JOB 35 - Biblia Guarani Tumpa Iñee

Eliú iñemoñee mboapɨa

¹ Eliú imiari ye jae oyemongeta rami, jei:

² ¿Reyemongeta pa jaekavi rere vaerä: “Jupi ko che Tumpa güi”?

³ Echa rere: “¿Maera reyangareko cheré cheyoa yave, mbae pe pa ndemboavai cheyoa?”

⁴ Che tamboyevɨ ndeve ndeyemongeta, jare ndevɨa-ïru reta pe vi.

⁵ Emae ara reta re, emae kavi jese, mombɨrɨ opɨta amapɨtu reta ndegüi.

⁶ Ndeyoa yave, mbaetɨ mbae reyapota Tumpa pe, jeta reyembopɨapochɨ ikotɨ vae pe ngaraa remboavai.

⁷ Jupi reiko yave, ¿mbae pa remeeta chupe, ani mbae pa oipɨɨta ndegüi?

⁸ Kuimbae reta nde rami vae rerokomeguata ndeyoa pe, ani jupi vae reyapo vae rupi yogüɨreko kavita.

⁹ Kuimbae reta osapúkai yogüɨrekoasɨ katu jeko pegua, oeka reta kia güɨroasayepe vaerä imbaepuere vae reta güi;

¹⁰ ërei mbaetɨ oeka reta Tumpa jae iyapoa, omee yerovia pɨ̈tu yave vae,

¹¹ oporomboe mɨmba reta rupi vae, oporomboarakuaa güɨra reta rupi vae.

¹² Jáeramo osapúkai reta yave, Tumpa mbaetɨ omboyevɨ chupe reta, echa jae reta ko kuimbae jeko pochɨ jare iyemboete iyé vae.

¹³ Tumpa Imbaepuere yae ete vae, mbaetɨ oendu jupimbae; mbaetɨta omae jókuae nunga reta re.

¹⁴ Nde rere mbaetɨ reecha Tumpa vae, ndereko reta ñogüɨnoi ko jae jóvai, jáeramo eäroño.

¹⁵ Añave ikaviño, echa mbaetɨño oiporarauka iyarasɨ rupi, mbaetɨño oyangareko mbatee oyovaicho jae ndive vae re.

¹⁶ ¡Job, nemiari mbateeiño ma, nemiariiño ma ndearakuaambae reve!