JOB 6 - Biblia Guarani Tumpa Iñee

Job omboeta ivɨa-ïru reta pe jeko re

^1-2 Jayave Job jei: Chembaeporara jare cheräse oñejäa kavi mbaejäaka pe yave,

³ oasa yeta ko ipoɨ ɨguasu jembeɨ pe ɨvɨkuitï oï vae güi; jáeramo ko mbaetɨ aipoɨu mbae jae vaerä.

⁴ Echa Imbaepuere yae ete vae cheɨ̈vo juvɨ reta pe, imbayachi jasɨ yae cheve, Tumpa ombou cheve kɨɨye yavaetegüe.

⁵ ¿Oñee yera mburika kuimbae ñana rupigua güɨnoi yave ñana jou vaerä? ¿Oñee yera toro güɨnoi yave kapii?

⁶ ¿Oyeuta ra tembíu jëe ngatumbae? ¿Ururupía jësakagüe jëe ngatuta ra?

⁷ Ayuembae vae reta etei, anoi añave cherembiurä.

⁸ Mbae mona Tumpa omboyevɨ cheve cheyerurea, mbae mona ombopo cheve aipotaecha vae.

⁹ ¡Mbae mona Tumpa ipɨakatu reve oiporarauka cheve, oitɨ mona ipo cheré, jare cheyuka ete voi!

¹⁰ Yepe mona mbaerasɨ jeiete yae cheve, ërei chepɨakatuta ko, echa aikuaa mbaetɨ ko ayavɨ Tumpa Iyoambae iporookuai reta.

¹¹ ¿Mbae re ye pa añemomɨ̈ratata, aikoveño vaerä? ¿Jare mbae pa cheräro, chepɨa guasu vɨteriño vaerä?

¹² Mbaetɨ ko chetäta ita reta rami, ani chesoo mbaetɨ ko jiero iyu vae rami.

¹³ Che aeño mbaetɨ chepuere ayererovia katu, mbaetɨ kia chemborɨ vaerä.

¹⁴ Kia oiporara yave, ivɨa-ïru ombopɨakatu, mbaetɨ jókuae oyapo vae, Imbaepuere yae vae güi ko oipoɨuä.

¹⁵ Ërei pe reta chereeya, ɨ̈aka raɨ otini opɨta rami.

¹⁶ Okɨ yave, ɨ juúmbai jɨapu ogüeyɨ vae rami.

¹⁷ Araku yave otini jókuae ɨ̈aka, kuaraɨ jasɨ yave otini opɨta.

¹⁸ Oguata vae reta opia tëi jokotɨ vae, opa ñuu rupi jopa reta.

¹⁹ Temán pegua oguata vae reta oyerovia tëi jese, Sabá pegua reta oyerovia tëi yogüɨraja jókuae ɨ̈aka reta re;

²⁰ ërei oyembotavɨ reta oyerovia tëi jese vae, echa jae reta yogüeru oväe yave joko pe, mbaetɨ oväe reta ɨ.

²¹ Añave, pe reta jókuae ɨ̈aka rami etei ko, peecha yave yavaete chembaerasɨ, pekɨɨye chegüi.

²² Che mbaetɨ etei mbae aiporu peve, mbaetɨ etei jae peve pemboepɨ vaerä cheve akuera vaerä,

²³ ani chereepɨ vaerä tovaicho reta güi, ani oporogüɨrekoasɨ katu vae reta güi.

²⁴ Chemboe, jare tachekïrii, peikuaauka cheve mbae pe pa ayavɨ aï.

²⁵ Mbaepuere güɨnoi ñee reta jupi vae, ërei, pe reta ¿mbae re pa ko pemboeta cheve?

²⁶ ¿Peyemongeta pa pejäa vaerä cheñee reta, che aiporara vae cheñee mbaeä etei ko vae?

²⁷ ¡Pepoki pemee vaerä tɨ̈reɨ, jare pemee vaerä pevɨa-ïru!

²⁸ Añave, pemae cherova re, jare peecha, cheapu ra aï peróvai vae.

²⁹ Peipoepɨ peregüe, agüɨye peyoa; peyemongeta pɨau ye ayapogüe re.

³⁰ ¿Jae pa mbae ikavimbae? ¿Mbaetɨta pa aikuaa mbae ikavimbae reta?