JONÁS 1 - Biblia Guarani Tumpa Iñee

Jonás otekuarai yandeYa güi

¹ YandeYa jei Jonás, Amitai taɨ pe:

² “Epüa, ekua tëta guasu Nínive pe, jare emoërakua chupe opata amboai vae, echa iyoa jeiete yae ma cheróvai.”

³ Ërei Jonás opüa otekuarai vaerä yandeYa güi tëta Tarsis kotɨ, jare ojo tëta Jope kotɨ, joko pe oväe metei barco ojota oï Tarsis kotɨ vae; oyemboepɨ jare oyeupi pɨpe ojo vaerä jae reta ndive Tarsis kotɨ, mombɨrɨ yandeYa güi.

⁴ Ërei yandeYa omboɨvɨtuai täta ɨguasu pe; jökorai ɨguasu pe täta yae ama ɨvɨtuai reve vae jeko pegua, barco oyeka potaecha.

⁵ Jare barco pe oparavɨkɨ vae reta okɨɨye, jare metei ñavo vae osapúkai reta itumpa pe; jare omombo reta ɨ pe ivoɨta barco pegua, ombovevɨi vaerä. Ërei Jonás yepe ogüeyɨ barco jugua kotɨ, jare oyapakua oke.

⁶ Jayave barco pe oparavɨkɨ vae reta juvicha oecha jare jei chupe: —¿Maratu pa reiko, nderopeɨ mbatee? ¡Epüa jare eyerure neTumpa pe! Güɨramoi jae yandepararekota, agüɨye vaerä ñamano.

⁷ Jare jae reta jei metei ñavo oyoupe: —Peyu yambosuerte, yaikuaa vaerä kia jeko pegua ou yandeve kuae ikavimbae. Ombosuerte reta yave, Jonás re oa suerte.

⁸ Jayave jae reta jei chupe: —Emombeu oreve añave. ¿Maera ko ou yandeve kuae ikavimbae? ¿Mbaerero pa nde jare ketɨ güi pa reyu? ¿Ketɨgua pa nde jare mbae pa nerëta jee?

⁹ Jare Jonás jei chupe reta: —Hebreo ko che, cheYa Tumpa ara pegua güi oipoɨu vae, ɨguasu jare ɨvɨ iyapoa.

¹⁰ Jare jókuae kuimbae reta okɨɨye yae, jare jei reta chupe: —¿Maera pa ko kuae reyapo? Echa jae reta oikuaa, otekuarai ko yandeYa güi vae, echa jae etei yepe omombeu chupe reta.

¹¹ Jare jei reta chupe: —¿Mbae pa royapota ndeve, ɨguasu kïrii vaerä yandeve? Echa ɨguasu jeieteño oyemboarasɨ chupe reta.

¹² Jare jae jei chupe reta: —Chepɨɨ jare chemombo ɨguasu pe, jare ɨguasu kïriita peve; echa aikuaa chereko pegua ko ou kuae ama ɨvɨtuai reve vae peve.

¹³ Jare jókuae kuimbae reta oïraro tëi ibarco, omboyerova vaerä ɨ jembeɨ kotɨ; ërei mbaetɨ ipuere reta, echa ɨguasu jeieteño oyemboarasɨ ikotɨ reta.

¹⁴ Jayave osapúkai reta yandeYa kotɨ, jei reta: “Romoñera añave oreYa, agüɨye toromano kuae kuimbae jekove jeko pegua, ërei jekoä yave, agüɨye oremboeko imano re; echa nde oreYa reyapo ko nde reipota rami.”

¹⁵ Jare oipɨɨ reta omombo Jonás ɨguasu pe; jayave ramo ɨguasu kïrii iyarasɨ güi.

¹⁶ Jare jókuae kuimbae reta oipoɨu yae yandeYa güi, jare omee reta mɨmba oyeyukagüe yandeYa pe, jare oñererökuavee reta chupe.

¹⁷ Ërei yandeYa yepe oime omokätɨro jevae tuicha yae vae ɨ rupigua, jouka vaerä Jonás. Jare Jonás oiko jevae ɨ rupigua jɨe pe mboapɨ ara jare mboapɨ pɨ̈tu.