JOB 40 - Biblia Guarani Tumpa Iñee

¹ Jayave yandeYa jei ye Job pe:

² ¿Ipuereta ra oyoaka Imbaepuere yae ete vae ndive vae? Oyoaka Tumpa ndive vae, toikuaa kuae.

³ Jayave Job jei yandeYa pe:

Job:

⁴ Mase, che mbaeä etei ko nderóvai, ¿mbae pa jaeta ndeve?

⁵ Jeta yae ma chemiari ndeve, mbaetɨ ma cheñee amboyoapɨ ye vaerä.

Tumpa imbaepuere omboyekuaa

⁶ YandeYa ombou iñee Job pe kusumirou mbɨte güi, jei:

⁷ Eyeumbɨkua kavi añave kuimbae rami, aparanduta ndeve jare nde emboyevɨ cheve.

⁸ ¿Mbaetɨ vi pa nde rembojupi cheporojäa, reipota chemboeko, repɨta vaerä jekombae?

⁹ ¿Nepɨ̈rata yae yera chegüi? ¿Neñee täta yae yera cheñee güi?

¹⁰ Jayave eyemonde mburuvicha rami, yemboetea ikavi vae pe eñeova.

¹¹ Emae opaete ipɨayemboete vae reta re, ndearasɨ ikotɨ reta jare emomichi reta.

¹² Emae ipɨayemboete vae reta re, toiko rerea re, eyakambɨ iyoa vae reta ñogüɨnoia rupi.

¹³ Opa eñotɨ reta ɨvɨkúi pe, eyokenda reta omanogüe vae reta ñogüɨnoia pe.

¹⁴ Jayave che etei tarovia vi, ndembaepuere rupi ko reporomoamɨri vae.

¹⁵ Mase, emae mbaeporou Behemot re, che ayapogüe ko, nde roapo rami, ñana jou, güeye reta rami;

¹⁶ emae ikupe re jëguambae yae, opaete jete ipɨ̈rata yae.

¹⁷ Juguai omopɨ̈rata metei ɨ̈vɨrare rami, iurayɨ oyoasaiño.

¹⁸ Ikägüe reta täta, jiero iyu vae rami, ikägüe raɨ raɨ jiero rami.

¹⁹ Jae ko cherembiapo kavi, jaeño che iyapoa chepuere amoamɨri.

²⁰ Ɨvɨtɨ guasu reta omoñemuña ñana reta jembiurä, mɨmba pochɨ vae reta ñogüɨnoia rupi.

²¹ Oputuu küaraɨa reta rupi, oñemi täkuaree-rupa tëɨa rupi ɨvɨ yasurúa rupi.

²² Ɨvɨra reta iküaraɨa tëɨ vae oñova iküaraɨa pe, ɨvɨra sause jee vae ɨ jembeɨ rupigua reta, oyere jese.

²³ Ɨ tuicha yave, jae mbaetɨ okɨɨye, yepe tëi opaete ɨ ɨ̈aka Jordán pegua oupitɨ iñäpɨgua, jae mbaetɨ oyemoambeko.

²⁴ ¿Kia pa ipuereta oipɨɨ, omae oï yave, jare omombu iñäpua?