JOB 32 - Biblia Guarani Tumpa Iñee

Eliú oyembojupi omboyevɨ vaerä ñee Job pe

¹ Kuae mboapɨ kuimbae reta opa ikuérai omboyevɨ ñee Job pe, jae oyembojupi ramo iyeugüi aeño.

² Jayave Eliú, Baraquel taɨ buzita Ram iñemuña pegua, iyarasɨ Job kotɨ; iyarasɨ echa jae mbaetɨ oyemboeko Tumpa jóvai.

³ Jaeramiño vi iyarasɨ mboapɨ Job ivɨa-ïru reta kotɨ, echa mbaetɨ oväe reta ñee omboyevɨ vaerä Job pe, yepe tëi jae reta ojäa Job.

⁴ Eliú taɨrusu ramo, oäro ïru reta opa vaerä imiari Job ndive;

⁵ ërei Eliú oecha yave jókuae mboapɨ vae reta mbaetɨ ipuere omboyevɨ ñee Job pe; jae iyarasɨ

⁶ jare omboɨpɨ omoë iñee, jei: Che chetaɨrusu jare pe reta pekuakuaa ma, jáeramo akɨɨye jare aipoɨu amombeu cheyemongeta.

⁷ Che jae cheyeupe: “Timiari oikuaa ma kuae teko vae reta; jare ɨma ma yogüɨreko vae reta tomboyekuaa iyarakuaa.”

⁸ Añete, opaete kuimbae oime güɨnoi arakuaa, echa Imbaepuere yae ete vae oikuaauka chupe.

⁹ Mbaetɨ kia ɨma oiko güiño yarakuaa, ani indechi güiño oikuaa jupi vae.

¹⁰ Jáeramo che jae peve: “Peyeapɨsaka cheré, tamombeu vi peve arakuaa anoi vae.”

¹¹ Che ayeapɨsaka kavi yae peré, aendu peyemongeta reta, jare aecha peeka ñee jaekavi vae pemboyevɨ vaerä.

¹² Jare aecha pegüi reta metei ave mbaetɨ pemboyevɨ kavi Job pe pemiari yave.

¹³ Agüɨye vaerä peyererovia katu arakuaa pe, Tumpa ko omboyevɨta chupe mbaetɨ ko kuimbae.

¹⁴ Ërei Job mbaetɨ vi mbae jei cheve, jare che mbaetɨ vi amboyevɨta ñee chupe, pe reta rami.

¹⁵ Job, kuae mboapɨ reta oyembojopa ñogüɨnoi, jare oata chupe reta ñee omboyevɨ vaerä ndeve;

¹⁶ ërei agüɨye ere che chekïriita jae reta kïrii ramo, echa iñeembae opɨta reta.

¹⁷ Jáeramo che vi tamoë cheñee, che vi tae cheyemongeta.

¹⁸ Jeta yae ñee reta anoi, mbaetɨ ma chepuere chekïrii.

¹⁹ Vino, jɨru pe ipɨ̈tuembae oï rami aï, jɨru mɨmbapire pegua osorota ma oï rami.

²⁰ Chemiarita chepɨakatu vaerä, amboyevɨta ndeve neñee.

²¹ Mbaetɨta kia aepɨ, oyovake chemiarita peve.

²² Echa mbaetɨ aikatu aporombotuicha, ¡echa jökorai yave, aramoete yandeapoa oiporaraukata cheve!