JOSUÉ 16 - Biblia Guarani Tumpa Iñee

Efraín jare Manasés iɨvɨ

¹ José iñemuña reta omboresive ɨvɨ suerte rupi vae oyemboɨpɨ kuaraɨ oëa kotɨ güi ɨ̈aka Jordán güive, ɨesaɨ Jericó pegua re katu, joko güi ñuu rupi, ɨvɨtɨ guasu ojoi oväe Jericó güi Bet-el kotɨ vae rupi.

² Jare Bet-el güi oë Luz kotɨ jare oasa sɨmbi arquita reta iɨvɨ rupi Atarot kotɨ;

³ joko güi ogüeyɨ kuaraɨ oikea kotɨ jafletita reta iɨvɨ kotɨ, Bet-horón jembeɨ ɨvɨpe pegua kotɨ, jare Gezer kotɨ oë ojo ɨguasu pe.

⁴ Körai Manasés jare Efraín iñemuña reta, José iñemuña reta omboresive ɨ́vɨ.

⁵ Efraín iñemuña reta jëtara ñavo rupi omboresive ɨvɨ vae oyemboɨpɨ kuaraɨ oëa kotɨ, Atarot-adar güive Bet-horón ɨvategua kotɨ.

⁶ Joko güi oasa ɨguasu kotɨ, jare Micmetat kotɨ ɨvɨtuguasu kotɨ, jare oasa kuaraɨ oëa kotɨ Taanat-silo kotɨ jare jókuae güi oasa Janoa kotɨ.

⁷ Janoa güi ogüeyɨ Atarot jare Naarat kotɨ, jare ojo oya Jericó re, javoi oë ɨ̈aka Jordán kotɨ.

⁸ Jare Tapúa güi ombosɨmbi ɨguasu kotɨ, ɨ̈aka raɨ Caná kotɨ, jare oë ojo ɨguasu pe. Kuae ko jae Efraín iñemuña reta iɨvɨ omboyao iyeupe reta jëtara ñavo rupi vae.

⁹ Oime vi tëta guasu reta jare tëta raɨ reta oñemee reta iɨvɨ pe.

¹⁰ Ërei Efraín iñemuña reta mbaetɨ güɨnoe omombo Gezer güi cananeo reta; jökorai cananeo reta yogüɨreko Efraín iñemuña reta ipɨte pe, jare ombaemboepɨ yogüɨreko. Añave rupi cananeo reta oime yogüɨreko joko pe.