JOB 16 - Biblia Guarani Tumpa Iñee

Job omboeta Tumpa pe

¹ Job jekuae jei ye:

² Jeta ma aendu kuae nunga yemongeta, oporomoambeko vae pe reta.

³ ¿Iyapɨtaä ra ñee osirivembae? Ani mbae pa nemoäta ngatu cheñee-pɨndekua vaerä.

⁴ Che chepuere vi ko cheñee amoë pe reta rami, pe reta che rami peï yave, che chepuere vi jeta mbae jae pekotɨ, jare añeäkambovava amae peré.

⁵ Ërei che yave, pomoäta ngatuta ko cheñee pe, jare cheporombopɨakatu rupi oasata ko mbae jasɨ pegüi.

⁶ Cheñee amoë yave, mbaetɨ opɨta mbae jasɨ chegüi, mbaetɨ cheñee amoë yave jaeramiño vi.

⁷ Ërei añave Tumpa opɨ̈ro chepɨ̈rata, omokañɨtei chegüi opaete chero pegua reta,

⁸ cheñono tembipɨɨrɨru pe rami, jare kuae chepiru vae imiari rami cheré, chemboeko jaanga reta.

⁹ YandeYa iyarasɨ rupi oiporarauka cheve, jäi ombokɨrɨrɨu chekotɨ mbaeporou rami, omaeäta cheré jovaicho rami.

¹⁰ Jeta vae reta oyomboatɨ chekotɨ, jova ambuae omae reta cheré, cherovapete reta ñemomarai pe.

¹¹ Tumpa chemee iyapu vae reta pe, chereitɨ iyoa vae reta ipo pe.

¹² Ikavi yae aja tëi, ërei opa chemboai, cheayupɨɨ jare opa chemondoro ndoro, jare cheñono cheɨ̈vo vaerä juvɨ pe.

¹³ Opaetei chekëse reta, cheɨ̈vo cherete rupi, mbaetɨ cheparareko; chechuri oyepɨyere ɨvɨ pe.

¹⁴ Omboyoaɨkue ɨkue chembopere, ou cheve ñeraro regua ou rami.

¹⁵ Ayemonde temimonde mbɨatɨtɨ pegua pe, cheäka añono ɨvɨkúi pe.

¹⁶ Cheresa iruru ma ayaeoagüe, jare jäve ma amae,

¹⁷ yepe tëi mbaetɨ ikavimbae ayapo, yepe tëi cheyerure jupi rupi.

¹⁸ ¡Ɨvɨ, agüɨye eñomi cherugüɨ! ¡Cheräse toyeendu oipota rupi!

¹⁹ Ërei ara pe oime oï chereecha vae, imiari kavita cheré vae oime oï ɨvate.

²⁰ Chemotareɨ chevɨa-ïru reta, ërei che Tumpa jóvai apɨyereta cheresaɨ.

²¹ ¡Mbae mona oime kia oyoaka cheve Tumpa ndive; kuimbae oyoaka japicha ndive rami!

²² Ërei outa cheara reta iyapɨ, jare che ajata tape yayu yembae vae rupi.