JOB 33 - Biblia Guarani Tumpa Iñee

Eliú oikura Job

¹ Jáeramo, Job eyeapɨsaka opaete cheñee reta re; eyeapɨsaka opaete jaeta ndeve vae re.

² Oime ma ñee anoi amboyevɨ vaerä ndeve.

³ Chepɨa pe yemongeta anoi vae jaeta jupi rupi, jare chemiari yave chemiarita añete vae.

⁴ Tumpa ko cheapo, Imbaepuere yae ete vae ko omee tekove cheve.

⁵ Ndepuere yave emboyevɨ ñee cheve, eyeapokatu yayoaka vaerä.

⁶ Mase, che jare nde yayovake ko Tumpa jóvai, che cheapo vi tuyuapo güi.

⁷ Jayave agüɨye ekɨɨye chegüi, ngaraa ayapouka ndeve che jaegüeño.

⁸ Che aendu ko reregüe, opaete jókuae rere vae aendu körai:

⁹ “Ikɨambae ko che, jupi vae ko che, jekombae ko che, jare mbaetɨ oñeväe mbaeyoa cheré.

¹⁰ Ërei Tumpa oeka mbae re chemboeko vaerä, jare cherenoi jovaicho rami;

¹¹ oñono chepɨ ɨvɨrakua pe, jare omae opaete ayapogüe re.”

¹² Ërei kuae rere vae mbaetɨ ko jupi, echa Tumpa tuicha ko iyemongeta pe kuimbae güi.

¹³ ¿Maera pa nderovaicho pota jese? Jae mbaetɨ etei oyangareko reregüe re.

¹⁴ Ërei ngatu Tumpa opaño mbae rupi imiari, ërei mbaetɨ kia oipota oikuaa.

¹⁵ Ámope pɨ̈tu yave imiari mbaɨu rupi ani mbae oyekuaa vae rupi, kuimbae reta oke yave, topeɨ oyaporai yave.

¹⁶ Jayave ko Tumpa oenduka iñee kuimbae pe, oechauka chupe oyavɨgüe jare okɨɨye,

¹⁷ opia vaerä jembiapo ikavimbae güi, agüɨye vaerä oyemboete.

¹⁸ Jökorai oepɨ vaerä tɨvɨa güi, güɨroasayepe vaerä mano güi.

¹⁹ Ámope Tumpa oporombosɨmbi mbaerasɨ rupi. Mbae jasɨ avei opaete jete pe vae rupi.

²⁰ Güɨröɨrouka chupe tembíu, tembíu oyúe yae yepi vae.

²¹ Ipiru yae, isoo opa okañɨ, ikägüe oyekuaa, tenonde yave mbaetɨ oyekuaa vae.

²² Köiño ma oï tɨvɨa güi, jare jekove, mano güi.

²³ Ërei oime yave köiño oï chugüi metei araɨgua, jeta vae güi metei timiari kavi chupe, kërai oiko vaerä vae re.

²⁴ Toiparareko jare tei Tumpa pe: “Eroasayepe tɨvɨa güi, echa aväe chupe oepɨ vae.”

²⁵ Jayave jete okuera yeta, oiko yeta tenonde taɨrusu yave oikose rami.

²⁶ Oyerure Tumpa pe yave, jae oenduta chupe; omboeteta Tumpa yerovia ndive, jare otairarita kuimbae reta pe Tumpa ipɨakavi re.

²⁷ Jae omae opaete kuimbae re, jare nde rere: “Cheyoa, ayavɨ, ërei Tumpa mbaetɨ oiporarauka cheve,

²⁸ ërei ngatu chereroasayepe mano güi, jare aikoveño.”

²⁹ Jökorai Tumpa omae kuimbae re mbovɨ ye rupi,

³⁰ güɨroasayepe mano güi, omaeño oikove.

³¹ Eyeapɨsaka kavi cheré Job, eñemokïrii chemiari ramboeve.

³² Oime mbae rere vaerä yave, nemiari, jaekavi rere yave che amaeñota nderé;

³³ ërei mbaetɨ yave, eyeapɨsaka cheré nekïrii ngatu reve, jare che toromboe ndearakuaa katu vaerä.