JOB 8 - Biblia Guarani Tumpa Iñee

Bildad omoërakua Tumpa jupi ko vae

¹ Bildad Súaɨgua jei Job pe:

² ¿Kërai yave regua pa jekuaeñota rere kuaekuae reta; jare neñee reta jekuaeñota opɨtambae ɨvɨtuai rami?

³ ¿Tumpa güɨrovata pa jupi vae, Imbaepuere yae ete vae oipoepɨta pa jupi vae?

⁴ Nderaɨ reta iyoa ko Tumpa kotɨ yave, jae opa oyuka iyoa re.

⁵ Ndeimboveasɨ yave nde reeka Tumpa yave, jare remoñera yave Imbaepuere yae ete vae.

⁶ Ndekɨambae jare ndesɨmbi ko yave, añetete jae ndeangareko aveita ko. Reiko kavita jupi rupi reiko vae re.

⁷ Jare yepe tëi tenonde yave ndeparavete, ërei jaɨkue rupi reikokatu yaeta.

⁸ Eparandu añave ñemuñagüe reta pe, jare eikuaa jae reta oikuaa vae.

⁹ Echa yande reta ko karumboegua, mbaetɨ etei mbae yaikuaa, yandeara reta kuae ɨvɨ pe küaraɨa oasa vae ramiño ko.

¹⁰ Ërei ñaneñemuñagüe reta ipuere imiari ndeve jare ndemboe jeta mbaembae re.

¹¹ ¿Okuakuaa pa käipepe ɨmbaea pe? ¿Okuakuaa pa kapii ɨ rupigua ɨmbaea pe?

¹² Yepe tëi jokɨ katu, oyeasɨambae reve jae räri ipiru opaete ñana reta güi.

¹³ Jökorai ko opaete iñakañɨ Tumpa güi vae reta, iyoa vae reta oäro tëi vae okañɨta ko.

¹⁴ Oyerovia tëi jese vae, okañɨ vae ko, güɨrovia katu vae ñanutirapaa ramiño ko.

¹⁵ Jókuae jo re oyeko tëita, ërei ngaraa omomara chupe, iïcha re oyepɨɨ tëi yave osota chupe.

¹⁶ Jeko kavimbae, ɨvɨra jokɨ kuaraɨ pe oï vae rami ko, jokɨ pɨaugüe, kó raɨ pe oëmbuku vae rami ko.

¹⁷ Japo reta oike ita reta ipäu rupi, jare oï ita reta ipɨte rupi.

¹⁸ Oyeapomondoro yave joko güi, ngaraa etei oyekuaa jendagüe.

¹⁹ Jökorai opa iyerovia, jare jendagüe pe oë yeta ambuae vae.

²⁰ Mase, Tumpa mbaetɨ ko güɨröɨro jupi vae; jare mbaetɨ ko omborɨ katu jeko kavimbae reta.

²¹ Jae omee yeta ko repuka vaerä, jare reyerovia katu vaerä.

²² Ërei, nemotareɨ vae reta imara yaeta ko; jare iyoa vae reta iñemuña okañɨteita ko.