JOB 31 - Biblia Guarani Tumpa Iñee

Job omomɨ̈rata jupi oiko vae

¹ Ayapo morogüɨrökuavee cheyeupe, agüɨye vaerä amae kuñatai re.

² Echa, ¿mbae pa Tumpa Imbaepuere yae ete vae omeeta cheve ɨvate güi?

³ ¿Jeko pɨ̈chɨi vae retaä yera osusereta, ani iyoa vae reta?

⁴ Jae oikuaa opaete chereko, jare opaete ayapogüe.

⁵ Cheapu ra aiko vae, jare cherangai ra aja ambotavɨ kia.

⁶ Tumpa tachejäa imbaejäaka jupi vae pe, jare jökorai toikuaa cherekombae vae.

⁷ Apia ra tape isɨmbi vae güi, chemoamɨri ra mbaepotarai, oime ra mbae ambuae oñeväe chepo pe.

⁸ Ïru vae reta tou, che añotɨgüe jare topa toapomondoro cheremitɨ.

⁹ Kuña pe añemoamɨriuka yave, ani aipïaro aiko cherapicha jembireko yave,

¹⁰ cherembireko toiko ïru vae jembiokuairä, jare ketɨgua toyapakua toke jae ndive.

¹¹ Echa ayapogüe ngaraa jërakua kavi, jupi ko oporojäa vae reta oiporarauka vaerä kuae re.

¹² Echa tata oporomboai rami vae ko, omboaita Abadón ave, omboaita opaete mbae anoi vae.

¹³ Aröɨro ra cherembiokuai kuimbae ani kuña reta jupi jei vae, oyoaka reta yave che ndive.

¹⁴ ¿Mbae ra ayapota Tumpa chejäa yave? ¿Mbae ra jaeta oparandu cheve yave?

¹⁵ Chesɨ jɨe pe cheapo vae, ¿jae viä pa oyapo jae reta? ¿Metei vaeñoä yera oreapo vae?

¹⁶ Paravete vae reta amborɨ mbae oata chupe yave, mbaetɨ amaeño imemano vae reta oiporara yɨmbɨaɨ.

¹⁷ Mbaetɨ che aeño akaru, amee vi okaru tɨ̈reɨ reta.

¹⁸ Chetaɨrusu güive tɨ̈reɨ reta pe aiko tu rami, jare imemano vae reta re ayangareko.

¹⁹ Aecha yave amogüe pe oata temimonde, ani paravete vae pe oata asoya,

²⁰ chevecharaagüe pe oyemonde reta, jare oyerovia opɨta che ndive.

²¹ Mbaetɨ amomburu tɨ̈reɨ, aecha tëi mburuvicha oporojäa vae reta ipuere chemborɨ.

²² Kuae reta mbaetɨ añete yave, cheyɨva reta toa chegüi, toyeekɨ cheatiɨ güi.

²³ Che akɨɨye Tumpa iporonupa güi; ngaraa chepuere aropɨa jae oñonogüe.

²⁴ Mbaetɨi oro re añono chepɨa, jare jae cheyeupe: “Kuae re taiko.”

²⁵ Mbaetɨi jae cheyeupe: “Tayemboikokatu yae, ani tanoi jeta korepoti.”

²⁶ Aecha kuaraɨ jembipe, jare yasɨ omoembipegüe.

²⁷ Ërei mbaetɨ amboete vɨari aiko, ani chepo aupi ikotɨ amboete vaerä.

²⁸ Kuaekuae reta jupi ko oñejäauka vaerä, ¡echa aröɨrota tëi ko viña Tumpa ara pe oï vae!

²⁹ Mbaetɨi ayóyai cherovaicho osusere oï yave, ani ayerovia ikavimbae pe oï yave.

³⁰ Mbaetɨi ayepopeyu jese, ani aipota omano vaerä.

³¹ Oike yave kia oiko che ndive vae, oipota oyuvanga ketɨgua re,

³² che mbaetɨ amaeño opɨta ikatu pe pɨ̈tu yave, jekuaeño aipea cheröke oguata vae reta pe.

³³ Mbaetɨ añomi ayavɨgüe kia reta güi, ïru reta rami, mbaetɨ ayemongeta añomi areko vaerä.

³⁴ Echa akɨɨye jeta vae reta güi, jare chemongɨɨye chero pegua reta chereröɨro vae chekïrii, jare mbaetɨ aë chero güi.

³⁵ ¡Oime mona kia oyeapɨsaka cheré! Aikuatiata opaete jaegüe: Añave Imbaepuere yae ete vae timiari cheré, jare cherovaicho reta toikuatía tupapire cheregua.

³⁶ Añete che ko avoɨta opaete kuae reta, jare tañono cheyé äka-regua rami.

³⁷ Che aï kavita Tumpa ndive opaete ayapogüe re, metei mburuvicha re rami ayemboyata ikotɨ.

³⁸ Cheɨvɨ mbaetɨ oñeapo cheré, temitɨ reta ñogüɨnoi pɨpe vae mbaetɨ vi ipɨatɨtɨ.

³⁹ Ërei oime ra kia güi añomi jemitɨ iagüe, ani apɨ̈ro iya reta güi.

⁴⁰ ¡Cheɨvɨ pe toñemuña yuu trigo jekovia pe, jare ñana cebada jekovia pe! Kuae pe Job opa imiari iyegua.