JOSUÉ 14 - Biblia Guarani Tumpa Iñee

Josué omboyao ɨvɨ Canaán

¹ Kuaekuae ko jae ɨvɨ Canaán, Israel iñemuña reta opɨ̈ro imbaerä vae, kuae omboyao chupe reta sacerdote Eleazar, Josué, Nun taɨ jare Israel iñemuña juvicha reta ñavo ndive.

² Ɨvɨ oyemboyao chupe reta suerte rupi chau ñemuña pe jare metei ñemuña oyemboyaogüe pe, yandeYa oyókuai Moisés vae rami oyemboyao chupe reta.

³ Echa Rubén jare Gad iñemuña reta pe jare Manasés iñemuña reta oyemboyaogüe pe Moisés omboyao ma ɨ̈aka Jordán jovaicho kotɨ; ërei Leví iñemuña reta pe mbaetɨ omboyao ɨvɨ.

⁴ Echa José taɨ reta güi oyeapo mókoi ñemuña, Manasés jare Efraín; ërei mbaetɨ oyemboyao ɨvɨ Leví iñemuña reta pe, jaeño oñemee chupe reta tëta guasu reta yogüɨreko vaerä pɨpe jare iyɨ́vɨri jɨmba reta ikarúa rendarä.

⁵ Israel iñemuña reta omboyao iyeupe ɨvɨ, yandeYa oyókuai Moisés vae rami.

Josué omee Hebrón Caleb pe

⁶ Judá iñemuña reta yogüeru Gilgal pe imiari vaerä Josué ndive; jare Caleb, cenezeo Jefone taɨ, jei Josué pe: “Nde reikuaa yandeYa Tumpa jei jembiokuai Moisés pe vae, cheregua jare nderegua Cades-barnea pe.

⁷ Che anoi cuarenta año Moisés, yandeYa jembiokuai chembou yave Cades-barnea güi amae vaerä kuae ɨvɨ re; jare ayerova ye yave chemiari chupe jupi rupi kavi.

⁸ Jare tëtara che ndive yogüeru vae reta ombopɨa kɨɨyeuka opaete vae; ërei che ayeko cheYa Tumpa kotɨño.

⁹ Jayave Moisés jei cheve Tumpa jee re: ‘Ɨvɨ repɨ̈ro jese vae toiko ndembaerä jare neñemuña reta peguarä jekuae avei pegua, echa reyeko cheYa Tumpa kotɨ ño.

¹⁰ Añave, yandeYa omee aiko vaerä, jae jei rami, kuae cuarenta y cinco año ma oasa yandeYa imiari kuae ñee reta Moisés pe güire, Israel iñemuña reta oguatase yave ñuu rupi, jare añave anoi ma ochenta y cinco año.

¹¹ Ërei añave chetäta vɨteriño, Moisés chembou ɨvɨ re amae yave rami, jókuae ara rupi chepɨ̈rata rami, jökorai vɨteri chepuere ñeraro pe.

¹² Jayave emee cheve jókuae ɨvɨtɨ guasu yandeYa imiari jese vae. Nde reikuaa jókuae ara rupi Anac iñemuña reta yogüɨreko joko pe vae, jare oime tëta guasu reta tuicha yae vae jare oñekëse kavi yae vae. Ërei aäro yandeYa oï vaerä che ndive, anoe vaerä amombo reta joko güi, yandeYa jei rami.”

¹³ Jayave Josué jei ñee kavi Caleb, Jefone taɨ kotɨ jare omee chupe Hebrón, jae imbaerä jare iñemuña reta peguarä.

¹⁴ Jökorai Hebrón opɨta Caleb, Jefone taɨ imbaerä añave regua, yandeYa, Israel iñemuña reta iTumpa kotɨño oyeko jeko pegua.

¹⁵ Hebrón jee tenondegua jae ko Quiriat-arba; echa Arba jae ko jërakua yae vae, Anac kuimbae puku yae vae iñemuña pegua. Jare ɨvɨ oputuu ñeraro güi.