JOB 4 - Biblia Guarani Tumpa Iñee

Elifaz omboeta Job pe

^1-2 Jayave Elifaz Temán pegua jei Job pe: Romboɨpɨ oremiari ndeve yave jasɨ katuta ndeve; ërei mbaetɨ chepuere chekïriiño apɨta.

³ Mase, nde remboese jeta vae reta; jare remomɨ̈ratase yepi ipɨtu vae reta;

⁴ neñee pe remoäta ngatu yepi ogüɨapi vae, jare ipɨtu vae reta remomɨ̈ratase,

⁵ ërei ngatu añave ou yave ikavimbae ndeve reyemboakɨ; jare ou yave oväe ndeve, ndepɨatɨtɨ.

⁶ Nde, ¿Tumpa güi reipoɨu vae reñoä pa reyeko? ¿Jupi rupi reiko vae reñoä pa ndepɨa reñono?

⁷ Añave nemaendúa: ¿Okañɨtei pa jekombae? Jare, ¿sɨmbi rupi yogüɨreko vae okañɨtei pa?

⁸ Che aecha rami, mbaeyoa jare ikavimbae oyapo vae reta, oarɨvo ko.

⁹ Okañɨtei reta Tumpa ipɨ̈túe rupi, jare iyarasɨ rupi opa oyemboai.

¹⁰ Yepe tëi yaguapope rami iñee reta iyarasɨ güi, ërei Tumpa opa omopë jäi reta.

¹¹ Yaguapope indechi vae omano, oata ramo jembiurä, jare yaguapope kuña imembɨ reta opa oñemoai.

¹² Ñee ou oväe cheve, kia ñanemomiari yandeapɨsa pe rami, ayeapea aendu jókuae ñee.

¹³ Pɨare yave kuimbae reta jopeɨ yae ma yave, chepaɨu chembokepegua.

¹⁴ Kɨɨye yavaetegüe ou cheve, opaete cherete omborɨrɨi.

¹⁵ Ɨvɨtu chepeyu yave, chepirechɨɨ cheapo.

¹⁶ Oyemboɨ cheróvai mbae iä, mbaetɨ chepuere aecha jova. Kïrii ngatu opɨta. Javoi aendu jei:

¹⁷ “¿Ipuere ra kuimbae jupi yae Tumpa güi? ¿Ipuere ra oiko ikɨambae iyapoa jóvai?

¹⁸ Mase, iaraɨgua reta re ave mbaetɨ güɨrovia mbatee, oväe teko iaraɨgua reta re ave.

¹⁹ ¡Vɨtei pa kuimbae, imbaepuerembae vae, o tuyuapo pegua oñemopüa ɨvɨkúi re vae ramiño vae, oñepɨ̈rota jese, kupii re ñapɨ̈ro rami!

²⁰ Ndeimbove yave oime oï, ërei kaaru yave opa okañɨ, okañɨtei jekuae avei pegua, mbaetɨ ye kia imaendúa jese.

²¹ Okañɨtei, ipöra yae tëi reve, omano yarakuaambae reve.”