JOB 23 - Biblia Guarani Tumpa Iñee

Job oipota oyembojupi Tumpa jóvai

¹ Job jei:

² Añave chemiarita vi jasɨ katu reve, echa jeiete yae chepere reta cheräse güi.

³ ¡Kia pa jeita cheve ketɨ aväe vaerä Tumpa, jare aja aväe jae oïa pe!

⁴ Chemiarita chupe mbae aasa vae re, jeta anoi mbae re ayeepɨ vaerä.

⁵ Aikuaata mbae jae chupe vaerä, jae omboyevɨ yave ñee cheve.

⁶ ¿Oyoakata ra che ndive tuicha mbaepuere ndive? Ngaraa, jae oyeapɨsakata ko cheré.

⁷ Ngaraa chemboeko, jare chereeyata jekombae jekuae avei pegua.

⁸ Mase, aeka yave Tumpa kuaraɨ oëa kotɨ, ngaraa aväe chupe, aeka yave kuaraɨ oikea kotɨ, ngaraa aecha.

⁹ Amae yave ɨvɨtuguasu kotɨ, ngaraa aecha, arayevɨ jaeramiño vi.

¹⁰ Ërei jae chekuaa katu, chejäa yave aëta oro oyeambae rami.

¹¹ Aguata jaɨkue mbaetɨ apia chugüi, ayapo jei cheve vae cheokuai rami.

¹² Mbaetɨ apia jae iporookuai güi, ambotenonde iñee, tembíu güi.

¹³ Ërei jae jei yave mbae oyapo vaerä, oyapo, ngaraa kia oipoepɨ iyemongeta.

¹⁴ Jae ikɨ̈reɨ oyapo cheve vae, oyapota ko, jare oime jeta iyemongeta pe güɨnoi jókuae nunga.

¹⁵ Jáeramo, che akɨɨye aï jae jóvai, ayemongeta jese yave chemongɨɨye yae.

¹⁶ Tumpa chembopɨtu yae ma, Imbaepuere yae ete vae chembopɨatɨtɨ yae.

¹⁷ ¡Mbae mona pɨ̈tu chemokañɨ, jare pɨtumimbi opa cheöva!