftalí iñemuña reta iɨvɨ pe oñemee chupe reta mboapɨ tëta guasu mɨmba ikaruarä ndive ndive: Tëta guasu Cedes, Galilea pe oï vae, ñepɨ̈rokarä oporoyuka vae reta pe; omee reta vi Hamot-dor jare Cartán.

³³ Opaete tëta guasu reta, Gersón iñemuña reta jëtara ñavo rupi imbaerä opɨta vae jae ko trece tëta guasu mɨmba ikaruarä ndive ndive.

³⁴ Merari, Leví taɨ iñemuña reta pe mbaetɨño tëta guasu oñemee vae pe, omee reta Zabulón iñemuña reta iɨvɨ pe: Tëta Jocneam, tëta Carta,

³⁵ Dimna jare Naalal; irundɨ tëta guasu, mɨmba ikaruarä ndive ndive.

³⁶ Rubén iñemuña reta iɨvɨ pe oñemee chupe reta: Tëta Beser, Jahaza,

³⁷ Cademot jare Mefaat; irundɨ tëta guasu, mɨmba ikaruarä ndive ndive.

³⁸ Gad iñemuña reta iɨvɨ pe oñemee chupe reta tëta Ramot, Galaad pe oï vae, ñepɨ̈rokarä oporoyuka vae reta pe; omee reta vi tëta Mahanaim,

³⁹ Hesbón jare Jazer; irundɨ tëta guasu, mɨmba ikaruarä ndive ndive.

⁴⁰ Opaete tëta guasu reta Merari iñemuña reta, jëtara ñavo rupi imbaerä opɨta suerte rupi vae jae ko doce tëta guasu.

⁴¹ Opaete tëta guasu Leví iñemuña reta imbaerä opɨta Israel iñemuña reta ipɨte vae, jae ko cuarenta y ocho tëta guasu, mɨmba ikaruarä ndive ndive.

⁴² Jare kuae tëta guasu reta mbaetɨ köi ñogüɨnoi oyougüi, metei ñavo güɨnoi iyɨ́vɨri rupi mɨmba ikaruarä. Jökorai metei ñavo opaete kuae tëta guasu reta.

YandeYa jupi ko

⁴³ Körai yandeYa omee Israel iñemuña reta opaete kuae ɨvɨ, jae oñererökuavee jee re ae omee vaerä iñemuñagüe reta pe vae, oike reta opɨ̈ro jare yogüɨreko jókuae ɨvɨ pe.

⁴⁴ Jare yandeYa omee yogüɨreko pɨagüive vaerä jókuae ɨvɨ pe, jae oñererökuavee jee re ae Israel iñemuñagüe reta pe rami; jare opaete jovaicho reta güi mbaetɨ metei ave ipuere oñeraro jae reta ndive, echa yandeYa omee jae reta ipo pe opaete jovaicho reta.

⁴⁵ Mbaetɨ metei ave ñee oyeapombae, opaete ñee ikavigüe yandeYa jei Israel iñemuña reta pe vae, opaetei oyeapo.