JOB 21 - Biblia Guarani Tumpa Iñee

Job güɨrovia iyoa vae reta yogüɨreko kavi vae re

¹ Jayave Job jei:

² Peyeapɨsaka kavi cheñee re, jae kuae chembopɨakatu pɨpe vae.

³ Pepɨaguasu cheve chemiari ramboeve, opa chemiari yave, pepuere cheyóyai peipota yave.

⁴ Cheñeapo mbaetɨ ko kia nunga kuimbae ndive; jáeramo mbaetɨ chepɨaguasu.

⁵ Pemae cheré jare pekɨɨyeta, jare peyeyuruopɨ pepɨakañɨ güi.

⁶ Che etei vi, chemaendúa jese yave, chemongɨɨye, jare chemborɨrɨi.

⁷ ¿Maera pa iyoa vae reta jekuaeño oikove, jare indechi pe jekuaeño täta?

⁸ Oecha okuakuaa taɨ reta jare jɨmɨmino reta, jare yogüɨreko pɨagüive iyɨpɨ rupi.

⁹ Jo pegua reta mbaetɨ maratu yogüɨreko, mbaetɨ Tumpa oiporarauka chupe reta.

¹⁰ Jɨmba reta oñemuña chupe, iguaka reta mbaetɨ imembɨ okua.

¹¹ Imichia reta osɨi oyuvanga vecha kuimbae raɨ reta rami,

¹² oyerovia güi opɨrae reta, arpa jare tambora raɨ ipu rupi.

¹³ Omboasa reta ara yogüɨreko kavi reve, omano pɨagüive reta.

¹⁴ Jei reta Tumpa pe: “¡Esɨrɨ katu oregüi mbaetɨ roipota roikuaa ndeporookuai!

¹⁵ ¿Kia pa jókuae Imbaepuere yae ete vae romboete vaerä? ¿Mbae pa omeeta oreve royerure chupe yave?”

¹⁶ Mase, jeko pɨ̈chɨi vae reta mbaembae güɨnoi vae, jae reta imbaeä ko. ¡Mombɨrɨ toï chegüi kuae nunga yemongeta!

¹⁷ ¿Kërai yave pa ogüe jeko pɨ̈chɨi vae jembipe? ¿Kërai yave pa jae reta osusere? ¿Yerae pa Tumpa iyarasɨ ikotɨ reta, jare oiporarauka chupe reta?

¹⁸ Jae reta kapii ramiño ko ɨvɨtu güɨroveve, ani mbae javiyugüe rami ɨvɨtuai opa güɨraja.

¹⁹ Tumpa ko oiporaraukata ñemuña reta pe, tu reta jeko kavimbae re, ërei jeko pɨ̈chɨi vae etei ko oiporarata jeko re, oikuaa reta vaerä.

²⁰ Jae toecha oyavɨgüe, jare toiporara Imbaepuere yae ete vae iyarasɨ.

²¹ Echa, ¿oyerovia yeta pa jo pegua reta ndive omano yave, ani iara reta iyapɨ ma yave?

²² ¿Ipuere yera kia Tumpa omboarakuaa, jae ojäa araɨgua reta vae?

²³ Oime amogüe reta omano, ipɨ̈rata reve, oyerovia reve jare oiko pɨagüive reve,

²⁴ oiko kavi reve jare oikovekatu reve.

²⁵ Ïru vae oikoasɨ katu reve omano, mbaetɨ etei oyerovia jekove pe.

²⁶ Oyovake yogüɨrajata oputuu tɨvɨa pe, jare taso reta opata jou.

²⁷ Mase, che aikuaa katu peyemongeta chekotɨ vae, jare ikavimbae peyapo vaerä penoi vae.

²⁸ Echa pere: “¿Ketɨ pa opɨta oï mburuvicha jo? ¿Ketɨ pa oime jókuae mburuvicha iyoa vae reta oikoa?”

²⁹ ¿Mbaetɨ pa pemiari oguata vae reta ndive? ¿Mbaetɨ pa peendu jae reta jei:

³⁰ “Tumpa iyarasɨ yave ombou mbaesusere, jare jeko pɨ̈chɨi vae mbaetɨ maratu oiko”?

³¹ Mbaetɨ etei kia mbae jei chupe jova pe, mbaetɨ kia oiporarauka chupe.

^32-33 Omano yave oyereraja tɨvɨa pe, jenonde jare jaɨkue jeta yogüɨraja vae, jare jɨvɨa oäro vae. Ɨvɨ ave ipɨu kavi chupe.

³⁴ ¡Maera pa chembopɨakatu raangaiño! ¡Peapu opaete jókuae pere vae rupi!