JOEL 3 - Biblia Guarani Tumpa Iñee

YandeYa iporojäa tëtaguasu reta re

¹ Jókuae ara rupi, aru yeta tembipɨɨ güi Judá jare Jerusalén,

² amboatɨta opaete tëtaguasu reta, aruta ɨvɨtɨ päu ipe kavi vae pe, Josafat jee vae pe, Israel, tëta chembae vae jeko pegua. Jae reta opa omoai moai tëtaguasu reta rupi, jare omboyao reta iyeupe ɨvɨ chembae.

³ Ombosuerte reta iyeupe cheɨvɨ, kunumi raɨ omee reta iyaguasa pota vae re, jare kuñatai raɨ omee reta vino re, jou reta vaerä.

⁴ Pe reta: “Tëta guasu Tiro, Sidón jare opaete filisteo reta iɨvɨ, ¿mbae pa ayapo peve? ¿Maera pa peipota peyepɨ cheré? ¡Ërei peyepɨ cheré yave, ɨmambae pegua che amboekoviata peve mbaeyoa peyapogüe!

⁵ Echa opa ko peraja chekorepoti, cheoro, jare chembaembae jepɨ yae vae jare ipöragüe, jare opa peroike petupao reta pe.

⁶ Jare pemee Judá pegua reta, Jerusalén ipo reta pemee griego reta pe, opa vaerä matɨ pemondo iɨvɨ güi.

⁷ Ërei che opa yeta anoe jókuae opa pe reta pemeea güi, jare amboekoviata peve peyapogüe.

⁸ Ameeta peraɨ reta jare perayɨ reta, Judaɨgua reta pe, jare jae reta opata omee Sabaɨgua reta pe, jae ko matɨ tëtaguasu oiko vae; echa yandeYa ko jei kuae.”

⁹ Pemoërakua kuae tëtaguasu reta pe: ¡Pemoërakua ñeraro! ¡Pemombarandu jëia vae reta! ¡Toyogüeru opaete kuimbae ñeraro regua reta!

¹⁰ Toyapo reta kɨsepuku iäsarou güi, jare jembiporu hoz güi toyapo reta mii; jëiambae tei: “¡Jëia vae ko che!”

¹¹ ¡Opaete tëtaguasu kuae rupigua reta! Peyu ɨmambae peyomboatɨ. ¡CheYa Tumpa, embou joko pe ndesundaro jëia vae reta!

¹² Toyupavo jare toyogüeru tëtaguasu reta, ɨvɨtɨ päu ipe kavi vae Josafat jee vae pe; echa joko pe ajäata opaete tëtaguasu jókuae iyɨvɨrigua reta.

¹³ Echa jae reta iyoa yae ko, peyasɨa trigo yagüɨyegüe rami, echa mbaarɨvo iara ma ko; peumbiri uva rami, echa jaekavi yae ma vino oyeapo vaerä.

¹⁴ Jeta yae vae ou ɨvɨtɨ päu ipe kavi vae Kïreɨ jee vae pe, echa köi yae ma oï yandeYa iporojäa iara.

¹⁵ Kuaraɨ jare yasɨ ogüeta, yasɨtata reta jäveta jendɨ.

Judá iyereroasayepe regua

¹⁶ YandeYa iñeeäta ɨvɨtɨ Sión güi yave, jae ko Jerusalén pe, ara jare ɨvɨ okanata. Erei yandeYa ko Israel iñemuña reta iñepïroka, jae ko tëta imbae vae iyeroviaka.

¹⁷ Jayave peikuaata che jae ko peYa Tumpa, cheɨvɨtɨ oñeñono tee vae Sión pe aiko vae; Jerusalén oñeñono teeta ko, ngaraa ye ma opïro ketɨgua reta.

¹⁸ Ɨvɨtɨ rupi jeta yaeta oñemuña uva, ɨvɨtɨ guasu rupi jeta yaeta neche jare Judá pe oimeta ɨ ïaka ñavo; yandeYa jo güi oëta ɨesaɨ, jókuae omoäkɨta Sitim, ɨvɨtɨ päu ipe kavi vae.

¹⁹ Egipto opata oyemboai, jare Edom opɨtata ipombae; Judá iñemuña reta re oyuvanga reta jeko pegua; iɨvɨ pe oyuka reta jekombae vae.

^20-21 Che ayepɨta jekombae imano re; mbaetɨta cheïro jeko vae pe. Ërei Judá oimeta ipo jekuae avei pegua, jare Jerusalén jae nunga vi. Jare che aikota ɨvɨtɨ Sión pe.