JOB 39 - Biblia Guarani Tumpa Iñee

¹ ¿Reikuaa pa kërai yave kavara reta ñana rupigua imembɨ oa, reecha pa guasukaka kuña imembɨ oa?

² ¿Reikuaa pa mbovɨ yasɨ ma ipurúa, jare kërai yave oata imembɨ vae?

³ Oyemboapúa jare omombo imembɨ, jare mbaetɨ ye jasɨ chupe.

⁴ Jarembae imembɨ ipɨ̈rata, okuakuaa kaa pe, jare ojo mbaetɨ ye ou.

⁵ ¿Kia pa omaeño mburika ñana rupigua re, kia pa oyora iïcha?

⁶ Che amee oiko vaerä ɨvɨ ipombaea rupi, ɨvɨ yukɨ jenda rupi.

⁷ Oyóyai yóyai täsémbai tëta guasu pe vae, mbaetɨ oendu jariero isapúkai vae.

⁸ Oguata ɨvɨtɨ rupi jembíu katúa rupi, oeka oipotagüe ñana jokɨ vae jembiurä.

⁹ ¿Rerovia pa toro pochɨ vae ndepuere reyókuai, ani repɨta jae ndive jókai pe?

¹⁰ ¿Ndepuereta ra reñono yuvo jese remboara vaerä, ani nderaɨkue ojo omongúi vaerä ɨvɨ?

¹¹ ¿Ndepuereta ra reyerovia jese ipɨ̈rata yae ramo, ani reeya jae oyapo vaerä ndeparavɨkɨ?

¹² ¿Rerovia pa jae omboatɨta ndeve rearɨvogüe, jare oñono ndeavatío pe?

¹³ ¿Nde pa remee pavo real ipepo retarä ipöra yae vae, ani yandu ipepo retarä jare jaa retarä?

¹⁴ Jae omboa ɨvɨkúi rupi, kuaraɨ omboaku ɨvɨkúi yave oya vaerä.

¹⁵ Iñakañɨ kia opɨ̈rota jese vae güi, jare mɨmba reta ipuere ko opɨ̈ro jese jare oyoka vae güi.

¹⁶ Mbaetɨ oyangareko imembɨ reta re, imembɨä rami, mbaetɨ omboyemongeta iparavɨkɨ okañɨ vaerä.

¹⁷ Echa che mbaetɨ amee chupe arakuaa, jare mbaetɨ amee chupe arakuaa katu.

¹⁸ Ërei opüa osɨi yave, oyóyai kavayu jare opo jese reta.

¹⁹ ¿Nde pa remee kavayu pe ipɨ̈rata vaerä, ani remboaruanda ia pe?

²⁰ ¿Remochäguarikota pa metei tuku rami, jókuae iñäpɨgua iñee yavaete vae?

²¹ Ipɨ ipu oyeendu ipe kavía rupi, okɨɨyembae reve ojo ñeraroa kotɨ.

²² Oyóyai oporomongɨɨye vae, mbaetɨ okɨɨye chugüi, mbaetɨ oyerova ye ñeraro güi.

²³ Ipu oyeendu oa jese uvɨ reta, jare mii jiero pegua reta.

²⁴ Iñäkua yae jarembae ojo oväe, yepe tëi oñee mimbɨguasu.

²⁵ Iñee pe omboyevɨ mimbɨguasu iñee, mombɨrɨ güi oëtu ñeraro, jare oendu sundaro ruvicha reta iñee jare täsémbai.

²⁶ ¿Ndearakuaa rupi pa güɨraké oveve, jare ojo arayevɨ kotɨ?

²⁷ ¿Nde pa reyókuai güɨraké ojo vaerä ɨvate oñono jaitɨ?

²⁸ Jae oiko ɨ̈vavira re, ɨ̈vavira iyapɨte re ita guasu re.

²⁹ Joko güi jae omae mombɨrɨ, jare oipïaro jembiarä.

³⁰ Imembɨ reta jou tugüɨ, oime maerëogüe ñogüɨnoia pe, joko pe oï jae.