JOB 22 - Biblia Guarani Tumpa Iñee

Elifaz omboeko Job ikavimbae yae pe

¹ Elifaz Temán pegua jei chupe:

² ¿Rerovia pa kuimbae iyarakuaa katu yae güi, Tumpa ipuere oiporu?

³ ¿Oyerovia ra Imbaepuere yae vae reyembojupiuka vae re? Ani, ¿mbaerä ra ikavita chupe rembojupi yae ndereko yave?

⁴ Ndembosɨmbɨ yave, nejäa yave, mbaetɨ ko jupi reyeokuai chupe ramo.

⁵ Echa jeta yae ikavimbae reyapo, jeta yae ndeyoa.

⁶ Repɨ̈ro mbae nerëtara reta güi jupimbae reve, repɨ̈ro temimonde paravete vae güi jare reeya jetegüɨrai.

⁷ Iɨuve vae pe mbaetɨ remee ɨ, yɨmbɨaɨ vae mbaetɨ remee okaru.

⁸ ¡Echa nde ndembaepuere jare imboetea vae, reyererovia nde ko jae ɨvɨ iya vae!

⁹ Imemano vae reta ipogüɨrai remondo, tɨ̈reɨ reta re reyuvanga katu.

¹⁰ Jáeramo añave mbae ikavimbae oyere nderé, jare nemongɨɨye yae.

¹¹ Opaete oyembopɨtumimbi ndeve, mbaetɨ ndepuere reecha, ɨ oguata vae ndeasoi.

¹² Tumpa oï ɨvate yae ara pe; yasɨtata reta ɨvate yae ñogüɨnoi vae opɨta jae ipɨ igüɨ pe.

¹³ Jare nde rere: “¿Këraita pa Tumpa oikuaa kuae re? ¿Këraita pa oporojäa pɨtumimbi rupi.

¹⁴ Amapɨtu reta oñova mbaetɨ ipuere omae, jare ara iyapɨ rupi ojo oguata?”

¹⁵ ¿Reipota pa remomoe teko pɨ̈chɨi, arakae güive ipɨapochɨ vae reta yogüɨreko rami?

¹⁶ Jae reta omano jarembae, ɨporu opa imbaembae güɨraja rami.

¹⁷ Jei reta Tumpa pe: “¡Esɨrɨ katu oregüi! ¿Mbae pa ndepuere reyapo oreveguarä Imbaepuere yae ete vae?”

¹⁸ Jae ko omee mbaembae omotɨnɨe vaerä jo reta. ¡Mombɨrɨ toï chegüi kuae nunga yemongeta!

¹⁹ Jupi vae reta oecha yave oyerovia, jekombae reta oyóyai yóyai, jei reve:

²⁰ “Opa okañɨtei yanderovaicho reta, opa tata omokañɨtei chugüi reta imbaeyekou.”

²¹ Eñemoïru ye Tumpa ndive, jare renoita mbɨakatu, kuae reyapo yave reiko kavi yeta.

²² Eipɨɨ añave jae iporookuai, jare eñono jae iñee ndepɨa pe.

²³ Reyerova ye yave Imbaepuere yae ete vae kotɨ, reï kavi pɨau yeta, jare ombosɨrɨta ndero güi mbɨatɨtɨ.

²⁴ Jeta yaeta renoi oro ɨvɨkúi rami, jare oro Ofir jee vae ita reta ɨ̈aka pe rami.

²⁵ Imbaepuere yae ete vae ndereepɨta, jae etei ko oro jare korepoti ramita ndeve.

²⁶ Echa jayave reyekouta Imbaepuere yae ete vae re, jare ndepuereta nderovaɨva Tumpa kotɨ.

²⁷ Reyerure yave jae oenduta ndeve, jare nde remeeta reñererökuavee vae.

²⁸ Mbae nekɨ̈reɨ reyapo vae, reyapota, nderape oesapeta ndeve tembipe.

²⁹ Echa Tumpa omomichi oyembotuicha vae, jare ombotuicha oñemomichi vae.

³⁰ Jae ndereroasayepeta, mbaetɨ ndereko yave, jare reyetɨo ndeyoa güi yave.