JOB 7 - Biblia Guarani Tumpa Iñee

Job iñeengeta Tumpa kotɨ

¹ Kuimbae oiko kuae ɨvɨ pe yemoambeko rupi oiko vaerä, ara ñavo iparavɨkɨ jepɨ chupe oikoasɨ katu rami.

² Tembiokuai oipotaecha küaraɨa pe oï tëi vae rami, jare ara ñavo iparavɨkɨ jepɨ chupe vae, oäro rami.

³ Jökorai aiko mbovɨ yasɨ tembiporara guasu rupi, aropɨ̈tu pɨ̈tui aiporara vae.

⁴ Cherupa pe aï yave jae: ¿Kërai yave ra akuera yeta ma? Jare mbaetɨ chepuere ake köe-pota regua.

⁵ Cherete tɨnɨe ma taso reta jare ñapiruata, chepire ipeu jare oporomboyuguaru.

⁶ Cheara reta iñäkua yae mbaepɨaa oñeësɨvo pɨpe vae güi, jare oasa mbaetɨ reve cheräro.

⁷ Nemaendúa, cherekove mbaeä etei ko nderóvai, ngaraa ye aecha yerovia.

⁸ Chereechase vae reta ngaraa ye ma chereecha. Nde remae cheré yave, ngaraa ma chereecha, echa mbaetɨta ma aï.

⁹ Amapɨtu opa oyemboai jare okañɨ, jökorai omanogüe reta ñogüɨnoia pe ojo vae, ngaraa ma oë ye.

¹⁰ Ngaraa ma ou ye jo pe, jo pegua reta ngaraa ma oecha ye.

¹¹ Jáeramo, ngaraa chekïrii. Aiporara tëi reve chemiarita, aiporara tëi reve amboetata.

¹² ¿Ɨguasu ani mbaeporou ɨguasu pegua yera che, reñono vaerä cheré omaeäro vae?

¹³ Jae yave: “Cherupa pe tachepɨakatu, topeɨ tomboasa chegüi chepɨatɨtɨ.”

¹⁴ Jayave nde, chepaɨu rupi chemongɨɨye yae, chepaɨu rupi cheiämondo yae.

¹⁵ Jáeramo, aipotaecha ma nde chetïmbɨ jare chepɨ̈tupa amano, tekove mbaetɨ aipota, manoño ko aipota.

¹⁶ Añereröɨro ma, mbaetɨ ma aipota aikove aiko, chereeya mbɨakatu pe, cherekove mbaeä etei ko.

¹⁷ Tumpa, ¿mbae pa ko kuimbae, rembotuicha yae vaerä, jare reyemoambeko yae vaerä jese?

¹⁸ Ara ñavo remae jese, jare rejäa aramoete ete.

¹⁹ ¿Kërai yave pa remae poita ayapogüe re, chepuere vaerä añenɨvókoi yepe?

²⁰ Cheyoa yave, ¿mbae ikavimbae pa ayapo ndeve, kuimbae reta iYangarekoa? ¿Maera pa cheñono mbae reyembokuaakatu jese vae rami? ¿Mbae pe pa romboavai?

²¹ ¿Maera pa mbaetɨ reekɨ chegüi chepɨa pochɨ? ¿Mbaetɨ pa ndepuere neɨ̈ro cheve cheyoa re? Jarembae amanota ete ma, pɨareve chereeka yave, mbaetɨta ma aiko.