JOB 28 - Biblia Guarani Tumpa Iñee

Kuimbae oeka arakuaa katu

¹ Añete, korepoti oime jenda ɨvɨgüɨ pe, oro oime kia pe oyembokavi vaerä.

² Jiero oyeekɨ ɨvɨ güi, jiero iyu vae oyeapo ita oyemondɨkui vae güi.

³ Kuimbae reta omboesape pɨtumimbi yae vae reta, ogüeyɨ reta ɨ́vɨkotɨ pɨtumimbi yaea pe, jare joko pe oeka ita reta.

⁴ Oyoo reta korepoti jenda, mbaetɨ kia ojo oväea pe mombɨrɨ tëta guasu reta güi, oyembosagüɨu tɨmasa pe ogüeyɨ joko pe.

⁵ Ɨvɨ iarambogua ete omoñemuña tembíu, ërei igüɨ kotɨ güɨnoi tata rami.

⁶ Joko pe oï ita reta zafiro jee vae, jare ikuigüe reta oro yepeai.

⁷ Güɨraké reta ani uruapúa reta ave, mbaetɨ oikuaa ani oecha jókuae jenda.

⁸ Mɨmba pochɨ vae mbaetɨ oguata jokoropi, yaguapope ave mbaetɨ oasa jokoropi.

⁹ Kuimbae reta oyavɨkɨ ita reta, omokana ɨvɨtɨ guasu reta.

¹⁰ Omombu reta ɨ̈vavira, jare oväe reta oipotagüe mbae jepɨ vae.

¹¹ Oyopia reta ɨ̈aka, oyemboɨpɨa pe, jare omboyekuaa reta oñeomigüe.

¹² Ërei, ¿ketɨ güi pa ou arakuaa? ¿Kia pe pa oï arakuaa katu?

¹³ Kuimbae mbaetɨ oikuaa kuae arakuaa katu ikavi ko vae, mbaetɨ ko oñeväe kuae ɨvɨ pe.

¹⁴ Ɨvɨkua guasu jei: “Che mbaetɨ anoi.” Ɨguasu jei: “Mbaetɨ oï che ndive.”

¹⁵ Mbaetɨta oñemee oro re, mbaetɨta vi jepɨ korepoti ipoɨ rami.

¹⁶ Mbaetɨ ipuere yagua oro Ofir pegua pe, ani ita jepɨ vae ónice jee vae pe ani zafiro jee vae pe.

¹⁷ Jepɨ yae ko oro güi ani ita jësaka vae güi, mbaetɨta oyepoepɨ mbae jepɨ vae ndive.

¹⁸ Arakuaa katu jepɨ yae ïta ɨ rupigua güi, ani ita reta jepɨ yae vae güi.

¹⁹ Mbaetɨ omboyovake ita ipöra vae Etiopía pegua. Mbaetɨ ipuere oyemboepɨ ita jepɨ yae vae pe.

²⁰ ¿Ketɨ güi pa outa jayave arakuaa? ¿Ketɨ pa oime oï arakuaa katu jenda?

²¹ Echa oñeomi oï opaete oikove vae reta güi, jare opaete güɨra reta güi.

²² Oporomokañɨtei vae Abadón jare mano jei reta: “Jërakua yae vae roenduiño jesegua.”

²³ Ërei Tumpa oikuaa arakuaa jape, jare jae oikuaa kia pe oï vae.

²⁴ Echa jae omae opaete ɨvɨ iyapɨ rupi, oecha mbovɨ ko mbae ñogüɨnoi ara igüɨ pe vae.

²⁵ Ɨvɨtu pe omee ipɨ̈rata vaerä, jare oñono ɨ jembeɨ.

²⁶ Jae oñono mborookuai reta ama reta pe, jare ama-vera reta jare ararɨapu reta japerä.

²⁷ Jayave jae oecha arakuaa oecha vi jepɨ, omae kavi jese jare oñono kavi jenda pe.

²⁸ Mase, arakuaa jae ko yandeYa güi oipoɨu vae, jare arakuaa katu oyembosɨrɨ ikavimbae vae güi vae.