JOB 17 - Biblia Guarani Tumpa Iñee

¹ Chepɨ̈rata opa ojo oiko chegüi, ara reta opa ojo oiko chegüi, tɨvɨa cheräro oï.

² Cheɨpɨ pe jaeño ma ñogüɨnoi oporoyóyai yóyai vae; jae reta iporombopɨatɨtɨ mbaetɨ osɨrɨ chegüi.

³ CheTumpa, nde ndepuere chemborɨ, echa, ¿kia pa ikɨ̈reɨta chemborɨ?

⁴ Echa kuae reta güi repɨ̈ro arakuaa, jáeramo, agüɨye emaeño toyembotuicha reta.

⁵ Ivɨa-ïru ombotavɨ vae reta, taɨ reta yogüɨrekota susere rupi.

⁶ Tumpa cheñono, opaete vae imiari vaerä chekotɨ, jae reta jóvai aiko kia ondɨvɨ jova re vae rami.

⁷ Cheresa jäve mbae jasɨ jeko pegua, cherete oasa küaraɨa oasa rami.

⁸ Jupi vae reta oecha yave omopɨakañɨ. Jekombae vae reta opüata iyoa vae reta re.

⁹ Jupi vae reta ojota tenonde, ikavi oyapo vae oñemoïruta ipɨ̈rata.

¹⁰ Ërei pe reta peyu ye, jare mbaetɨta aväe pepɨte pe metei ave yarakuaa vae.

¹¹ Ara reta oasa ojo oiko chegüi, ayemongeta tëi ayapo vaerä vae opa oikomegua chegüi.

¹² Pe reta pere pɨ̈tu pe: “Ara ko oï”, ani “pɨtumimbi opata ma, tembipe köi yae ma ou.”

¹³ ¿Mbae ye pa aärota? Omanogüe reta ñogüɨnoia ko jae chero, ayapo kavita cheruparä pɨtumimbía pe.

¹⁴ Tɨvɨa pe jae: “Cheru ko nde.” Taso reta pe jae: “Chesɨ jare chereindɨ ko nde.”

¹⁵ Jayave, ¿ketɨ pa oime aäro vae, jare kia pa oikuaa mbae cheräro vae?

¹⁶ Omanogüe reta ñogüɨnoia pe ajata, kuae aäro tëi vae ndive aputuuta ɨvɨkúi pe.