JOB 41 - Biblia Guarani Tumpa Iñee

¹ ¿Ndepuereta ra mbaeporou Leviatán jee vae renoe pinda pe? ¿Ndepuereta ra remoiïcha ikü rupi?

² ¿Ndepuereta ra reitïgua, jare reësɨvo jañɨka rupi tɨ̈ai pe?

³ ¿Nemoñerata ra reiparareko vaerä, ani iñee yeaeä ndeve okɨɨye güi?

⁴ ¿Oñererökuaveeta ra ndeve oiko vaerä nderembiokuairä jekuae avei pegua?

⁵ ¿Remboyaruta ra metei güɨra raɨ rami? ¿Reñapɨtita ra nderayɨ reta, iyuvangata rami?

⁶ ¿Ndepuereta ra remee maemeea pe, jare reyasɨa sɨa remee vaerä?

⁷ ¿Ndepuereta ra reyasɨa kɨse pe ipire? ¿Ani reñɨvo iñäka pe uvɨ itɨ̈ai vae pe?

⁸ Epoko jese, nemaenduata kuae ñeraro re, jare ngaraa ye ma nekɨ̈reɨ reñoraro jae ndive.

⁹ Oipotagüe jembiurai okɨɨye güi, mbaeporou Leviatán oecha vae güiño.

¹⁰ Mbaetɨ kia ipuere oya jese omomba vaerä, mbaetɨ kia ipuere oñeñono jóvai.

¹¹ ¿Oñeñono jóvai vae, oasayepeta ra? ¡Opaete ara igüɨ pe ñogüɨnoi vae, chembae ko!

¹² Chemiarita opaete jete re güɨnoi vae re, jare ipɨ̈rata oyemboyovake rapembae vae re.

¹³ ¿Kia pa ipuereta ipire omboi chugüi, ani oësɨvo ipireäta?

¹⁴ ¿Kia pa ipuereta omboyurupeka, jäi reta oñesɨro yavaete vae?

¹⁵ Ikupe re oñesɨro ipireäta iyeopiaka, oyopɨpɨ jare täta ita rami.

¹⁶ Metei vae oya ïru re, ɨvɨtu mbaetɨ ipuere oipeyu jokoropi.

¹⁷ Oya ñogüɨnoi oyoe, oyepókoi oyoe mbaetɨ ipuere osɨrɨ oyougüi.

¹⁸ Iñächio yave ama-vera rami, jesa reta jembipe, kuaraɨ oë ou vae rami.

¹⁹ Iyuru güi oë tata overa vae, jare tatapiriri.

²⁰ Itï rupi oë tätati, yapepo opupu oï vae güi oë jätati rami.

²¹ Ipɨ̈túe pe omoendɨ tätapɨi, jare iyuru güi oë tataendɨ.

²² Iyayu pɨ̈rata yae, opaete okɨɨye chugüi vae.

²³ Isoo reta ave jayɨ yae, mbaetɨ ipuere oyasɨa.

²⁴ Ipɨa guasu yae ita rami, mbaetɨ omɨi ita oyoso jese vae ita rami.

²⁵ Opüa yave, imbaepuere vae reta okɨɨye jare okɨɨye güi, otekuarai reta chugüi.

²⁶ Kɨsepuku ave mbaetɨ mbae oyapo chupe, mii raɨ, uvɨ ani ïru mbae mbaetɨ mbae oyapo chupe.

²⁷ Jiero kapii ramiño chupe, jare jiero iyu vae, yepea ikúi vae ramiño.

²⁸ Uvɨ reta mbaetɨ ombotekuarai, ita reta pe oyeapi yave, kapii pe oyeapi ramiño chupe.

²⁹ Opaete tembiporu ñeraro pegua, ɨtɨ ramiño chupe, oyóyai jae, mii ipu oyeendu yave.

³⁰ Ipɨtía re güɨnoi ipireäta jaimbe vae, tuyuapo oikɨ̈ti oeya ipɨtía pe.

³¹ Ombopupu ɨguasu, metei yapepo pe ombopupu ɨ rami; metei yapepo pe oyembopupu moa rami.

³² Ɨ rupi jembipe oeya jaɨkuere, morotï tɨrɨyɨi oeya.

³³ Mbaetɨ ɨvɨ iárambo jae rami etei vae; kuae oyeapo okɨɨyembae etei vaerä.

³⁴ Omae jare oyovaicho opaete oyembotuicha vae reta re, jae ko oï opaete ipɨayemboete vae reta iárambo ye.