JOB 42 - Biblia Guarani Tumpa Iñee

Job iyemombeu jare iyembojupi

^1-2 Job jei yandeYa pe: Che aikuaa ndepuere ko opaete; jare mbaetɨ yemongeta oñemi ndegüi vae.

³ ¿Kia pa ko che añova vaerä arakuaa, aikuaambae reve? Jáeramo, che chemiari aikuaambae reve; mbaembae oasa ete ñanemopɨakañɨ vae, che mbaetɨ chepuere aikuaa vae.

⁴ Romoñera reyeapɨsaka vaerä, jare chemiarita; aparanduta ndeve, jare nde chemboeta.

⁵ Aenduse yepi nderegua, ërei añave cheresa ndereecha oï.

⁶ Jáeramo añemotareɨ, jare cheyemongeta aipoepɨ aguapɨ reve ɨvɨkúi jare tanimbu pe, chepɨatɨtɨ güi.

⁷ Jare yandeYa opa güire jei kuae ñee reta Job pe, yandeYa jei Elifaz Temán pegua pe: “Chearasɨ ndekotɨ jare jókuae mókoi neïru reta kotɨ; mbaetɨ ramo pemiari chekotɨ jupi rupi cherembiokuai Job rami.

⁸ Añave peipɨɨ chiu toro raɨ jare chiu vecha kuimbae, jare pekua cherembiokuai Job pɨri, jare perökuavee mbota mɨmba oyeyukagüe opa etei oyeapɨ vae peyé, jare cherembiokuai Job oyerureta peré; echa añetete jae iyerure reño ayeapɨsakata, agüɨye vaerä ayapo ikavimbae peve, echa mbaetɨ pemiari kavi jupi rupi cheré, cherembiokuai Job rami.”

⁹ Jare yogüɨraja Elifaz Temán pegua, Bildad Sun pegua jare Zofar Naamat pegua, oyapo reta yandeYa jei chupe reta rami; jare yandeYa oendu Job iyerure.

Job oï kavi ye vae re

¹⁰ Jare yandeYa güɨnoe Job mbɨatɨtɨ güi, jae oyerure güire ivɨa-ïru reta re; jare omoïru chupe mókoi yoarambo ye opaete imbaembae reta tenonde yave güɨrekose vae güi.

¹¹ Jare yogüeru ípɨri opaete jëtara jare jeindɨ reta, jare opaete tenonde yave rupi oikuaa vae reta, jare okaru reta jae ndive jo pe, ipɨatɨtɨ reta jese, jae ndive oasagüe re, jare ombopɨakatu reta opaete jókuae mbaembae ikavimbae yandeYa ombou jese vae re; jare metei ñavo omee reta chupe korepoti jare moäka-vera oro pegua.

¹² Jare yandeYa iporerekua Job re, oasa ye tenonde vae güi. Echa güɨnoi catorce mil vecha, seis mil camello, mil yoayu güeye, jare mil mburika.

¹³ Jare chiu taɨ reta, jare mboapɨ tayɨ reta.

¹⁴ Jare tenondegua ombojee Jemima, mokoía ombojee Cesia jare mboapɨa jee Keren-hapuc.

¹⁵ Jare opaete ɨvɨ rupi mbaetɨ yé kuña reta ipöra yae vae, Job tayɨ reta rami; jare tu omboyao chupe reta imbaembaerä vae, ikɨvɨ reta ipɨte pe.

¹⁶ Kuae güire Job oiko ye ciento cuarenta año rupi, jare oecha jɨmɨmino reta, jare jɨmɨmino reta jɨmɨmino yoapɨ ye.

¹⁷ Jare Job omano indechi yae pe, jeta año ma güɨnoi yave.