JOB 37 - Biblia Guarani Tumpa Iñee

¹ Jáeramo chepɨa orɨrɨi, jare oïa jenda pe.

² Peyeapɨsaka Tumpa iñee jɨapu vae re, jɨapu oë iyuru güi vae.

³ Jae omokana opaete ara, jare iama-vera oesape opaete ɨvɨ iyapɨ rupi.

⁴ Kuae jaɨkue rupi oyeendu jɨapu, jɨapu täta yae, oyeendu ma yave jɨapu, jae omokïrii.

⁵ Tumpa iñee jɨapu vae rupi oporomopɨakañɨ yae, oyapo mbae tuicha vae, mbaetɨ yandepuere yaikuaa.

⁶ Echa iroɨ pe jei: “Egüeyɨ ɨvɨ pe”, jaeramiño vi ama ɨvɨtuai ndive vae pe.

⁷ Jökorai kuimbae reta omombɨta jo rupi, oikuaauka vaerä jae ko oyapo vae.

⁸ Mɨmba reta oike oñemi, jare joko pe ñogüɨnoi.

⁹ Arayevɨ kotɨ güi ou kusumirou, jare iroɨ ou ɨvɨtuguasu kotɨ güi.

¹⁰ Tumpa oipeyu ɨvɨtu pe jare opa oñemotäta ɨ reta opa vi oñemotäta.

¹¹ Jae omotɨnɨe amapɨtu ɨ pe jare iama-vera pe omoai ɨ̈vɨti.

¹² Ama-vera oyekuaa ojo oipota rupi ara re, jökorai oyapo Tumpa oyókuai rami, opaete ɨvɨ iárambo rupi.

¹³ Opaete kuae reta rupi Tumpa oiporarauka ɨvɨ pe, ani oechauka vaerä ipɨakavi.

¹⁴ Ndepɨaguasuño Job, jare eyeapɨsaka, jare eyemongeta Tumpa iparavɨkɨ ñanemopɨakañɨ vae re.

¹⁵ ¿Reikuaa pa kërai Tumpa oñono kuae reta, jare kërai jembipe ama-vera amapɨtu re?

¹⁶ ¿Reikuaa pa nde kërai amapɨtu ovevɨi ɨvɨtu re, oporomopɨakañɨ yae arakuaa pe vae?

¹⁷ ¿Maera pa nderemimonde jaku, ara kïrii ngatu yave, arayevɨ jeko pegua?

¹⁸ ¿Reipɨso pa jae ndive ara, jare reeya metei jiero iyu vae oyemboipe kavi rami?

¹⁹ Oremboe mbae roe vaerä Tumpa pe, echa mbaetɨ orepuere mbae roe mbaetɨ roikuaa jeko pegua.

²⁰ Che mbaetɨ eteita chepuere jae chupe chemiari vaerä jae ndive, echa jökorai yave jae ko aipota chemokañɨtei rami.

²¹ Mbaetɨ yandepuere yaecha kuaraɨ oesape vae, amapɨtu oyasoi oï yave; ërei ɨvɨtu oipeyu yave ara oyepea.

²² Ɨvɨtuguasu kotɨ güi oyekuaa ou jembipe iyu vae, Tumpa oñeovauka tembipe yavaetegüe pe.

²³ Imbaepuere yae ete vae regua mbaetɨ yandepuere opa yaikuaa, jae ko tuicha imbaepuere pe vae jare jupi vae; jae mbaetɨ oporogüɨrekoasɨ katu.

²⁴ Jáeramo kuimbae reta oipoɨu chugüi, chupegua mbaeä etei yarakuaa katu oyeapo vae reta.