JOSUÉ 15 - Biblia Guarani Tumpa Iñee

Judá iɨvɨ

¹ Judá iñemuña reta omboresive ɨvɨ suerte rupi, jëtara ñavo rupi vae, ojo oväe Edom jembeɨ pe, jare arayevɨ kotɨ güɨnoi jembeɨrä ñuu Zin,

² arayevɨ kotɨ jembeɨ oï vae jae ko ɨguasu Jembochɨ vae jembeɨ güive, ɨguasu oyemboɨpɨ arayevɨ kotɨgua vae güive,

³ jare oë arayevɨ kotɨ Acrabim ikúa rupi, oasa ojo Zin kotɨ, jare oyeupi ye arayevɨ kotɨ güi Cades-barnea kotɨ, oasa Hezrón rupi, jare oyeupi Adar kotɨ rupi oyere Carca kotɨ,

⁴ joko güi oasa Asmón kotɨ jare oë ɨ̈aka Egipto pegua rupi, jare iyapɨ ɨguasu pe. Kuae ko jae ɨvɨ jembeɨ arayevɨ kotɨ rupi.

⁵ Ɨvɨ jembeɨ kuaraɨ oëa kotɨgua jae ko Ɨguasu Jembochɨ vae, jare jembeɨ ɨvɨtuguasu kotɨgua oyemboɨpɨ Ɨguasu Jembochɨ vae pe ɨ̈aka Jordán ou oyeaa pe,

⁶ jare oyeupi Bet-hogla rupi, oasa Bet-arabá güi ɨvɨtuguasu kotɨ, kuae güi oyeupi Rubén taɨ Bohán iyeita oïa kotɨ;

⁷ javoi oyeupi ɨvɨtɨ päu Acor güi Debir kotɨ, jare ɨvɨtuguasu kotɨ Gilgal kotɨ, Adumín ikúa jóvai oï vae, ɨ̈aka raɨ güi arayevɨ kotɨ oï vae; joko güi oasa ye ɨesaɨ En-semes rupi, jare oë ɨesaɨ Rogel rupi;

⁸ jare oyeupi ɨvɨtɨ päu Hinom rupi Jebús güi arayevɨ kotɨ, jae ko Jerusalén. Javoi oyeupi ɨvɨtɨ iyapɨte rupi, ɨvɨtɨ päu Hinom jóvai, kuaraɨ oikea kotɨ oï vae rupi, kuae oï ɨvɨtɨ päu Refaim güi ɨvɨtuguasu kotɨ,

⁹ jare oyere ɨvɨtɨ iyapɨte güive ɨesaɨ Neftoa kotɨ, jare oë ojo ɨvɨtɨ Efrón pe tëta guasu reta ñogüɨnoia pe, joko güi oyere Baala kotɨ, jae ko Quiriat-jearim.

¹⁰ Baala güi ɨvɨ jembeɨ oyere kuaraɨ oikea kotɨ, ɨvɨtɨ Seir kotɨ, jare oasa ɨvɨtɨ Jearim iyɨ́vɨri rupi ɨvɨtuguasu kotɨ, jae ko Quesalón, jare ogüeyɨ Bet-semes kotɨ, jare oasa Timna kotɨ,

¹¹ javoi oë ɨvɨtɨ ikúa rupi, Ecrón güi ɨvɨtuguasu kotɨ, jare oyere Sicrón kotɨ, jare oasa ɨvɨtɨ Baala rupi, jare oë Jabneel rupi ojo iyapɨ ɨguasu pe.

¹² Ɨvɨ iyapɨ kuaraɨ oikea kotɨ jae ko Ɨguasu Mediterráneo jee vae. Kuae ko jae Judá iñemuña reta iɨvɨ jembeɨ, omboyao reta iyeupe jëtara ñavo ñavo rupi vae.

Caleb opïro Hebrón jare Debir

¹³ Josué omee Caleb, Jefone taɨ pe Judá iñemuña reta iɨvɨ pe. YandeYa oyókuai rami omee chupe tëta guasu Arba jae ko Hebrón. Arba jae ko Anac tu.

¹⁴ Caleb güɨnoe omombo joko güi mboapɨ Anac iñemuña reta: Sesai, Ahimán jare Talmai.

¹⁵ Joko güi oporepeña Debir pe yogüɨreko vae reta re; Debir tenonde yave jee yepi Quiriat-sefer,

¹⁶ jare Caleb jei: “Quiriat-sefer re oporepeña jare opɨ̈ro vae pe, ameeta jembirekorä cherayɨ Acsa.”

¹⁷ Jare jiɨ Otoniel, Cenaz taɨ, opɨ̈ro jókuae tëta guasu, jare Caleb omee tayɨ Acsa jiɨ jembirekorä.

¹⁸ Opata ma yogüɨraja jo kotɨ yave, Otoniel jei Acsa pe oiporu vaerä tu pe ɨvɨ, oparavɨkɨ vaerä pɨpe. Jayave Acsa ogüeyɨ mburika güi, jare Caleb oparandu chupe: —¿Mbae pa reipota?

¹⁹ Acsa jei: —Aipota reyapo ikavi vae cheve. Mase, ko remee ma cheve ɨvɨ ñuu Neguev pe, emee vi cheve ɨesaɨ reta. Jare jae omee chupe ɨesaɨ reta ɨvate kotɨgua jare ɨvɨpe rupigua.

Judá iñemuña jëta guasu reta

²⁰ Kuae reta ko jae Judá iñemuña reta iɨvɨ, omboyao iyeupe reta jëtara ñavo rupi vae.

²¹ Tëta guasu reta Judá iñemuña reta imbaerä opɨta arayevɨ kotɨ vae, Edom jembeɨ kotɨ vae, jae ko: Cabseel, Edar, Jagur,

²² Cina, Dimona, Adada,

²³ Cedes, Hazor, Itnán,

²⁴ Zif, Telem, Bealot,

²⁵ Hazor-hadata, Queriot, Hezrón (ïru jee ko Hazor),

²⁶ Amam, Sema, Molada,

²⁷ Hazar-gada, Hesmón, Bet-pelet,

²⁸ Hazar-sual, Beerseba, Bizotia,

²⁹ Baala, Iim, Esem,

³⁰ Eltolad, Quesil, Horma,

³¹ Siclag, Madmana, Sansana,

³² Lebaot, Silhim, Aín jare Rimón; opaete reve veintinueve tëta guasu; tëta guasu ñavo güɨnoi tëta raɨ raɨ.

³³ Ɨvɨpe kavi rupi tëta guasu ñogüɨnoi vae jae: Estaol, Zora, Asena,

³⁴ Zanoa, En-ganim, Tapúa, Enam,

³⁵ Jarmut, Adulam, Soco, Azeca,

³⁶ Saaraim, Aditaim, Gedera jare Gederotaim; catorce tëta guasu; tëta guasu ñavo güɨnoi tëta raɨ raɨ.

³⁷ Tëta guasu reta Zenán, Hadasa, Migdal-gad,

³⁸ Dileán, Mizpa, Jocteel,

³⁹ Laquis, Boscat, Eglón,

⁴⁰ Cabón, Lahmam, Quitlis,

⁴¹ Gederot, Bet-dagón, Naama jare Maceda; diecisei tëta guasu; tëta guasu ñavo güɨnoi tëta raɨ raɨ.

⁴² Tëta guasu reta Libna, Eter, Asán,

⁴³ Jifta, Asena, Nezib,

⁴⁴ Keila, Aczib jare Maresa; chau tëta guasu; tëta guasu ñavo güɨnoi tëta raɨ raɨ.

⁴⁵ Tëta guasu Ecrón, tëta reta ndive jare tëta raɨ reta ndive,

⁴⁶ jare Ecrón güi ɨguasu kotɨ, opaete köi ñogüɨnoi Asdod güi vae reta tëta raɨ raɨ ndive.

⁴⁷ Tëta guasu Asdod, tëta reta ndive jare tëta raɨ raɨ ndive, jare tëta guasu Gaza, tëta reta ndive jare tëta raɨ raɨ ndive, ɨ̈aka Egipto kotɨ ojo oväe regua, jare Ɨguasu Mediterráneo jee vae jembeɨ.

⁴⁸ Jare ɨvɨtɨ guasu reta rupi tëta guasu reta ñogüɨnoi vae jae: Samir, Jatir, Soco,

⁴⁹ Dana, Quiriat-sana (ïru jee ko Debir),

⁵⁰ Anab, Estemoa, Anim,

⁵¹ Gosén, Holón jare Gilo; once tëta guasu; tëta guasu ñavo güɨnoi tëta raɨ raɨ.

⁵² Tëta guasu reta: Arab, Duma, Esán,

⁵³ Janum, Bet-tapúa, Afeca,

⁵⁴ Humta, Quiriat-arba (ïru jee ko Hebrón) jare Sior; chau tëta guasu; tëta guasu ñavo güɨnoi tëta raɨ raɨ.

⁵⁵ Tëta guasu reta: Maón, Carmel, Zif, Juta,

⁵⁶ Jezreel, Jocdeam, Zanoa,

⁵⁷ Caín, Gabaa jare Timna; payandepo tëta guasu; tëta guasu ñavo güɨnoi tëta raɨ raɨ.

⁵⁸ Tëta guasu reta: Halhul, Bet-sur, Gedor,

⁵⁹ Maarat, Bet-anot jare Eltecón; ova tëta guasu; tëta guasu ñavo güɨnoi tëta raɨ raɨ.

⁶⁰ Tëta guasu reta Quiriat-baal (ïru jee ko Quiriat-jearim) jare Rabá; mókoi tëta guasu; tëta guasu ñavo güɨnoi tëta raɨ raɨ.

⁶¹ Ñuu rupi tëta guasu ñogüɨnoi vae jae: Bet-arabá, Midín, Secaca,

⁶² Nibsán, Tëta guasu Yukɨ renda jare En-gadi; ova tëta guasu; tëta guasu ñavo güɨnoi tëta raɨ raɨ.

⁶³ Judá iñemuña reta mbaetɨ ipuere güɨnoe omombo Jerusalén güi jebuseo reta, jáeramo jebuseo reta yogüɨreko añave rupi Jerusalén pe Judá iñemuña reta ipɨte pe.