JOB 34 - Biblia Guarani Tumpa Iñee

Eliú iñemoñee mokoía

¹ Jayave Eliú jekuae jei ye:

² Peyeapɨsaka cheñee re yarakuaa katu vae reta, jare pe peyemboe vae reta peyeapɨsaka kavi cheré.

³ Echa yandeapɨsa rupi ko yaendu ñee reta, jare ñaneäpeku pe yaikuaa tembíu jëe ngatu vae.

⁴ Jökorai vi yande reta ñamae kavi kuae oasa oï vae re, jare yaiparavo jaekavi vae.

⁵ Echa Job jei: “Jekombae ko che, ërei Tumpa mbaetɨ chembojupi.

⁶ Cheaputa apɨta ayemboeko yave jupimbae reve, chepere reta mbaetɨ okuera, yepe tëi mbaetɨ cheyoa.”

⁷ ¡Mbaetɨ kia Job rami vae! Yavaiä etei oyóyai yóyai Tumpa, kia ɨ jou ramiño.

⁸ Jae ojo oñemoïru jeko pɨ̈chɨi vae reta ndive, jare oguata iyoa vae reta ndive.

⁹ Echa jei: “Kuimbae mbaetɨta mbae oväe, oipota ombopɨakatu Tumpa vae.”

¹⁰ Jáeramo, pe yarakuaa katu vae reta, peyeapɨsaka cheré, ¡agüɨye peyemongeta Tumpa Imbaepuere yae ete vae kotɨ, oyapota ikavimbae vae ani jupimbae vae!

¹¹ Echa jae omboepɨta kuimbae pe iparavɨkɨ rupi, metei ñavo jeko rupi kavi.

¹² Añete, Tumpa Imbaepuere yae ete vae, ngaraa oyapo ikavimbae ani jupimbae.

¹³ ¿Kia pa omee ipo pe ɨvɨ? ¿Kia jeia re pa oï kavi opaete ɨvɨ?

^14-15 Kuimbae reta güi opɨ̈ro yave tekove, opaete vae oyovake omanota, jare yogüɨraja yeta ɨvɨkuirä.

¹⁶ Nde ndearakuaa katu yave, eyeapɨsaka; eyeapɨsaka kavi cheñee reta re.

¹⁷ Tumpa omotareɨ ko jupi vae yave, mbaetɨ ipuere oporookuai, ¿kërai pa ndepuere rejäa jupi yae ete vae?

¹⁸ Mburuvicha guasu reta jare mburuvicha reta ipɨapochɨ, Tumpa jeita chupe reta jova pe etei.

¹⁹ Jae mbaetɨ oñeñono mburuvicha reta ndive, mbaetɨ vi omborɨ oikokatu vae reta paravete vae reta güi, echa jae jembiapo ko opareve.

²⁰ Kuimbae reta aramoete omano, pɨare mbɨte yave jäsémbai vae jare oasa, Tumpa oitɨ imbaepuere yae vae, mbaetɨ reve kia omborɨ.

²¹ Tumpa omae opaete vae iguata re, jae oecha opaete vae jembiapo.

²² Mbaetɨ ketɨ pɨtumimbía pe, ipuere oñemi mbaeyoa oyapo vae.

²³ Tumpa mbaetɨ ombojee ara kuimbae pe, oñeñono vaerä jóvai oñejäauka vaerä.

²⁴ Jae omboaita imbaepuere yae vae oparandumbae reve chupe, jare jekovia pe oñonota ambuae vae.

²⁵ Tumpa oikuaa opaete jembiapo reta, pɨ̈tu yave ou jare opa omokañɨtei reta.

²⁶ Jeko kavimbae reta rami oinupa, opaete vae reta jovake.

²⁷ Echa oeya reta Tumpa, jare mbaetɨ oyemongeta reta oyapogüe re.

²⁸ Paravete jare yogüɨrekoasɨ katu vae reta jäse, ojo oväe Tumpa jóvai, jare jae oendu.

²⁹ Tumpa mbaetɨ mbae oyapo yave, ¿kia pa ojäata? Oñomi jova yave, ¿kia pa oechata? Jae omae jeta vae re jare kia ñavo re,

³⁰ agüɨye vaerä oporookuai tëta re, metei jeko pɨ̈chɨi vae oporombotavɨ vaerä.

³¹ Jayave ikavi jei Tumpa pe vae: “Chetavɨ ma, ngaraa ye ma cheyoa.

³² Chemboe mbaetɨ aikuaa vae re, ikavimbae ayapo yave, ngaraa ma ayapo ye.”

³³ ¿Reipota yera Tumpa omboepɨ ndeve, nde reipota rami, yepe tëi nde reröɨro? Echa nde rereaño oiko, mbaetɨ che, ere oreve reikuaa yave.

³⁴ Kuimbae yarakuaa vae reta oyeapɨsaka cheré, yarakuaa katu vae reta jeita cheve:

³⁵ “Job oikuaambae reve imiari; iñee reta mbaetɨ etei jaekavi.

³⁶ ¡Job toikuaa kavi iyegua, echa iñee reta jae ko jeko pochɨ vae iñee!

³⁷ Job jaeñoä ko iyoa jae ko oyembopɨapochɨ vae, yanderóvai oyóyai yóyai Tumpa, jare oyoaka jae ndive.”