JOB 24 - Biblia Guarani Tumpa Iñee

Job güɨroäse Tumpa mbaetɨ ikavimbae ombopɨa-kërai vae

¹ ¿Maera ra Imbaepuere yae ete vae mbaetɨ oñono ara oporojäa vaerä, ipuere vaerä oikuaa vae reta oecha jae iporojäa?

² Jeko kavimbae reta güɨrosɨrɨ iɨvɨ jembeɨ ïru iɨvɨ kotɨ, oñomi reta mɨmba, omoïru vaerä jɨmba reta.

³ Tɨ̈reɨ reta imburika güɨraja chugüi, imemano vae igüeye opɨ̈ro reta chugüi.

⁴ Oyerure mbae re vae reta osɨrɨ oïa güi, jare opaete paravete vae reta oñemi.

⁵ Paravete vae reta mburika ñana rupigua rami ñuu rupi, ndei köe mbove oë reta oeka jembiurä, kaa ipombae vae rupi oeka reta tembíu taɨ reta peguarä.

⁶ Oyevɨka reta ko ambuae vae rupi, oyevɨka reta jeko pɨ̈chɨi vae reta iuvarupa rupi.

⁷ Pɨ̈tu yave oke reta iyasoyambae, mbaetɨ oyasoi reta iroɨ güi.

⁸ Ɨvɨtɨ rupi opa ama omoäkɨ reta, jare oñemi reta ita igüɨ rupi.

⁹ Jeko kavimbae reta opɨ̈ro imemano vae reta güi imembɨ raɨ, jare paravete vae reta güi opɨ̈ro imbaembae.

¹⁰ Paravete vae oguata nandi, yɨmbɨaɨ güɨraja ramboeve trigo.

¹¹ Omboyere reta ita ombaeso vae oekɨ reta vaerä asaite, opɨ̈ro reta uva re oñetɨamía pe, oyapo vaerä vino, jare ɨuve oyuka reta.

¹² Tëta guasu güi jäse omano pota vae reta, jare ipere vae reta oiporu yemborɨ, ërei Tumpa mbaetɨ oendu chupe iyerure.

¹³ Oime amogüe reta güɨröɨro tembipe, mbaetɨ oipota oikuaa reta Tumpa jape, mbaetɨ opɨta reta jape pe.

¹⁴ Oporoyuka vae ndei köe mbove opüa oyuka paravete vae, jare pɨ̈tu yave omaeñomi.

¹⁵ Menda re oyuvanga vae oäro pɨtumimbi vae, oñova kavi jova, oyemongeta jayave ngaraa kia oikuaa.

¹⁶ Imonda vae oike pɨ̈tu yave o reta rupi, ara pe oyeokenda reta o pe, tembipe jovaicho reta ko.

¹⁷ Chupegua reta ara jembipe vae pɨtumimbi yae vae rami ko; oipota reta mbae ikavimbae pɨ̈tu pegua.

Zofar:

¹⁸ Ɨ güɨraja jeko pɨ̈chɨi vae reta, iɨvɨ opɨta yepopeyu igüɨ pe, jare mbaetɨ ye kia oparavɨkɨ iuvarupa reta pe.

¹⁹ Jakuvo yae mbaetɨ okɨ jeko pegua, iroɨ tɨkui; jare tɨvɨa pe iyoa vae okañɨ.

²⁰ Ichɨ iñakañɨta chugüi; taso reta opata jou, ngaraa ye ma kia imaendúa jese, ɨvɨra oyeasɨa ramita iyoa vae reta.

²¹ Echa kuña reta imembɨmbae jare imemano vae reta re, oyuvanga katu avei, mbaetɨ omborɨ.

²² Ërei Tumpa imbaepuere pe omboai imbaepuere vae reta. Jae opüa yave, mbaetɨ kia ipuere ojoyepe.

²³ Tumpa omaeño oiko pɨagüive reta, ërei jae omae opaete oyapogüe reta re.

²⁴ Michi raɨ pegua oiko kavi jeko pɨ̈chɨi vae reta, ërei jarembae mbaetɨ ma oiko, ipiru ñana oyeapomondoro rami, avati oyemboyeapa vae rami.

²⁵ Kuae mbaetɨ yave jökorai, ¿kia pa ipuere oechauka cheve cheapu ko aï vae, ani ayavɨ ko vae?