JOB 2 - Biblia Guarani Tumpa Iñee

¹ Jare ïru ara pe araɨgua reta yogüeru yandeYa jóvai yave, Satanás vi ou jae reta ipɨte pe yandeYa jóvai.

² Jare yandeYa jei Satanás pe: —¿Ketɨ güi pa reyu? Jare Satanás jei yandeYa pe: —Ɨvɨ rupi ayere aguata aikoa kotɨ güi.

³ Jare yandeYa jei Satanás pe: —¿Remae pa cherembiokuai Job re? Kërai mbaetɨ yé ïru kuimbae kuae ɨvɨ pe jae rami vae, jupi jare jeko sɨmbi vae, oipoɨu chegüi vae jare oyeandu ikavimbae güi vae, yepe nde chemoñera tëi ayapo vaerä ikavimbae vae chupe jekombae reve, ërei jae jekuaeño ipɨ̈rata jeko kavi pe.

⁴ Satanás jei yandeYa pe: —Jekove oaɨu pɨpei, kuimbae omeeta ko opaete imbaembae, güɨroasayepe vaerä jekove.

⁵ Ërei yaecha añave epoko ikägüe re jare isoo re, jare reechata mbaetɨta ra ndeangao nderova pe etei vae.

⁶ Jare yandeYa jei Satanás pe: —Mase, ko jae oï ndepo pe, ërei chupe etei agüɨye mbae eyapo.

⁷ Jayave Satanás oë yandeYa jóvai güi, jare omombaerasɨ Job, kuru yavaete yae vae pe; ipɨ güive ojoi iyapɨte pe oväe.

⁸ Jare Job oguapɨ tanimbu re, oipɨɨ takɨpe jaɨgüe oñekari vaerä pɨpe.

⁹ Jayave jembireko jei chupe: —¿Jekuaeñota pa reñovatu ndereko kavi? ¡Neñeeasɨ Tumpa kotɨ, jare emano!

¹⁰ Jayave jae jei chupe: —Oipotagüe kuña iyarakuaambae reta rami neñee. ¿Kërai pa? ¿Ikavi vaeño pa ñanoita Tumpa güi jare mbaesusere mbaetɨta pa? Opaete kuaekuae rupi, Job mbaetɨ iyoa iñee rupi ave.

¹¹ Jare mboapɨ Job ivɨa-ïru reta: Elifaz Temán pegua, Bildad Súa pegua jare Zofar Naamat pegua; oendu reta opaete kuae ikavimbae ou chupe vae yave, yogüeru reta metei ñavo yogüɨrekoa kotɨ güi; echa oñomomiari reta yogüeru päve vaerä ipɨatɨtɨ jese jare ombopɨakatu vaerä.

¹² Kuae reta, mombɨrɨ güive omopüa iñäka omae, ërei mbaetɨ oikuaa reta, jare jäse oyaeo reta; jare metei ñavo vae omondoro jemimonde ipɨatɨtɨ güi, jare mboapɨ reve omoai reta ɨvɨkúi ara kotɨ iñäka iárambo, omboyekuaa ipɨatɨtɨ.

¹³ Jökorai oguapɨ reta jae ndive ɨvɨ pe, chiu ara jare chiu pɨ̈tu rupi, mbaetɨ metei ave omoë iñee, echa oecha reta tuicha yae oiporara mbae jasɨ.