JOSUÉ 19 - Biblia Guarani Tumpa Iñee

Simeón iñemuña reta iɨvɨ

¹ Ɨvɨ o yemboyao vaerä oyeapo mokoía ma suerte vae oë Simeón iñemuña reta imbaerä jëtara ñavo rupi. Kuae ɨvɨ opɨta Judá iñemuña reta iɨvɨ pe.

² Jare tëta guasu reta Simeón iñemuña reta imbaerä vae jae ko: Beerseba, Seba, Molada,

³ Hazar-sual, Bala, Ezem,

⁴ Eltolad, Betul, Horma,

⁵ Siclag, Bet-marcabot, Hazar-susa,

⁶ Bet-lebaot jare Saruhén; trece tëta guasu reta; tëta guasu ñavo güɨnoi tëta raɨ raɨ.

⁷ Jare ïru tëta guasu reta jae ko: Aín, Rimón, Eter jare Asán; irundɨ tëta guasu; tëta guasu ñavo güɨnoi tëta raɨ raɨ.

⁸ Jare opaete tëta raɨ raɨ, kuae tëta guasu reta iyɨ́vɨri ñogüɨnoi vae, Baalat-beer kotɨ oväe regua, jae ko Ramat Neguev pegua. Kuae jae ko Simeón iñemuña reta iɨvɨ, jëtara ñavo rupi.

⁹ Simeón iñemuña reta iɨvɨ opɨta Judá iñemuña reta iɨvɨ pe, echa kuae ñemuña reta tuicha yae ete güɨnoi ɨvɨ, jáeramo Simeón iñemuña reta güɨnoi ɨvɨ Judá iñemuña reta iɨvɨ pe.

Zabulón iñemuña reta iɨvɨ

¹⁰ Mboapɨa ɨvɨ oyembosuerte vae oë Zabulón iñemuña reta imbaerä jëtara ñavo rupi. Kuae ɨvɨ jembeɨ ojo oväe Sarid pe,

¹¹ jare oyeupi kuaraɨ oikea kotɨ, Marala kotɨ jare oasa Dabeset kotɨ jare joko güi ojo oväe ɨ̈aka raɨ oï Jocneam jóvai vae pe.

¹² Jare Sarid güi oyere kuaraɨ oëa kotɨ, Quislot-tabor jembeɨ pe oväe regua, joko güi oë Daberat pe, jare oyeupi Jafía kotɨ.

¹³ Joko güi oasa kuaraɨ oëa kotɨ, Gat-hefer kotɨ jare oasa Ita-cazín rupi jare ojo oväe Rimón pe, oyere reve Nea rupi.

¹⁴ Ɨvɨtuguasu kotɨ ɨvɨ jembeɨ oï vae, oyere Hanatón kotɨ rupi jare ou oë ɨvɨtɨ päu Jefte-el pe;

¹⁵ kuae ɨvɨ pe oime doce tëta guasu; tëta guasu ñavo güɨnoi tëta raɨ raɨ; jókuae reta güi jae ko Catat, Naalal, Simrón, Idala jare Belén.

¹⁶ Kuae jae ko Zabulón iñemuña reta iɨvɨ, jëtara ñavo rupi; kuae tëta guasu reta; tëta guasu ñavo güɨnoi tëta raɨ raɨ.

Isacar iñemuña reta iɨvɨ

¹⁷ Irundɨa ɨvɨ oyembosuerte vae oë Isacar iñemuña reta imbaerä, jëtara ñavo rupi.

¹⁸ Jókuae ɨvɨ pegua tëta guasu reta jae: Jezreel, Quesulot, Sunem,

¹⁹ Hafaraim, Sihón, Anaharat,

²⁰ Rabit, Quisión, Abez,

²¹ Remet, En-ganim, En-hada jare Bet-pases.

²² Jare kuae ɨvɨ jembeɨ ojo oväe Tabor, Sahazima jare Bet-semes rupi, jare ojo iyapɨ ɨ̈aka Jordán pe; diecisei tëta guasu; tëta guasu ñavo güɨnoi tëta raɨ raɨ.

²³ Kuae jae ko Isacar iñemuña reta iɨvɨ jëtara ñavo rupi; kuae tëta guasu ñavo güɨnoi tëta raɨ raɨ.

Aser iñemuña reta iɨvɨ

²⁴ Pandepoa ɨvɨ oyembosuerte vae oë Aser iñemuña reta imbaerä, jëtara ñavo rupi,

²⁵ jare iɨvɨ pegua tëta guasu reta jae: Helcat, Halí, Betén, Acsaf,

²⁶ Alamelec, Amad jare Miseal; jare ojo oväe ɨvɨtɨ guasu Carmelo pe kuaraɨ oikea kotɨ, jare Sihor-libnat kotɨ.

²⁷ Joko güi ɨvɨ jembeɨ ombosɨmbi Bet-dagón kotɨ, kuaraɨ oëa kotɨ jare ojo oya Zabulón iñemuña reta iɨvɨ jembeɨ re, ɨvɨtɨ päu Jefte-el re ɨvɨtuguasu kotɨ, Bet-emec jare Neiel re, jare oë Cabul kotɨ, ɨvɨtuguasu kotɨ,

²⁸ joko güi oasa Hebrón, Rehob, Hamón jare Caná rupi, ojo oväe tëta guasu Sidón pe regua.

²⁹ Joko güi kuae ɨvɨ jembeɨ oyere Ramá kotɨ, jare ojo oväe Tiro tëta guasu oñekëse kavi yae vae pe, jare oyere Hosa kotɨ, jare oë ojo Ɨguasu Mediterráneo pe tëta Aczib kotɨ güi.

³⁰ Jare Uma, Afec, jare Rehob; veintidó tëta guasu; tëta guasu ñavo güɨnoi tëta raɨ raɨ.

³¹ Kuae jae ko Aser iñemuña reta iɨvɨ, jëtara ñavo rupi; kuae tëta guasu ñavo güɨnoi tëta raɨ raɨ.

Neftalí iñemuña reta iɨvɨ

³² Ovaa ɨvɨ oyembosuerte vae oë Neftalí iñemuña reta imbaerä, jëtara ñavo rupi.

³³ Jae reta iɨvɨ oyemboɨpɨ Helef, Alón-saananim, Adami-neceb jare Jabneel güive, Lacum kotɨ, jare oë ojo ɨ̈aka Jordán pe.

³⁴ Jare ɨvɨ jembeɨ oyere kuaraɨ oikea kotɨ Aznot-tabor rupi, joko güi oasa Hucoc pe, jare ojo oya Zabulón iñemuña reta iɨvɨ re, arayevɨ kotɨ, jare kuaraɨ oikea kotɨ oya oyoe Aser iñemuña reta iɨvɨ ndive, jare ɨ̈aka Jordán rupi kuaraɨ oëa kotɨ.

³⁵ Jare tëta guasu reta oñekëse kavi vae jae: Sidim, Zer, Hamat, Racat, Cineret,

³⁶ Adama, Ramá, Hazor,

³⁷ Cedes, Edrei, En-hazor,

³⁸ Irón, Migdal-el, Horem, Bet-anat jare Bet-semes; diecinueve tëta guasu; tëta guasu ñavo güɨnoi tëta raɨ raɨ.

³⁹ Kuae jae ko Neftalí iñemuña reta iɨvɨ, jëtara ñavo rupi; kuae tëta guasu ñavo güɨnoi tëta raɨ raɨ.

Dan iñemuña reta iɨvɨ

⁴⁰ Chiúa ɨvɨ oyembosuerte vae oë Dan iñemuña reta imbaerä, jëtara ñavo rupi.

⁴¹ Jare kuae ɨvɨ pe ñogüɨnoi tëta guasu: Zora, Estaol, Ir-semes,

⁴² Saalabín, Ajalón, Jetla,

⁴³ Elón, Timnat, Ecrón,

⁴⁴ Elteque, Gibetón, Baalat,

⁴⁵ Jehúd, Bene-berac, Gat-rimón,

⁴⁶ Mejarcón jare Racón, tëta Jope jóvai ɨvɨ oï vae ndive.

⁴⁷ Jare Dan iñemuña reta pe oata ɨvɨ, jáeramo oporepeña tëta Lesem re, jare opɨ̈ro reta jókuae tëta guasu opa güire oyuka kɨsepuku pe joko pegua reta. Jökorai opɨta yogüɨreko joko pe; jare Lesem ombojee reta, Dan, jae reta iñemuñagüe jee pe.

Josué iɨvɨ

⁴⁸ Kuae jae ko Dan iñemuña reta iɨvɨ, jëtara ñavo rupi; kuae tëta guasu ñavo güɨnoi tëta raɨ raɨ.

⁴⁹ Israel iñemuña reta opa güire omboyao oyoupe ɨvɨ ñemuña ñavo rupi, omee reta vi ɨvɨ Josué, Nun taɨ pe jae reta iɨvɨ pe.

⁵⁰ YandeYa oporookuai rami, omee reta Josué pe tëta guasu jae oiporu iyeupe vae, tëta Timnat-sera, ɨvɨtɨ guasu pe, Efraín iñemuña reta iɨvɨ pe. Jare Josué omopüa pɨau ye jókuae tëta guasu jare oiko joko pe.

⁵¹ Opaete kuae ɨvɨ jae ko sacerdote Eleazar, Josué, Nun taɨ jare Israel iñemuña juvicha reta omboyao suerte rupi Israel iñemuña reta pe vae, o yemboatɨ renda jöke pe yandeYa jóvai Silo pe. Jökorai opa omboyao reta ɨvɨ.