JOB 19 - Biblia Guarani Tumpa Iñee

Job güɨrovia Tumpa ombojupita ko vae re

¹ Jayave Job jei:

² ¿Kërai yave regua pa chembopɨatɨtɨta, jare cheapasota peñee reta pe?

³ Jeta yae ma peiporarauka cheve; ¿mbaetɨ pa pemara peñee rasɨ cheve?

⁴ Añete, ayavɨ yave, cheré ko opɨta jókuae teko.

⁵ Ërei pe reta peñeväe jupi chegüi, jare pere cheve cherova pe etei chesusere re.

⁶ Peikuaa kavi añave, Tumpa ko chembosusere, jae ko chereitɨuka ñuai pe.

⁷ Mase, che asapúkai: “Cheyuka ma oï”, ërei mbaetɨ kia oendu cheve, aiporu yemborɨ, ërei mbaetɨ kia oyapo jupi vae cheve.

⁸ Tumpa oikëse cherape chegüi, agüɨye vaerä aasa, cherape ombopɨtumimbi chegüi.

⁹ Opɨ̈ro chegüi chembaeyekou, jare cheäka-regua oekɨ chegüi.

¹⁰ Chererokomegua oipotagüe rupi; ¡ayerovia jese vae oekɨ chegüi, ɨvɨra oyeapomondoro rami!

¹¹ Iyarasɨ yae chekotɨ, jare cheñono jovaicho reta ipɨte pe.

¹² Yogüeru isundaro reta metei rami; oyembojeyupa reta chero iyɨ́vɨri, oyeapokatu reta opüa vaerä cheré.

¹³ Ombosɨrɨuka mombɨrɨ cherëtara reta chegüi, jare chevɨa-ïru reta, ketɨgua rami omae reta cheré.

¹⁴ Cherëtara reta jare chekuaa katu vae reta opa ñakañɨ chegüi.

¹⁵ Chero pegua reta jare cheremimbokuakuaa reta, ketɨgua rami omae reta cheré.

¹⁶ Aenɨi yave cherembiokuai, mbaetɨ ou cheve, yepe amoñera tëi.

¹⁷ Cherembireko chereröɨro chepiche kaviä güi, chemichia reta oyuguaru chegüi.

¹⁸ Michia reta ave chereröɨro, apüa yave mbaetɨ imiari kavi reta cheré.

¹⁹ Rovɨa yae oyoe vae ndive vae reta, chemotareɨ, che aaɨu vae reta oyovaicho chekotɨ.

²⁰ Chepire jare chesoo oya chekägüe re, chepiru yae güi, jökorai reve oimeño aikove aï.

²¹ Pe, chevɨa-ïru reta, ¡cheparareko! ¡Cheparareko! Echa Tumpa oñono ipo cheré.

²² ¿Maera pa pe reta pemaeñoä cheré Tumpa cheapo rami, ndeiño pa peangapɨɨ cheré?

²³ ¡Kia mona añave oikuatía cheñee reta, kia ra oikuatiata tembikuatía pe!

²⁴ ¡Kia mona jiero pe oyoo oikuatía oñono plomo re, jare ita re, jekuae avei oiko vaerä!

²⁵ Che aikuaa ko cheReepɨ vae oikove, jare taɨkue ete rupi opüa ñotai ko chereepɨ.

²⁶ Yepe tëi mona chepire opa ókui, ërei aecha ñotai ko Tumpa cherete ndive.

²⁷ Che etei ko aechata, mbaetɨta kia, cheresa pe etei ko aechata. Yepe tëi chepɨ̈rata oata cheve.

²⁸ Pepuere tëi viña pere: “Yayuvanga mbatee yae ma jese, echa oiporara jae jeko peguai.”

²⁹ Pekɨɨye kɨsepuku güi, echa pɨpe Tumpa oiporarauka ikavimbae oyapo vae pe, peikuaa vaerä oime ko metei oporojäa jupi rupi vae.