JOB 3 - Biblia Guarani Tumpa Iñee

Job iñeeasɨ katu arakae oa vae re

^1-2 Jaɨkue rupi Job omoë iñee; iñeeasɨ katu arakae oa vae re, jare jei:

³ ¡Amotareɨ jókuae ara aa pɨpe vae! ¡Amotareɨ jókuae pɨ̈tu chesɨ ipurúa pɨpe vae!

⁴ ¡Maera ra Tumpa oipoepɨä pɨtumimbi pe, maera ra jae oyangareko jese ara güi, maera ra pɨtumimbiä opɨta jókuae ara!

⁵ ¡Maera ra pɨtumimbi reta omopɨ̈chɨiä jókuae ara, jare amapɨtu jüu vae oñovaä jókuae ara, pɨtumimbi yavaetegüe omboavaeteä jókuae ara!

⁶ ¡Maera ra pɨtumimbi reta omokañɨä jókuae pɨ̈tu, jare jókuae ara agüɨye oyepapa ïru ara reta ndive!

⁷ ¡Ani jókuae pɨ̈tu topɨta mbaetɨ mbae oyeapo pɨpe vae, jare amogüe agüɨye toyerovia jókuae pɨ̈tu!

⁸ ¡Maera ra oyepopeyuä jókuae pɨ̈tu re ara re oyepeyu vae reta, oyeapokatu omomba reta vaerä mbaeporou Leviatán jee vae!

⁹ ¡Yasɨtata köe jerúa agüɨyeta tëi oë, tembipe oñeäro tëi vae agüɨyeta tëi ou, yasɨtata köembiya ave agüɨyeta tëi jesape!

¹⁰ ¡Echa omaeño aa chesɨ güi, jare omaeño aecha jeta tembiporara!

¹¹ ¿Maera ra amano voiä chesɨ jɨe pe, ani aa yave?

¹² ¿Maera ra tava reta oï aa jese vaerä, jare kambɨ reta akambu jese vaerä?

¹³ Jökorai yave amanota tëi ko aï añave, jare aputuuta tëi ko aï; aketa tëi jare aputuuta aï tëi.

¹⁴ Mburuvicha guasu reta jare oporomboarakuaa vae reta ndive, omopüa pɨau ye iyeupe o oyemboaigüe vae.

¹⁵ Ani mburuvicha reta güɨnoi oro vae ndive, jo reta omotɨnɨe korepoti pe vae.

¹⁶ ¿Maera ra mbaetɨ aasa michia okua ichɨ güi vae rami, michia raɨ omano voi oa vae rami?

¹⁷ Tɨvɨa pe, iyoa vae reta mbaetɨ ma oporombopɨatɨtɨ, jare joko pe oputuu oyemoambeko yae vae reta.

¹⁸ Joko pe vi oputuuta tembipɨɨ reta, ngaraa ma oendu reta oporomombaravɨkɨ vae iñee.

¹⁹ Joko pe ñogüɨnoi paravete vae reta jare oikokatu vae reta, jare tembipɨɨ oiko pɨagüive iya güi.

²⁰ ¿Maera ra Tumpa omaeño oikove oiporara vae? Jare jekuaeño oikove ipɨatɨtɨ yae vae reta,

²¹ mano oäro tëi vae reta pe, mano mbaetɨ ou, yepe oeka reta tëi mbaeyekou oeka vae rami.

²² Oyerovia yae reta, jare ovɨakatu reta tɨvɨa pe ojo ma oväe yave.

²³ ¿Maera ra kuimbae oikove, jókuae mbaetɨ oikuaa kerupi ko ojota vae, Tumpa opa oyokenda jape chugüi vae?

²⁴ Cheä-yekɨiño tenonde cheve akaru vaerägüe; chepüae reta mbaetɨ opɨta ɨ osɨrɨ vae rami.

²⁵ Akɨɨyese chugüi vae reta ou oväe cheve, ou oasa che ndive akɨɨyese chugüi vae.

²⁶ Mbaetɨ chepɨakatu, mbaetɨ aï kavi, mbaetɨ aputuu; jaeño ou cheve mbɨatɨtɨ.