JOSUÉ 1 - Biblia Guarani Tumpa Iñee

Tumpa oenɨi Josué

¹ Moisés, yandeYa jembiokuai omano güire, yandeYa jei Josué, Nun taɨ Moisés imborɨa pe:

² “Cherembiokuai Moisés omano ma; añave, epüa easa kuae ïaka Jordán, nde jare opaete Israel iñemuña reta jókuae ɨvɨ che amee reta chupe vae pe.

³ Che ko amee peve, Moisés pe jae rami, opaete ɨvɨ pepïrota jese vae.

⁴ Kuae ñuu jare Líbano güive ïaka guasu Éufrates jee vae pe, opaete Het iñemuña reta iɨvɨ güive, ojoita oya Iguasu Mediterráneo re kuaraɨ oikea kotɨ, peɨvɨrä ko.

⁵ Ngaraa etei kia ipuere nemoamɨri reikove reiko ramboeve; Moisés ndive aiko rami aikota nde ndive; ngaraa roeya, ngaraa roeya ndeangarekoambae.

⁶ Eñemomïrata jare eñemoäta ngatu, echa nde remboyaota kuae reta imbaerä, jókuae ɨvɨ arökuavee cheree re peñemuñagüe reta pe amee vaerä vae.

⁷ Jaeño eñemomïrata jare eñemoäta ngatu yae, reyeandu reve reyapo vaerä opaete mborookuai reta cherembiokuai Moisés ndeokuai vae; agüɨye epia chugüi ketɨ ave yepe, opaete mbaembae reyapo vae oë kavi vaerä ndeve.

⁸ Agüɨye embosɨrɨ ndeyuru güi kuae mborookuai, ara pe jare pïtu yave eyemongeta jese, reyapo jare reñovatu vaerä opaete oyekuatía oï pɨpe vae; echa jayave oë kavita ndeve opaete mbaembae reyapo vae.

⁹ Mase, royókuai reñemomïrata vaerä jare reñemoäta ngatu vaerä; agüɨye ekɨɨye jare agüɨye eyembopɨtu, echa che ndeYa Tumpa aïta nde ndive oipota rupi reoa rupi.”

Josué oyupavo ɨvɨ opɨro vaerä

¹⁰ Josué oyókuai opaete vae juvicha reta, jei reve:

¹¹ “Pekua teyupa ñavo rupi jare peyókuai opaete vae toyapo iyeupe reta tapeke, echa kuae güire mboapɨ ara rupi peasata ɨ̈aka Jordán, peike vaerä pepɨ̈ro yandeYa Tumpa omee peve ɨvɨ pembaerä vae.”

¹² Josué imiari vi Rubén jare Gad iñemuña reta ndive jare Manasés iñemuña reta oyemboyaogüe ndive, jei chupe reta:

¹³ Pemaendúa yandeYa jembiokuai Moisés, peokuai vae re: —YandeYa Tumpa omee peve kuae ɨvɨ pepuere vaerä peiko pɨagüive.

¹⁴ Perembireko reta, pemichia reta jare perɨmba reta topɨta kuae ɨvɨ pe, Moisés omee peve kuae ɨ̈aka Jordán jovaicho kotɨ vae pe. Ërei opaete kuimbae jëia vae reta toyogüɨraja tembiporu ñeraro pegua ndive jëtara reta jenonde, omborɨ vaerä,

¹⁵ yandeYa omee ɨvɨ perëtara reta pe vae pe, yogüɨreko pɨagüive regua, peve omee rami, jae reta togüɨnoi vi ɨvɨ, yandeYa Tumpa omeeta chupe reta vae; jaɨkue rupi peyerova ye peɨvɨ kotɨ peiko ete vaerä pɨpe, kuae ɨ̈aka Jordán jovaicho kotɨ, kuaraɨ oëa kotɨ, Moisés, yandeYa jembiokuai omee peve vae pe.

¹⁶ Jayave jei reta Josué pe: —Toroyapo opaete mbae re oreokuai vae, torojo nde oremondoa kotɨ.

¹⁷ Opaete mbaembae rupi Moisés romboete rami, jökorai vi toroyapo nde ndive. Jaeño roiporu yandeYa Tumpa tandemborɨ, Moisés ndive oiko rami.

¹⁸ Kia nunga vae ndeporookuai oyapombae jare mbaetɨ neñee güɨrovia opaete mbaembae rupi reporookuai yave vae, tomano. Jaeño eñemomɨ̈rata jare eñemoäta ngatu.