JOEL 2 - Biblia Guarani Tumpa Iñee

¹ Pemoñee mimbɨguasu ɨvɨtɨ Sión pe; pemoñee yemombarandu cheɨvɨtɨ oñeñono tee vae re, perɨrɨi opaete, pe kuae ɨvɨ ipo reta, echa yandeYa iporojäa iara köi ma oï.

² Pɨtumimbi yaeta jókuae ara, oyeasoita jare jüu yaeta jókuae ara. Köe jembipe oyekuaa ou ɨvɨtɨ re vae rami, jökoraita ou metei tëta tuichagüe jare imbaepuere yae vae, jókuae nunga mbaetɨi oyekuaa jare ngaraa ye ma oime kuri.

³ Tata opaetei oapɨ mbae vae rami ko; opaeteita mbae omboai oeya. Oasa yave, ɨvɨ ikavi vae opaeteita ko omboai oeya ɨvɨ ipombae rami; ¡ngaraa vi oime kia ojoyepe chugüi vae!

⁴ Jókuae tuku kavayuecha, osɨi reta sundaro reta kavayu reguaecha.

⁵ Käretou ñeraro pegua opärara vae rami osɨi reta ɨvɨtɨ guasu iyapɨte rupi, ɨvɨra joogüe opiriri ókai tata pe rami, sundaro jeta yae vae oyupavo kavi oñeraro vaerä vae rami.

⁶ Yogüeru reta yave, orɨrɨi chugüi reta opaete vae, opaete vae jovaiyuta okɨɨye güi.

⁷ Ñeraro pegua kuimbae reta jëia yae reve osɨi retata, oyeupi retata tëta guasu ikësea re, jape jape ae omomoe retata, mbaetɨ opia jape güi vae.

⁸ Mbaetɨ metei ave oa oyoe, jape jape ae omomoe reta, uvɨ reta ipäu rupi oasa reta omboaimbae reve iñesɨro.

⁹ Oike reta tëta guasu pe, osɨi reta tëta guasu ikësea rupi, oyeupi reta o re, oike reta ventana rupi imonda vae reta rami.

¹⁰ Kuae oporepeña vae reta güi orɨrɨi tëta ipo reta, ara okana, kuaraɨ jare yasɨ ogüe, yasɨtata reta jäve jendɨ.

¹¹ YandeYa oenduka iñee isundaro reta jenonde; jeta yae ko isundaro reta, jëia yae ko oyeokuai chupe vae reta; ¡tuicha jare yavaete yae ko yandeYa iporojäa iara! ¿Kia pa ipuereta güɨropɨa?

YandeYa iporoparareko

¹² YandeYa jei: “Jáeramo añave peyerova ye chekotɨ opaete pepɨa ndive, ¡peyekuaku tembíu güi, peräse jare peyaeo!”

¹³ Peyembopɨatɨtɨ, agüɨye pemondoroiño peremimonde; peyerova ye yandeYa Tumpa kotɨ; echa iporoparareko yae vae ko jae jare iyeaeä vae ko, mbaetɨ iyarasɨ raivi vae ko, tuicha yae mboroparareko pe, ñenupa oeyaño vae ko.

¹⁴ Mbaetɨ yaikuaa oipoepɨta ra iyemongeta agüɨye vaerä oiporarauka peve, jare ombou mborerekua peve, oime vaerä temitɨ jäɨgüe jare mbota vino oyepɨyere vae, yandeYa Tumpa pe mbota oñemee vaerä.

¹⁵ ¡Pemoñee mimbɨguasu Sión pe! Pemoërakua yemboatɨ jare yekuaku tembíu güi vae;

¹⁶ pemboatɨ tëta pegua reta, peñono tee kuae yemboatɨ, pemboatɨ ndechi reta, michia reta, jare michia okambu vɨteri vae reta, ¡omenda ramo vae reta topüa jupa güi!

¹⁷ Tupao joka pe toyaeo sacerdote yandeYa jembiokuai reta, jare tei reta: “Neïro oreYa, kuae tëta ndembae pe, agüɨye emee ñemomarai pe ndembae vae reta; agüɨye ïru tëtaguasu reta toyuvanga jese. ¿Remaeñota pa ïru tëtaguasu reta jei vaerä: ‘Jama pa neTumpa’?”

¹⁸ Jayave yandeYa oipararekota imbae vae reta jare iñïrota chupe reta,

¹⁹ jare jeita: “Ambouta peve tembíu, vino jare olivo iasaite, jare perïvɨatata jese; jare ngaraa ye ma amaeño ïru tëtaguasu reta oyuvanga peré.

²⁰ Tuku reta ɨvɨtuguasu kotɨ güi yogüeru vae, opata amondo ñuu kotɨ; jenonde yogüɨraja vae reta opata aitɨ Iguasu Jembochɨ vae pe, jare taɨkue yogüɨreko vae reta íguasu Mediterráneo jee vae pe; jare jetegüe opata juumbi jare iineta. ¡Echa ayapota mɨakañɨ tuichagüe!”

²¹ lvɨ agüɨye ekɨɨye; eyerovia yae, echa yandeYa oyapota mɨakañɨ tuichagüe.

²² Jevae ñana rupigua reta, agüɨye pekɨɨye; echa kapii reta ñuu rupigua jokɨ yeta, jare ɨvɨra reta ia yeta, ɨva jare uva reta ia yeta ko.

²³ ¡Sión pegua reta, pe reta vi peyerovia katu jare pevɨakatu yandeYa Tumpa re! Echa ombou peve iara pe kavi tenondegua ama; jare ombou ñotai peve tenondegua ama jare taɨkuegua ete, tenonde rupi rami.

²⁴ Trigo jɨru reta tɨnɨeta, jare uva iñetɨamía reta tɨnɨeasɨta vino pe jare olivo iasaite pe.

²⁵ Amboekoviata peve jókuae año reta rupi, taso jare tuku reta opa jou pegüi vae, jókuae chesundaro jetagüe ambou pekotɨ vae.

²⁶ Pekaruta perïvɨata regua, pemboeteta peYa Tumpa jee, jeta mɨakañɨ reta oyapo pe ndive vae; jare ngaraa ye ma chembae vae reta oñemomaraiuka,

²⁷ jökorai peikuaata oime ko tëta Israel ipɨte pe che aï vae, jare che ko, jae peYa Tumpa jare mbaetɨ ye ko ïru; ¡jare chembae vae reta ngaraa ye ma oñemomaraiuka!

Tumpa iEspíritu ou

²⁸ “Kuae jaɨkue rupi ambouta cheEspíritu opaete vae reta re; jare peraɨ reta jare perayɨ reta oñemoñeeta cheregua; jare ndechi reta opaɨuta jare taɨrusu reta oechata Tumpa oechauka vae.

²⁹ Jaeramiño vi tembiokuai kuimbae reta jare tembiokuai kuña reta re ambouta kuri cheEspíritu jókuae ara rupi;

³⁰ jare ayapota mɨakañɨ tuichagüe ara re, jare ɨvɨ re tugüɨ, tata jare tätatina pɨtumimbi vae oimeta.

³¹ Kuaraɨ pɨtumimbita jare yasɨ pïtata tugüɨ rami, ndei ou cheporojäa iara mbove, tuicha jare yavaete yae vae.”

³² Jare kia nunga ñavo oyerure yave cheve, oyereroasayepeukata; echa ɨvɨtɨ Sión jae ko Jerusalén, joko pe oimeta yereroasayepe, che jae rami. Jare aiparavogüe jembɨregüe güi oyereroasayepeta aenɨi vae.