JOEL 1 - Biblia Guarani Tumpa Iñee

Tuku reta opa güɨrokomegua temitɨ

¹ Kuae ko jae yandeYa iñee ou Joel pe vae. Joel ko Petuel taɨ.

² Tenondegua reta jare opaete kuae ɨvɨ pegua reta, peendu kuae: ¿Peara rupi ani peru reta iara rupi, oasa pa kuae nunga mbae?

³ Kuae regua pemiari peraɨ reta pe, jare jae reta timiari vi taɨ reta pe kuri, jare jókuae taɨ reta timiari vi kuri iñemuña reta pe.

⁴ Tasoa oeyagüe jou tuku raɨ, tuku raɨ oeyagüe jou tuku oveve pota ma vae, tuku oveve pota ma vae oeyagüe jou tuku tuichagüe reta.

⁵ ¡Osavaɨpogüe reta, pepa jare peyaeo! ¡Peräse peyaeo, opaete vino iua reta, peyaeo uva tɨgüegüe re, echa oñepïro pegüi!

⁶ Echa metei tëta imbaepuere yae vae jare jetagüe yae vae oike cheivi pe; jäi yaguapope jäi nunga, jare jäi-rugua yaguapope jäi-rugua nunga.

⁷ Opa omboai yandeuvarupa reta, jare yandeiva reta opa güírokomegua; opaetei oitio oeya; jäka opaetei oikäo oeya.

⁸ Peyaeo, kuñatai ime omano vae re oyaeo rami jare peyemonde temimonde mbiatiti pegua pe,

⁹ jökorai oyaeo sacerdote yandeYa jembiokuai reta, echa tupao pe mbaeti ma temiti jäigüe jare mbota vino oyepiyere vae, Tumpa pe mbota oñemee vaerä.

¹⁰ Ipombae opita ivi, ipiatiti oï; echa trigo opa okañitei, opa otini uva tigüegüe, jare olivo iasaite opa yandegüi.

¹¹ Pepɨatɨtɨ maetɨ regua reta; peräse uva iya reta; peyaeo trigo re jare cebada re, echa temitɨ opa okañɨtei ko rupi.

¹² Uva opa ipiru, ɨva opa yɨpi; temitɨ granada vi, ake jare manzana; opaetei ɨvɨra ñana rupigua yɨpi, ¡jáeramo opa kuimbae reta iyerovia chugüi!

¹³ Sacerdote reta, peyemonde temimonde mbɨatɨtɨ pegua pe, peyaeo, tupao pe peyeokuai vae reta; Tumpa jembiokuai reta, agüɨye pemboi temimonde mbɨatɨtɨ pegua, echa tupao pe mbaetɨ ma temitɨ jäɨgüe jare mbota vino oyepɨyere vae, Tumpa pe mbota oñemee vaerä.

¹⁴ Pemoërakua opaete vae pe oyekuaku vaerä tembíu güi, peyapo yemboatɨ; pemboatɨ opaete tenondegua reta jare opaete kuae ɨvɨ pe yogüɨreko vae reta, peyomboatɨ kuae yandeYa Tumpa jo pe jare peyerure chupe.

¹⁵ ¡Atataɨ, oyearo ma yandeYa iporojäa iara! ¡Yavaete jókuae ara, echa Imbaepuere yae ete vae ko güeru yandeve kañɨtei!

¹⁶ Yanderovakei opa okañɨtei tembíu, opa yerovia jare mbɨakatu yandeYa jo pe.

¹⁷ Temitɨ jäɨ opa oikomegua ɨvɨgüɨ peño, avatío reta ipombae opɨta jare opa oyemboai, echa opa ipiru trigo.

¹⁸ ¡Mɨmba reta jäsémbai! Guaka reta ikepegua oeka tëi kapii, vecha reta opa omano ñogüɨnoi.

¹⁹ ¡Asapúkai ndekotɨ cheYa Tumpa; echa kuaraɨ opa omombiru kapii, jare vi opaetei ɨvɨra reta!

²⁰ ¡Jevae ñana rupigua ave jäsémbai ndekotɨ, echa opa otini ɨ osɨrɨ vae reta, jare kuaraɨ opa omombiru kapii!