JOB 36 - Biblia Guarani Tumpa Iñee

Eliú ombotuicha Tumpa

¹ Eliú jekuae imiari ye, jare jei:

² Ndepɨaguasuño cheve räri, romboeta, echa oimeño mbae jae vaerä ndeve Tumpa regua.

³ Aiporuta tuicha rupi chearakuaa, aechauka vaerä cheApoa jaekavi ko oyapo oï vae.

⁴ Echa mbaetɨ ko cheapu aï, nde ndive ko oï yarakuaa katu vae.

⁵ Mase, jae ko Tumpa tuicha vae, ërei mbaetɨ ko oporogüɨröɨro; imbaepuere yae ko arakuaa katu pe.

⁶ Mbaetɨ omeeta tekove iyoa vae pe, ërei oiporara vae ombojupi.

⁷ Ngaraa oeya jupi vae reta; oñonota mburuvicha guasu reta iguapɨa pe jekuae avei pegua, jare ombotuichaukata.

⁸ Ërei oyepokuauka karena pe yave, jare omoäse yave jasɨ katu oï vae,

⁹ Tumpa oechaukata chupe oyavɨgüe, jare këraiägua oyererajauka ipɨayemboete rupi vae.

¹⁰ Imiari chupe reta oyembosɨmbi vaerä, jare jei chupe reta oyepoepɨ vaerä iyoa reta güi.

¹¹ Oendu reta yave jare omboete reta yave, yogüɨreko kavi retata omano regua.

¹² Ërei mbaetɨ yave oendu reta ñee, oyeekɨta tekove chugüi reta, jare omanota yarakuaambae reve.

¹³ Iyoa vae reta iyarasɨ yae, yepe tëi tembipɨɨrɨru pe ñogüɨnoi, mbaetɨ ave oiporu reta yemborɨ.

¹⁴ Jae reta omano taɨrusu reve, ñemomarai pe omano vae reta ipɨte pe.

¹⁵ Tembiporara rupi Tumpa güɨroasayepe oiporara vae, mbae jasɨ katu vae rupi oikuaauka chupe.

¹⁶ Nde nerenoeta vi mbɨatɨtɨ güi ikavía pe, yepi yave reyekou jeta mbae renoi vae pe.

¹⁷ Nderé oyembopo jeko pɨ̈chɨi vae reta oiporarata vae, ngaraa ndepuere reasayepe iporojäa güi.

¹⁸ Jáeramo eipoɨu, agüɨye eyererajauka mbaeyekou pe, ani korepoti jeta reipɨɨ vɨari vae rupi.

¹⁹ Mbɨatɨtɨ pe, ngaraa osirive ndeve ndesapúkai, ani opaete reyemoambeko jese vae.

²⁰ Agüɨye eipota pɨ̈tu, jeta vae reta opa okañɨ jenda güi yave.

²¹ Eyeandu, agüɨye eyerova ikavimbae kotɨ, echa kuae jeko pegua reiporara.

²² Mase, Tumpa tuicha ko imbaepuere pe, mbaetɨ kia oporomboe vae ipuere omboyovake;

²³ mbaetɨ kia ipuere jei chupe: “Kuae eyapo”, ani güɨröɨro iparavɨkɨ chugüi.

²⁴ Opaete vae omboete iparavɨkɨ rupi, nemaendúa vi nde remboete vaerä.

²⁵ Opaete vae ipuere oecha jae iparavɨkɨ, yepe tëi mombɨrɨ güi.

²⁶ Tumpa tuicha yae ko, mbaetɨ yandepuere yaikuaa opaete jesegua, mbaetɨ vi yandepuere yaipapa iaño.

²⁷ Jae omboɨru otɨkɨ vae ɨ jɨru pe, javoi oipoepɨ amarä.

²⁸ Ama okɨ amapɨtu reta güi, jare oa jeta ɨ kuimbae reta re.

²⁹ ¿Kia pa ipuere oikuaa amapɨtu oñemoai vae re, ani, maera pa jɨapu ara vae?

³⁰ Mase, Tumpa omboyekuaa iama-vera amapɨtu re, jare oeya pɨtumimbi pe ɨguasu jugua.

³¹ Kuae reta rupi Tumpa oyangareko jeta vae reta re, jare jeta omee tembíu.

³² Amapɨtu reta pe oyasoi tembipe, oyókuai agüɨye vaerä oesape, jae oipota rami etei.

³³ Ama-rɨapu omoërakua jae oime ko oï vae, jare ama ɨvɨtuai reve vae omombeu jae iyarasɨ mbaeyoa kotɨ vae.