JOSUÉ 17 - Biblia Guarani Tumpa Iñee

Manasés iñemuña reta iɨvɨ

¹ Kuae ɨvɨ ko jae Manasés iñemuña reta omboresive suerte rupi vae; Manasés jae ko José taɨrɨpɨ. Maquir jae ko Manasés taɨrɨpɨ, jae ko Galaad tu. Maquir ko kuimbae ñeraro regua, omboresive iɨvɨrä Galaad jare Basán ɨ̈aka Jordán güi kuaraɨ oëa kotɨ.

² Oyeapo vi suerte ɨvɨ oyemboyao vaerä ïru Manasés iñemuña reta peguarä, jëtara ñavo rupi: Abiezer taɨ reta, Helec taɨ reta, Asriel taɨ reta, Siquem taɨ reta, Hefer taɨ reta jare Semida taɨ reta; jae ko kuae Manasés taɨ reta, José jɨmɨmino reta.

³ Ërei Zelofehad, Hefer taɨ Galaad jɨmɨmino, Maquir taɨ Manasés jɨmɨmino mbaetɨ taɨ, jaeño oime pandepo tayɨ, jae ko Maala, Noa, Hogla, Milca jare Tirsa.

⁴ Kuae reta yogüeru sacerdote Eleazar jare Josué, Nun taɨ jóvai jare mburuvicha reta jóvai, jei reta: “YandeYa oyókuai Moisés omee vaerä oreve ɨvɨ orerëtara reta pe oñemee rami.” Jayave Josué omee chupe reta ɨvɨ, tu jëtara reta pe oñemee rami, yandeYa jei chupe rami.

⁵ Körai Manasés iñemuña reta omboresive ɨvɨ payandepo yemboyao, oyepapambae reve ɨvɨ Galaad jare Basán, ɨ̈aka Jordán jovaicho kotɨ ñogüɨnoi vae,

⁶ echa Manasés tayɨ reta pe oñemee vi ɨvɨ, jaɨe reta pe oñemee rami; jare ɨvɨ Galaad opɨta ïru Manasés iñemuña reta oyemboyaogüe peguarä.

⁷ Manasés iñemuña reta iɨvɨ jembeɨ oyemboɨpɨ Aser güive Micmetat kotɨ, Siquem jóvai oï vae kotɨ, jare ojo arayevɨ kotɨ, Tapúa pe yogüɨreko vae reta kotɨ rupi.

⁸ Ɨvɨ Tapúa jae ko Manasés iñemuña reta imbae, ërei tëta guasu Tapúa, Manasés iñemuña reta iɨvɨ jembeɨ pe oï vae, jae ko Efraín iñemuña reta imbae.

⁹ Kuae ɨvɨ jembeɨ ogüeyɨ ɨ̈aka raɨ Caná kotɨ, jókuae ɨ̈aka raɨ güi arayevɨ kotɨ. Kuae tëta guasu reta Efraín iñemuña reta imbae ñogüɨnoi Manasés iñemuña reta iɨvɨ ipäu pe; jare Manasés iñemuña reta iɨvɨ jembeɨ jae ko ɨvɨtuguasu kotɨ ɨ̈aka oïa güi oë ojo ɨguasu pe.

¹⁰ Efraín iñemuña reta opɨta ɨ̈aka raɨ güi arayevɨ kotɨ jare Manasés iñemuña reta opɨta ɨvɨtuguasu kotɨ jare Ɨguasu Mediterráneo güɨnoi reta iɨvɨ jembeɨrä jare Aser iñemuña reta iɨvɨ oï ɨvɨtuguasu kotɨ jare Isacar iñemuña reta ñogüɨnoi kuaraɨ oëa kotɨ.

¹¹ Manasés iñemuña reta güɨnoi vi tëta guasu reta; tëta guasu ñavo güɨnoi tëta raɨ raɨ, Isacar jare Aser iñemuña reta iɨvɨ pe jae ko: Bet-seán, Ibleam, Dor, Endor, Taanac jare Meguido, mboapɨ yemboyao ɨvɨ.

¹² Ërei Manasés iñemuña reta mbaetɨ ipuere güɨnoe omombo jókuae tëta guasu pegua reta; jökorai cananeo reta opɨta yogüɨreko jókuae ɨvɨ pe.

¹³ Ërei Israel iñemuña reta imbaepuere yae reta ma yave, ombaemboepɨuka cananeo reta pe, ërei mbaetɨ güɨnoe reta omombo.

José iñemuña reta opɨ̈ro kaa

¹⁴ Jare José iñemuña reta jei Josué pe: —¿Maera pa michi yae ɨvɨ remboyao oreve? Echa ore jeta yae ko roiko, yandeYa iporerekua ko oreré.

¹⁵ Jare Josué jei chupe reta: —Pereta yae ko yave, pekua kaa kotɨ jare peitɨ ɨvɨra reta jókuae ferezeo reta jare refaita reta iɨvɨ pe, Efraín iñemuña reta iɨvɨ michi ko peve yave.

¹⁶ Jare José iñemuña reta jei: —Ngaraa kuae ɨvɨ oreave; jare opaete cananeo reta ɨvɨpe kavi rupi yogüɨreko vae reta güɨnoi käretou jiero pegua, Bet-seán jare tëta raɨ reta rupi yogüɨreko vae jare ɨvɨtɨ päu Jezreel rupi yogüɨreko vae.

¹⁷ Jayave Josué jei José iñemuña reta pe, jae ko Efraín jare Manasés iñemuña reta: —Pereta yae ko, jare pembaepuere yae; ngaraa michi ɨvɨ penoi,

¹⁸ jókuae ɨvɨ pembaerä ko; yepe tëi ɨvɨra katuai, pe opata peitɨ jare pepɨ̈rota pembaerä opaetei; echa opata pemoë pemombo cananeo reta, yepe tëi käretou jiero pegua güɨnoi reta ani imbaepuere yae reta tëi reve.