JOB 26 - Biblia Guarani Tumpa Iñee

Job omoërakua Tumpa ko güɨnoi mbaepuere opaete re

¹ Job jei:

² ¿Rerovia pa körai remborɨ ipuerembae? ¿Kërai pa reepɨ ipɨtu vae?

³ ¡Reikatu yae reporomboarakuaa, remboe yarakuaambae!

⁴ ¿Kia pa ndemborɨ rere vaerä jókuae ñee? ¿Kia pa ndemboe nemiari vaerä jökorai?

Bildad:

⁵ Omanogüe vae reta orɨrɨi okɨɨye güi ɨvɨ igüɨ rupi, ɨguasu reta jare pɨpegua reta orɨrɨi okɨɨye güi.

⁶ Omanogüe vae reta ñogüɨnoia oyepea oï Tumpa jóvai, oporomokañɨtei vae Abadón mbaetɨ ipuere oñomi chugüi.

⁷ Jae oipɨso ara ɨvɨtuguasu kotɨ, jare ɨvɨ ombosagüɨu ipombaea re.

⁸ Ɨ reta oñono iamapɨtu re, jare amapɨtu reta mbaetɨ osoro ɨ ipoɨ güi.

⁹ Ombopɨtumimbi yasɨ, oñova amapɨtu pe.

¹⁰ Oñono ɨguasu, omboyao vaerä tembipe jare pɨtumimbi.

¹¹ Ara iyokoka reta orɨrɨi, jare okɨɨye jae oñeengata yave.

¹² Jae oipɨguara ɨguasu imbaepuere pe, ipoki rupi omoamɨri mbaeporou Rahab.

¹³ Iɨvɨtu pe ara otupei, jae oyuka mboi ñɨma iñäkua yae vae.

¹⁴ Kuae opaete jembiapo reta güi añave oyekuaa vae, mbovɨ yae ko, jókuae yaendu vae, jae ko michi jɨapugüeño. Ërei jɨapu yave imbaepuere, ¿kia pa ipuereta oikuaa?