JOB 5 - Biblia Guarani Tumpa Iñee

Elifaz jekuaeñoi omboeta Job pe

¹ Añave, esapúkai; ¿oime ra kia oendu vaerä neñee? ¿Kia araɨgua re ra reyemboyata?

² Añete, yarakuaambae oyeyukauka arasɨ pe, jare imbaepotarai vae ñemoägüɨro pe.

³ Che aecha yarakuaambae omboɨpɨ oiko kavi, ërei jarembae omboɨpɨ jo opa oyemboai.

⁴ Taɨ reta mbaetɨ kia omborɨ; mburuvicha reta mbaetɨ omae kavi jese reta, jare mbaetɨ kia oepɨ reta vaerä.

⁵ Oarɨvogüe jouta chugüi yɨmbɨaɨ vae reta, oekɨ retata yuu ipɨte güi ave, jare imonda vae reta opɨ̈rota imbaeyekou.

⁶ Echa mbɨatɨtɨ mbaetɨ ko oë ɨvɨkúi güi, yemoambeko ave mbaetɨ jeñɨi ɨvɨ güi.

⁷ Kuimbae jeko pegua ko oime tembiporara, tatapiriri oyeapo tata güi rami.

⁸ Che yave aekata tëi ko Tumpa chemborɨ vaerä, jare añonota tëi ko ipo pe maratu aï vae.

⁹ ¡Jae oyapo mbaembae tuichagüe, yaikuaa rapembae vae; jare mɨakañɨ reta oyepapa rapembae vae!

¹⁰ Ombou ama ɨvɨ iárambo vae; jae omongɨ ñana reta re.

¹¹ Paravete vae reta ombotuicha vae; jare ipɨatɨtɨ jëtara imano re vae reta ombopɨakatu vae.

¹² Ipoki ikavimbae oyapo vae reta iyemongeta güɨrokomegua chugüi, agüɨye vaerä mbae oyapo reta.

¹³ Jae oipɨɨ ipoki vae reta jeko pe aeño; jare güɨrokomegua ipɨapochɨ vae reta iyemongeta.

¹⁴ Ara pe ave pɨtumimbi chupe reta, arambɨte pe ave opovɨvɨ oguata reta pɨ̈tu yave rami.

¹⁵ Tumpa güɨroasayepe paravete vae jare oikoasɨ katu vae, jeko pɨ̈chɨi vae reta imbaepuere güi.

¹⁶ Jeseño paravete vae reta oyeko, ¡jae oyokenda jeko pɨ̈chɨi vae reta iyuru!

¹⁷ Mase, oyekou ko jókuae kuimbae Tumpa oiporarauka chupe vae. Jáeramo agüɨye eröɨro Imbaepuere yae ete vae iporonupa.

¹⁸ Echa jae ko oyapo mbaerasɨ pɨ̈chɨi, ërei jae yeño ko oipoano, jae ko oporombopere, ërei jae yeño ko oipoano.

¹⁹ Ndereroasayepe aveita tembiporara güi, tembiporara ngaraa etei maratu ndeapo.

²⁰ Karuai pe ndereroasayepeta mano güi, ñeraro pe ndereroasayepeta mano güi.

²¹ Ñeeasɨ katu güi neovatuta, jare ngaraa rekɨɨye ou yave mbaesusere.

²² Repukata karuai jare mbaesusere reta ou tëi yave, jare ngaraa rekɨɨye mbaeporou reta kaa rupigua güi.

²³ Ita reta ave ngaraa ndemboavai ndeko pe, mɨmba reta ñana rupigua ngaraa maratu ndeapo.

²⁴ Ndero pe opaete mbaembae ojo kavita ndeve, reipapa yave nderɨmba reta ngaraa oata ndeve.

²⁵ Jaeramiño vi renoita jeta neñemuña reta, jeta ñana ɨvɨ re rami.

²⁶ Ndendechi yae pe remanota, trigo yagüɨye ma yave oyemboɨru vae rami.

²⁷ Mase, jae kuae opaete roikuaagüe, jare añetete ko; eyeapɨsaka jese jare eikuaa ndeyeupe.