JOSUÉ 11 - Biblia Guarani Tumpa Iñee

Jabín jare jae ndive oñemoïru vae reta ñamɨri

¹ Jabín, mburuvicha guasu Hazor pegua oikuaa yave opaete kuae oasagüe re, omondo ñee Jobab, mburuvicha guasu Madón pegua pe, mburuvicha guasu Simrón pegua pe jare mburuvicha guasu Acsaf pegua pe,

² jare mburuvicha guasu reta jókuae ɨvɨ güi ɨvɨtuguasu kotɨ ɨvɨtɨ guasu rupi jëta vae reta pe, jare Arabá kotɨ, íguasu Cineret güi arayevɨ kotɨ, ɨvɨpe kavi rupi yogüɨreko vae pe jare ɨvɨ Dor kotɨ kuaraɨ oikea kotɨ,

³ jare cananeo reta kuaraɨ oëa kotɨgua jare kuaraɨ oikea kotɨgua pe, amorreo reta, heteo reta, ferezeo reta, jebuseo reta ɨvɨtɨ guasu rupi jëta vae reta pe, jare heveo reta ɨvɨtɨ guasu Hermón igüɨ pe yogüɨreko vae reta pe, ɨvɨ Mizpa pe.

⁴ Opaete kuae mburuvicha guasu reta ñogüɨnoe isundaro reta ndive ndive, jeta kuimbae reta, ɨguasu jembeɨ rupi ɨvɨkuitï rami, jeta yeyé kavayu jare käretou reta ñeraro pegua ndive.

⁵ Opaete kuae mburuvicha guasu reta oyomboatɨ, jare yogüeru oyembojeyupa ɨupa Merom iyɨvɨri, oñeraro reta vaerä Israel iñemuña reta ndive.

⁶ Ërei yandeYa jei Josué pe: “Agüɨye ekɨɨye chugüi reta, echa pɨareve koyave etei che opata amee pepo pe, jare ikavayu reta ipɨ opa peakɨo jare ikäretou reta opa peapɨ.”

⁷ Jayave Josué jare opaete kuimbae ñeraro regua reta ndive ñogüɨnoe chupe reta iparanoe ɨupa Merom jembeɨ pe,

⁸ javoi yandeYa omee Israel iñemuña reta ipo pe, jare oyuka reta jare oaɨkuemoña reta güɨraja tëta guasu Sidón kotɨ, Misrefot-maim kotɨ, ɨvɨpe kavi Mizpa kotɨ, kuaraɨ oëa kotɨ jare oyuka reta oeyambae reve metei ave.

⁹ Josué oyapo yandeYa oyókuai rami, echa opa oakɨo jovaicho reta ikavayu ipɨ jare ikäretou reta opa oapɨ.

¹⁰ Josué oyerova ye yave, opɨ̈ro tëta guasu Hazor jare oyuka kɨsepuku pe joko pegua mburuvicha guasu; kuae tëta guasu Hazor jae ko tenondegua opaete jae ndive oñemoïru vae reta pe.

¹¹ Oyuka reta kɨsepuku pe opaete joko pe yogüɨreko vae reta, opaetei omboai reta, mbaetɨ metei ave oeya reta, jare opa oapɨ reta tëta guasu.

¹² Jökoraiño vi Josué oyapo opaete ïru tëta guasu reta, tëta guasu Hazor ndive oyapo reta ñemoïru vae: Opɨ̈ro jare oyuka kɨsepuku pe opaete juvicha guasu reta, jare opa omboai Moisés, yandeYa jembiokuai oyókuai rami.

¹³ Ërei opaete tëta guasu reta ɨvɨtɨ re ñogüɨnoi vae, Israel iñemuña reta mbaetɨ oapɨ; jaeño tëta guasu Hazor opa oapɨ Josué.

¹⁴ Israel iñemuña reta opɨ̈ro iyeupe opaete mbaembae jare mɨmba reta jókuae tëta guasu reta pegua; ërei opaete joko pe yogüɨreko vae opaetei oyuka reta, oeyambae reve metei ave.

¹⁵ YandeYa oyókuai Moisés vae rami, jökorai Moisés oyókuai Josué; jare jökorai Josué oyapo, oeyambae reve metei ave ñee yandeYa oyókuai Moisés vae.

Josué opɨ̈ro opaete ɨvɨ

¹⁶ Josué opɨ̈ro opaete jókuae ɨvɨ, ɨvɨtɨ guasu reta, opaete Neguev, opaete ɨvɨ Gosén, ɨvɨpe kavi reta Arabá, jare ɨvɨtɨ guasu reta jare ɨvɨtɨ päu reta Israel iñemuña reta añave yogüɨreko pɨpe vae.

¹⁷ Ɨvɨtɨ Halac güive Seir kotɨ oyeupi ojo vae, Baal-gad kotɨ ɨvɨpe kavi oï Líbano pe vae rupi, ɨvɨtɨ Hermón igüɨ pe; Josué oipɨɨ jare oyuka opaete mburuvicha guasu reta jókuae ɨvɨ pegua,

¹⁸ ɨma año rupi oñeraro jókuae mburuvicha guasu reta ndive güire.

¹⁹ Israel iñemuña reta ndive mbaetɨ metei tëta guasu ave oyapo ñemoɨ̈ru, jaeñoete heveo reta Gabaón pegua, ïru tëta guasu reta opaetei opɨ̈ro ñeraro pe,

²⁰ echa yandeYa omotäta kuae tovaicho reta ipɨa, jovaicho pota vaerä Israel iñemuña reta re, Israel iñemuña reta opa vaerä omboai, agüɨye vaerä mboroparareko güɨnoi jese reta, yandeYa oyókuai Moisés rami.

²¹ Josué jókuae año rupi opa vi opɨ̈ro jare omboai Anac iñemuña reta Hebrón iɨvɨtɨ re, jare Debir iɨvɨtɨ re yogüɨreko vae reta, Anab pegua reta, jare opaete ɨvɨtɨ reta añave rupi Judá jare Israel pegua reta yogüɨrekoa rupigua; Josué opa omboai jokoropigua reta jare jëta guasu reta.

²² Metei ave Anac iñemuña reta mbaetɨ opɨta Israel iñemuña reta iɨvɨ pe; jaeño opɨta reta Gaza pe, Gat pe jare Asdod pe.

²³ Josué opɨ̈ro opaete ɨvɨ, yandeYa jei Moisés pe vae rami; jare omboyao Israel iñemuña reta imbaerä, ñemuña reta ñavo pe. Jökorai oputuu reta ñeraro güi jókuae ɨvɨ pe.